Read Yucateco Colosenses 4 Bible Online

Colosenses 4 - Yucateco bible

Colosenses 4

¹Te'ex dzuule'exe', unaj a beetique'ex ba'ax toj yéetel ma'alob tu yéetel a palitzile'ex, tumen a wojele'exe' yaan a dzuulile'ex te j ca'ano'.

²Payalchi'inene'ex mantadz, p'iilil a wiche'ex yéetel táan a dzáique'ex nib óolal ti' Yuum Ku.

³Payalchi'inene'ex xan t o'olal, u ti'al ca dza'abac to'on tumen Yuumtzil jun p'éel jool naj je'ekab u ti'al c tze'ectic le ma'alob péectzilo' yéetel u ti'al ca c tzicbalt u ta'acbil ba'al Cristo, tumen tu yo'olal le ta'acbil ba'alo' kala'anen.

⁴Payalchi'inene'ex u ti'al ca in dzáa kaj óoltbil jach t'áalcab je'el bix unaj in beetico'.

⁵Canant bix a cuxtale'ex tu yéetel le máaxo'ob ma' ocsaj óolo'obo', táan a beetique'ex u yantal u biilal tuláacal le kiino'obo'.

⁶A tzicbale'exe' mantadz ca u'uya'ac ma'alob yéetel jadzutz, yéetel ca a wojéelte'ex bix unaj a núuquique'ex u t'aan jujun túul.

⁷C yaabilaj sucu'un Tíquico, máax jun túul j áantaj chuca'an u yóol, yéetel dzo'oc u meyajtic Yuumtzil tin wéetele', leti' cun u dzáa te'ex tuláacal le péectzilo'ob tin wo'olalo'.

⁸Tu yo'olal lela' táan in túuxtic te'ex u ti'al u ya'al te'exe' bix anilo'on yéetel u ti'al u líikes a wóole'ex.

⁹Tu yéetele' táan u bin xan Onésimo, c yaabilaj yéetel chuca'an óol sucu'un, máax jun túul ti' te'ex. Leti'ob cun u tzicbalt te'ex. tuláacal ba'ax cu yúuchul waye'.

¹⁰Aristarco', máax in láakinaj way tu'ux kala'anene', cu túuxtic te'ex tziquil t'aano'ob, bey xan Marcos u láaktzil Bernabé. Te'exe' dzo'oc u tzo'olol te'ex máax Marcos; wa cu bin u xíimbalte'exe', kame'ex ma'alob.

¹¹Bey xan cu tziquil t'antique'ex Jesús, máax cu kaaba'inta'al xan Justo. chéen lelo'oba' ichil le ocsaj óol judíobo' dzo'oc u meyajo'ob tin wéetel u ti'al u ajawil Ku, yéetel tu dzajo'ob teen nojoch qui'imac óolal.

¹²Cu túuxtic te'ex tziquil t'aano'ob Epafras, jun túul u palitzil Cristo, máax jun túul ti' te'ex. Leti'e' mantadz cu káat óolal ta wo'olale'ex ich payalchi', u ti'al ca mu'uka'anchajac a wóole'ex yéetel ca utzil kubaba'ex u ti'al a beetique'ex ba'ax u káat Ku.

¹³Tumen tene' quin jaajcuntic bix u sen tucultique'ex Epafras, bey xan bix u sen tucultic le máaxo'ob yano'ob tu caajilo'ob Laodicea yéetel Hierápoliso'.

¹⁴Lucas le j dzac yaj jach yaabila'ano', cu tziquil t'antique'ex, bey xan Demas.

¹⁵Tziquil t'ante'ex le sucu'uno'ob yano'ob Laodiceao', tziquil t'ante'ex xan Ninfas, bey xan le u múuch'ul ocsaj óolo'ob cu much'cuba'ob tu yotocho'.

¹⁶Cu dzo'ocol a xoquique'ex le dzíibil ju'un Ichile'exa' túuxte'ex u ti'al ca xo'ococ tu iglesiail Laodicea: te'ex xane' xoque'ex le dzíibil ju'un Laodicea u taalo'.

¹⁷A'ale'ex ti' Arquipo lela': Il a wil ca beet ma'alob le meyaj u kubentmaj teech Yuumtzilo'.

¹⁸Teen Pabloe', tin kabil quin dzíibtic te'ex le tziquil t'aana'. Ka'ajac te'ex kala'anen. U siibal utzil Ku ca yanac ta wéetele'ex. Amén.