Read Yucateco 1 Tesalonicenses 2 Bible Online

1 Tesalonicenses 2 - Yucateco bible

1 Tesalonicenses 2

¹Te'exe' a wojele'ex, sucu'une'ex, ma' cunelchaj binico'on xíimbalte'exi'.

²U jaajile', quex po'och'o'on yéetel ja'ajadza'abo'on tu caajil Filipos, je'el bix dzo'oc a wojéeltique'exo', Kue' tu yáanto'on u ti'al ca c tze'ect te'ex le ma'alob péectzilo' yéetel tuláacal kub óolal, chúumuc ti' jun p'éel nojoch ch'a'apachtajil.

³Tumen ma' keechel c tuucul ti' ba'ax c tze'ectiqui', mix táan c t'aan yéetel kaakas tuuculo'obi', mix yéetel tuusi'.

⁴Ba'ax ucha'ane' Kue' tu kamajo'on yéetel tu kubentaj to'on le ma'alob péectzilo', bey túun úuchic c t'aano'. Ma' táan c caxtix c lúubul utzil tu táan máaco'ob, ba'ale' tu táan Ku, máax xakaltic c pucsi'ikal.

⁵Je'el bix a wojelile'exe', mix jun téen t qui' óol t'antaje'ex yéetel jadzutz t'aano'ob, mix t caxtaj ba'al c a'al te'ex u ti'al c náajaltic taakin. Kue' u yojel lela'.

⁶Mix jun téen t caxtaj nojbe'enil ichil máaco'obi', mix ichile'exi' mix ichil u láako'obi' quex tumen cu páajtal ca'ach c beetic wu'uyique'ex u muukil c páajtalil je'el bix máaxo'ob túuxta'ano'ob tumen Cristoe'.

⁷Ba'ax t beetaje', táan óoltaje'ex yéetel muumun óolal, je'el bix jun túul maamatzil cu tzéentic yéetel cu canantic u mejen paalalo'obe'.

⁸Jach c yaabiltmaje'ex le o'olale' je'el c óoltic ca'ach c dzáa te'ex ma' chéen u ma'alob péectzilil Kui', ba'ale' tac c cuxtal, tumen dzo'oc c kuchul c yaabilte'ex jach ya'ab.

⁹Sucu'une'ex, cu ka'ajal te'ex bix meyajnajo'on yéetel c mukul muuknajo'on u ti'al ca cuxlaco'on. Meyajnajo'on yéetel kiin bey xan yéetel áakab, u ti'al ma' c dzáic mix jun p'éel cuuch ti' mix jun túul te'ex ca'aliquil táan c tze'ectic te'ex u ma'alob péectzil Ku.

¹⁰Te'ex jaajcuntic, bey xan Ku, to'one' xíimbalnajo'on yéetel utzil bey xan yéetel tojil ta wéetele'ex máax j ocsaj óole'ex, ma' t dzáa tu'ux u ta'acal c pool tumen mix máaqui'.

¹¹Bey xan a wojele'ex bix t líiksaj u yóol yéetel t qui'imaccunsaj u yóol cada jun túul ti' te'ex, je'el bix u beetic jun túul taatatzil yéetel u paalalo'obe'.

¹²C kubentmaj te'ex ca cuxlaque'ex je'el bix unaj u cuxtal le máaxo'ob u ti'alo'ob Kuo', máax t'ane'ex u ti'al ca táacpajque'ex ti' u ajawil yéetel ti' u nojbe'enil.

¹³Tu yo'olal lela' mantadz c dzáic nib óolal ti' Ku, tumen le ca ta wu'uyaje'ex u ma'alob péectzil Kue', le t tze'ectaj to'on ti' te'exo', ta kamaje'ex je'el bix u ma'alob péectzil Kue' ma' je'el bix u ma'alob péectzil máaco'obe'. Jach tu jaajile' u ma'alob péectzil Ku, le cu dzáic u yicho'ob ti' te'ex máaxe'ex ca wocsaj óole'exo'.

¹⁴Sucu'une'ex, le ca ta mukyajte'ex ch'a'apachtajil tu kab a wéet caajale'exo'obe' j úuch ti' te'ex le ba'ax úuch ti' le u iglesiaob Ku yano'ob Judeao' yéetel u ti'alo'ob Cristo Jesuso', tumen leti'obe' ch'a'apachta'abo'ob xan tumen u yéet caajalo'ob, le judíobo'.

¹⁵Le judíoba' tu quiimsajo'ob Yuumtzil Jesús, je'el bix tu quiimsilaco'ob le aj bóobato'obo', yéetel tu tojolch'into'ono'ob to'on. Ma' tu lúubulo'ob utzil tu táan Kui' yéetel ti' yano'ob tu contra tuláacal máaco'obe',

¹⁶tumen le quéen c óolt t'aan le máaxo'ob ma' judíobo' u ti'al ca to'ococo'ob xane', ma' táan u cha'aico'ob c beetic. Bey túuna' táan u mas ya'abcuntico'ob u kebano'ob. Ba'ale' bele, u yaayaj jaadz Kue' dzo'oc u taal tu yóokolo'ob.

¹⁷Sucu'une'ex, le ca t p'ataje'ex tu yo'olal dze'edzec kiino'obe' quex ma' táan c ilique'exe', mantadz ti' yane'ex t pucsi'ikale', yéetel túun ya'abcach dzíibolale' c káat ca c ile'ex.

¹⁸T óoltaj bin, teen Pablo, dze'edzec u téenel tin wóoltaj bin, ba'ale' tuláacal u téenele' Satanase' ma' tu cha'aj to'oni'.

¹⁹Tumen, ¿máacalmáac c alab óolal, wa c qui'imac óolal, wa ba'ax óolalil u yantal to'on nojbe'enil? ¿ma' wa te'ex le quéen taalac c Yuumtzil Jesucristoi'?

²⁰Bey, te'ex c nojbe'enil yéetel c qui'imac óolal.