Read Yucateco 1 Tesalonicenses 5 Bible Online

1 Tesalonicenses 5 - Yucateco bible

1 Tesalonicenses 5

¹Ba'ale' tu yóokol u ja'abilo'ob yéetel u kiinilo'obe', sucu'une'ex, ma' kabéet ca in dzíibt te'exi'.

²Te'exe' dzo'oc a wojéeltique'ex jach ma'alobe' u kiinil Yuumtzile' yaan u kuchul ti' le kiin ma' táan a pa'atique'exo', je'el bix u taal jun túul j ocol yéetel áakabe'.

³Le quéen u ya'al máaco'ob: Tuláacal jejedzquil yéetel ma'alob yanile', leti' le quéen téec taalac tu yóokolo'ob le xu'ulsajo'; ma' tu páajtal u púudzulo'ob.

⁴Ba'ale' te'exe' sucu'une'ex, ma' ich éekjoche'enil yane'exi' u ti'al ca téec taalac ta wóokole'ex u kiinil Yuumtzil je'el bix u téec taal jun túul j oocole'.

⁵Tumen tuláacale'exe' u ti'ale'ex le sáasilo' yéetel le kiino'. Ma' u ti'alo'on le áakabo' mix le éekjoche'enilo';

⁶le o'olale' ma' unaj c wenel je'el bix le u láako'obo', ba'ale' unaj c p'il ich yéetel u p'áatal jaba'an c óol.

⁷Le máaxo'ob cu wenelo'ob, yéetel áakab cu wenelo'ob; le máaxo'ob cu cáaltalo'obo' yéetel áakab cu cáaltalo'ob;

⁸ba'ale' to'on u ti'alo'on le kiino' unaj c p'áatal mantadz jaba'an c óol. Unaj c cananticbáa yéetel le ocsaj óolalo' yéetel bey xan yéetel le yaacunajo', je'el bix jun p'éel u chichich p'óoquil ba'atele'.

⁹Tumen Kue' ma' tu dzajo'on u ti'al c kamic le jaadzo', ba'ale' u ti'al ca yanac to'on tocsajil tu yo'olal c Yuumtzil Jesucristo.

¹⁰Jesucritoe' j quíim t o'olal u ti'al ca cuxlaco'on jun múuch' tu yéetel, quex cuxa'ano'on wa quex quimeno'on.

¹¹Le o'olale', líiks óolintaba'ex yéetel mu'uka'anquintaba'ex ta baatzile'ex, jach je'el bix táan a beetique'exo'.

¹²Sucu'une'ex, c káat óoltic te'ex ca tzique'ex le máaxo'ob cu meyajo'ob ichile'exo' yéetel cu nu'uctico'ob a beele'ex yéetel cu tzolico'ob a xiquine'ex ti' Yuumtzil.

¹³Unaj a wilque'exo'ob yéetel utz yéetel a yaabiltique'exo'ob ya'ab, tu yo'olal le meyaj cu beetico'obo'. Cuxlene'ex ich jéedzel ta baatzile'ex.

¹⁴Bey xan c kubentic te'ex, sucu'une'ex, ca a wa'ale'ex u nu'uc ti' le máaxo'ob ma' u káato'ob meyajo', ca líikse'ex u yóol le máaxo'ob lúubul u yóolo'obo' ca a wáante'ex le máaxo'ob luubul u muuko'obo' yéetel ca yanac te'ex chowac óolal yéetel tuláacal máac.

¹⁵Canantaba'ex mix jun túul ca u sut kaas tu yo'olal kaas. Ba'ax unaje', il a wil a beetique'ex utz mantadz ta baatzile'ex yéetel ti' tuláacal yóokolcaab.

¹⁶Mantadz qui'imacchajac a wóole'ex.

¹⁷Payalchi'inene'ex láaj kiin.

¹⁸Ti' tuláacal ba'ax ca úuchuque' dza'ex nib óolal ti' Ku, tumen lela' leti' ba'ax u káat Ku ti' te'exo' máaxe'ex a wocsmaj a wóole'ex ti' Cristo Jesús.

¹⁹Ma' a tupique'ex u káakil le Quili'ich Pixano'.

²⁰Ma' a p'ectique'ex le tze'eco'obo'.

²¹Il a wile'ex ma'alob tuláacal, p'áatene'ex yéetel le ba'ax ma'alobo'.

²²Tzelaba'ex ti' tuláacal ba'ax kaas.

²³Junab Kue' u Kuil jéedzel, leti' ca u quili'ichcunte'ex ta túulisile'ex yéetel ca u canant a pixane'ex, a wóole'ex yéetel a wíinclile'ex tu túulisil x ma' si'ipilil u ti'al le quéen taalac Yuumtzil Jesucristoe'.

²⁴Le máax t'anique'exo' chuca'an u yóol, leti' cun u dzo'ocbes tuláacal lela'.

²⁵Sucu'une'ex payalchi'inene'ex t o'olal.

²⁶Tziquil t'ante'ex tuláacal le sucu'uno'obo' yéetel jun p'éel quili'ich dzu'udz.

²⁷Quin kubentic te'ex, tu yo'olal Yuumtzile' ca a xoque'ex le ju'una' ti' tuláacal le sucu'uno'obo'.

²⁸U siibal c Yuumtzil Jesucristoe' ca yanac ta wéetele'ex.