Read Yucateco 1 Tesalonicenses 4 Bible Online

1 Tesalonicenses 4 - Yucateco bible

1 Tesalonicenses 4

¹Bele', sucu'une'ex, c káat óoltic te'ex yéetel c kubentic te'ex lela' tu kaaba' Yuumtzil Jesús: je'el bix t ca'ansaj ca cuxlaque'ex je'el bix utz tu t'aan Kuo' bey ca a beete'ex mantadz.

²Te'exe' a kaj óole'ex le tzol xiquino'ob t dzaj te'exo' tu kaaba' Yuumtzil Jesús.

³Ba'ax u káat Kue' ca cuxlaque'ex a kubmaj a wóole'ex ti' leti'; mix máac ca nup kebanchajac,

⁴Tu jujun túule ca u can cuxtal yéetel u yatan ich quili'ichil bey xan ich tziiquil,

⁵ma' yéetel loolob pucsi'ikali' mix yéetel kaakas dzíibolalo'ob je'el bix u beetic le máaxo'ob ma' u kaj óolo'ob Kuo'.

⁶Ti' lela' mix máac ca u beet ba'ax ma' unaji' mix ca u tus u sucu'un, tumen Yuumtzile' chich u jadzic máac tu yo'olal tuláacal lela', je'el bix dzo'oc c a'alic yéetel dzo'oc c kubentic te'exo'.

⁷Tumen Kue' ma' tu t'ano'on u ti'al ca cuxlaco'on ich kaakas dzíibolalo'obi', ba'ale' u ti'al ca cuxlaco'on yéetel kub óolal ti'.

⁸Bey túuno', le máax cu p'ectic le ca'ansajo'oba' ma' táan u p'ectic mix jun túul máaqui', ba'ale' táan u p'ectic Ku, máax dzo'oc u dzic to'on u Quili'ich Pixan.

⁹Tu yóokol le yaacunaj ichil sucu'untzilo'obo', sucu'une'ex, ma' kabéet in dzíibtic te'exi', tumen Ku dzo'oc u ca'ansic te'ex a yaabiltaba'ex ta baatzile'ex.

¹⁰Tumen bey a beetique'ex mantadz yéetel tuláacal le sucu'uno'ob caja'ano'ob ti' tuláacal u lu'umil Macedoniao'. Ba'ale' c káat óoltic te'ex, sucu'une'ex, ca asab ya'abac a yaacunaje'ex.

¹¹Il a wile'ex a cuxtale'ex yéetel jéedzel, táan a táan óoltique'ex a ba'aluba'ex, táan a meyaje'ex yéetel a kabe'ex je'el bix dzo'oc c kubentic ti' te'exo',

¹²u ti'al ca tziquilta'aque'ex tumen le yaanal máaco'obo' yéetel u ti'al ma' u bineltic te'ex mix ba'al.

¹³Sucu'une'ex ma' c káat ca p'áatac ma' a wojéeltique'ex ba'ax cu yúuchul yéetel le quimeno'obo', u ti'al ma' u okomtal a wóole'ex je'el bix le u láak máaco'ob máaxo'ob mina'an alab óolal ti'ob.

¹⁴Bey je'el bix c ocsaj óoltic Jesús j quíim yéetel ca'a púut cuxlaje', bey xan c ocsaj óoltic Ku yaan u ca'a púut cuxquintic yéetel Jesús máaxo'ob j quíimo'ob táan u yocsaj óoltico'ob leti'o'.

¹⁵Le o'olal c a'alic te'ex, je'el bix u ca'ansaj Yuumtzile', to'on máaxo'on bíin p'áataco'on cuxa'ano'on le quéen taalac Yuumtzile', ma' bíin máanaco'on ti' le máaxo'ob quimeno'obo'.

¹⁶Tumen Yuumtzile' yaan u yéemel ti' le ca'ano' yéetel nojoch páajtalil, yéetel u t'aan arcánjel bey xan yéetel u trompeta Ku. Ti' le horaob le máaxo'ob j quíimo'ob táan u yocsaj óoltico'ob Cristo yaan u ca'a púut cuxtalo'ob táanil;

¹⁷cu dzo'ocole' le máaxo'ob j p'áato'ob cuxa'ano'obo' bíin bisa'aco'ob jun múuch' tu yéetelo'ob ichil le múuyalo'ob u ti'al c núuptáanticbáa yéetel Yuumtzil te j iiko'. Bey bíin yanaco'on yéetel Yuumtzil Mantadzo'.

¹⁸Tu yo'olal lela', líiks óoltaba'ex ta baatzile'ex yéetel le t'aano'oba'.