Read Yucateco Colosenses 3 Bible Online

Colosenses 3 - Yucateco bible

Colosenses 3

¹Bey túuno', bey dzo'oc a ca'a púut cuxtale'ex yéetel Cristoo', caxte'ex u ba'alilo'ob ca'an tu'ux culucbal Cristo tu x no'oj Junab Ku.

²Tuculte'ex u ba'alilo'ob ca'an, ma' u ba'alilo'ob lu'umi'.

³Tumen te'exe' quimene'ex yéetel Cristo, beora' a cuxtale'exe' ta'aca'an yéetel leti' ti' Ku.

⁴Cristoe' leti' c cuxtal, le quéen chíicpajac leti'e' te'ex túune' yaan a chíicpajle'ex tu yéetel ti' u nojbe'enil.

⁵Bey túuno', beete'ex u quíimil tuláacal le lu'umcabil ba'alo'ob yaan ti' te'exo': Mix máac ca nup kebanchajac, mix ca u beet ba'alo'ob kaastac, mix ca xi'ic tu paach kaakas tuuculo'ob yéetel u kaakas dzíibolalo'ob, mix ca u dzíibolt taakin, tumen lela' queet yéetel u kulta'al beetbil kuo'ob.

⁶Tu yo'olal le ba'alo'oba' cu taal u yaayaj jaadz Ku tu yóokol le máaxo'ob ma' táan u yu'ubico'ob t'aano',

⁷te'exe' ca beetique'ex ca'ach tuláacal le ba'alo'oba' ti' a úuchben cuxtale'ex.

⁸Ba'ale' beora' p'ate'ex tuláacal le ba'alo'oba': kuuxil, kaakas tuucul, kaasil, pooch'il, yéetel le kaakas t'aano'ob cu páajtal u jóokol ti' a chi'exo'.

⁹Ma' a tusicaba'ex ta baatzile'ex, tumen dzo'oc a pitique'ex le úuchben cuxtalo' yéetel le ba'alo'ob ca beetique'ex ca'acho',

¹⁰yéetel dzo'oc a búucbescaba'ex yéetel le túumben cuxtalo', tu yo'olal lela' cu bin a túumbenchajle'ex u ti'al a béeytale'ex je'el bix le Ku máax j beete'exo', tac quéen a kaj óol te'ex ma'alob leti'.

¹¹Ti' lela' mina'an u yila'al wa judío máac wa ma', mix wa súutkupta'an máac wa ma' mix u yila'al wa táanxel lu'umil máac, mix wa máasewal máac, mix wa palitzil máac wa ma'; ba'ale' Cristoe' leti' tuláacal yéetel leti'e' ti' yaan ti' tuláacale'.

¹²Kue' u yaabiltmaje'ex te'ex yéetel dzo'oc u yéeyique'ex u ti'al ca u ti'alinte'ex. Cuxlene'ex túun a búucbesme'ex u páajtalil ch'a'a óotzilil, utzil pucsi'ikal, cabal óolalil, suuc óolalil yéetel chuca'an óolalil.

¹³Yanac te'ex chowac óolalil ta baatzile'ex, yéetel paaclan sa'atsaba'ex wa yaan wa máax yaan ba'al ti' tu contra u láak, je'el bix tu sa'atse'ex Cristoe', bey xan a beete'ex ta baatzile'exo'.

¹⁴Tu yóokol tuláacale' yanac te'ex yaacunaj, tumen lela' leti' cu nupic yéetel cu chíicbesic tuláacal ba'al.

¹⁵U jéedzel óolal Cristoe' ca u nu'uct u beel a pucsi'ikale'ex, tumen u ti'al lela' tu t'anaje'ex Ku u ti'al u nupe'ex ti' jun p'éelili' wíinclil. yéetel cane'ex a dza'ex nib óolal.

¹⁶U ma'alob péectzil Cristo ca u chuup ma'alob a pucsi'ikale'ex. Ca'anbesaba'ex yéetel tzolxiquintaba'ex ta baatzile'ex yéetel tuláacal na'atil. Kaye'ex salmo'ob, himno'ob, yéetel quili'ich kaayo'ob u ti'al a dzáique'ex nib óolal ti' Ku ta pucsi'ikale'ex.

¹⁷Je'el ba'alac ca a beete'ex wa ca a wa'ale'exe', beete'ex tuláacal tu kaba' Yuumtzil Jesús, táan a dzáique'ex nib óolal ti' Yuum le Taatao' tu yo'olal leti'.

¹⁸Atantzile'ex, dzáaba'ex yáanal u páajtalil a wíichame'ex, tumen lela' ma'alob tu táan Yuumtzil.

¹⁹Iichantzilke'ex, yaabilt a watane'ex yéetel ma' a kuuxile'ex tu yéetelo'ob.

²⁰Paale'ex, u'uye'ex u t'aan a taataex ti' tuláacal ba'al, tumen lela' utz tu táan Yuumtzil.

²¹Taatatzile'ex ma' a beetique'ex u kuuxil a paalale'ex, u ti'al ma' u lúubul u yóolo'ob.

²²Palitzile'ex, u'uye'ex u t'aan a dzuulile'ex ti' tuláacal ba'al way ti' le lu'uma', ma' chéen ti' le kiin táan a pacta'ale'ex tumen leti'obe', u ti'al a p'áatale'ex utzil yéetelo'obe', ba'ale' yéetel u jaajil u yóol a pucsi'ikale'ex, tu yo'olal a sajaquile'ex ti' Yuum Ku.

²³Je'el ba'alac ca a beete'exe', beete'ex yéetel utzil óolal, bey táan a meyajtique'ex Yuumtzile' ma' máaco'obi'.

²⁴Tumen a wojele'exe' Yuumtzile' yaan u dzáic te'ex bey jun p'éel siibal le u ayikalilo'. Tumen te'exe' táan a meyajtique'ex Cristo, máax u jaajil a Yuumtzile'ex.

²⁵Ba'ale' le máax cu beetic le kaaso', bíin u kam u bo'olil le kaas cu beetico', tumen mina'an u jela'anil mix máac tu yóokol u láak máac.