Read Yucateco Josué 1 Bible Online

Josué 1 - Yucateco bible

Josué 1

¹Cu dzo'ocol u quíimil Moisés u palitzil Yuumtzile', j t'aanaj Yuumtzil yéetel Josué u paal Nun u aj yáantaj Moisese', ca tu ya'alaj ti':

²Bey dzo'oc u quíimil in palitzil Moiseso', bejela'e', teech bíin a ch'act u yáalcab ja'il Jordán yéetel tuláacal u caajil Israel, u ti'al a bine'ex te j lu'um bin in ca'aj in dzaj te'exo'.

³Je'el bix tin séeb chi'itilac ti' Moiseso', bíin in dzáa te'ex tuláacal le lu'um tu'ux bíin a pe'echakte'exo'.

⁴Bíin in dzáa te'ex le lu'um líikbal ti' le x tocoy lu'um yéetel u pu'uquilo'ob Líbano tac tu nojoch áalcab ja'il Éfrautes, yéetel xan tuláacal u lu'um le hititaob, tac te j nojoch ka'anabo'.

⁵Mix máac bíin dzáanche'etiquech tuláacal u kiinilo'ob a cuxtal, tene' bíin yanaquen ta wéetel je'el bix úuchic in wantal yéetel Moisese', ma' bíin in p'atechi', mix bíin in xunp'ajtech mix bikini'.

⁶Xiibil máacchajquech yéetel mu'uka'anchajquech, tumen teech bíin t'oxic le lu'um ti' le caajo', tumen leti' le kanba'albáil tin séeb chi'itaj ti' u máanja'an ch'i'ibalo'obo'.

⁷Chéen ba'ax quin káatic teche', ca j xiibil máacchajquech yéetel ca a dzáa a wóol, bey xan ca a dzo'ocbes tuláacal in wa'almaj t'aan tu dzaj teech in palitzil Moiseso'. Dzo'ocbes je'el bix láaj dzíibta'anilo', u ti'al ca xi'ic teech utzil ti' tuláacal ba'ax bíin a beete.

⁸Babal a'al mantadz tuláacal ba'ax cu ya'alic u ju'unil u ya'almaj t'aan Kuo', tucult ba'ax cu ya'alic bey yéetel kiin bey yéetel áakab, u ti'al a beetic mantadz kiin tuláacal ba'axo'ob cu ya'alic. Beyo' tuláacal ba'ax ca beetique', bíin xi'ic teech utzil.

⁹Teen quin wa'alic teech ca xibchajquech yéetel ca mu'uka'anchajquech. Ma' a ch'a'ic sajaquil mix u lúubul a wóol, tumen teen a Yuumtzil a Ku xane', ti' yanen ta wéetel je'el tu'ux bíin xi'iqueche'.

¹⁰Josué túune' tu tusbeltaj ti' u nuuquilo'ob le caaj beya':

¹¹Xeene'ex ichil tuláacal le tu'ux jelecbal le caajo', ca wa'ale'ex ti' tuláacal caaj ca beeta'ac janalo'ob u ti'al le bejo', tumen ichil óox p'éel kiine' bíin c ch'acte'ex u yáalcab ja'il Jordán u ti'al c jáanpaytique'ex le lu'um bíin u dzáa to'on Yuumtzil c Kuo'.

¹²Josuee' tu t'anaj xan u múuch' cajtalilo'ob Rubén yéetel Gad bey xan u táancoch ch'i'ibalo'ob Manasese', ca tu ya'alaj ti'ob:

¹³Ka'ajac te'ex ba'ax tu ya'alaj te'ex Moisés u palitzil Yuumtzil, le ca j t'aanaje': Yuumtzil a Kuexo' bin u ca'aj u dzaj te'ex le lu'um yaan waya' u ti'al u páajtal a je'elele'ex.

¹⁴P'áate'ex way a watane'exe', a paalale'ex bey xan a waalake'ex, ti' le lu'um tu dzaj te'ex Moisés way tu tzéel le Jordano'. Ba'ale' tuláacal le xiibo'ob nu'uca'ano'ob u ti'al j ba'atele', u ch'a'ob u nu'ucul u ba'atelo'obe' ca xi'ico'ob táanil ti' u láako'ob u ti'al ca u yáanto'ob,

¹⁵tac le kiin bíin u dzaa Yuumtzil ti'ob u cúuchil u je'elelo'ob je'el bix tu dzaj te'exo', ca xan u ti'alinto'ob le lu'um bíin dza'abac ti'ob tumen Yuumtzilo'. Cu dzo'ocole' te'exe' cu páajtal a suute'ex ta lu'ume'ex yaan tu lakin le u yáalcab ja'il Jordano', u ti'al ca a ti'alinte'ex jun puli' le lu'um tu dzaj te'ex Moisés u palitzil Kuo'.

¹⁶Leti'obe' tu núucajo'ob: Bíin c beet tuláacal ba'ax dzo'oc a tusbeltic to'on, bíin xi'ico'on tu'ux bíin a túuchi'ito'on.

¹⁷Mantadz bíin c u'uyaj t'aan teech je'el bix úuchic c u'uyaj t'antic Moiseso'. Chéen ba'ax c káatique', ca u láakintech Yuumtzil je'el bix úuchic u láakintic Moiseso'.

¹⁸Tuláacal máax ca táabac ma' u yu'ubaj t'antic ba'axo'ob bíin a wa'ale', yaan u quíimil. Chéen c káatic teech ca j xiibil máacchajquech yéetel ca mu'uka'anchajquech.