Read Yucateco Josué 10 Bible Online

Josué 10 - Yucateco bible

Josué 10

¹Adonicedec, u ajawil Jerusalene', sen ooc sajaquil ti' ca tu yojéeltaj dzo'oc u ch'a'abal yéetel dzo'oc u xu'ulsa'al u caajil Hai tumen Josué, cu dzo'ocole' tu beetaj ti' le ba'ax beeta'ab ti' Jericó yéetel u ajawile', tzicbalta'ab xan ti', dzo'oc u beetico'ob u t'aanil jéedzel le j gabaonitaob yéetel le j israelitaobo', let o'olal bejela'e' ti' cajacbalo'ob ichilo'obe'. Le u dzooc tzicbala' tu beetaj u sen sajactal, tumen Gabaone' jun p'éel nojoch caaj, tip'a'an nojochil ti' Hai, tumen u caajil ajawo'ob, cu dzo'ocole' le j gabaonitaobo' jach xiixib máaco'ob.

³Let o'olale' Adonicedeque' tu túuchi'itaj le t'aano'ob ti' Hoján u ajawil Hebrón, ti' Piream u ajawil Jarmut, ti' Jafia u ajawil Laquis, yéetel ti' Debir u ajaw Eglón:

⁴Co'otene'ex waye' ca a wáantene'ex c ba'atelt Gabaón, tumen dzo'oc u beetic jun p'éel nup t'aan yéetel Josué bey xan yéetel le j israelitaobo'.

⁵Bey túuno' le cinco ajawo'ob amorreob, u ajawilo'ob Jerusalén, Hebrón, Jarmut, Laquis yéetel Eglone', tu much'juba'obe', ca j tzóol bino'ob u múuch' ba'atelto'ob Gabaón.

⁶Ba'ale' le máaxo'ob cajnáalo'ob Gabaone' tu túuchi'itajo'ob le t'aan ti' Josué te tu'ux jelecbalo'ob Gilgalo': Ma' a p'atic x ma' áantajil a palitzilo'oba'. Co'otene'ex séeba'an a wáanto'one'ex tu yo'olal ma' c dzáanche'eta'al, tumen tuláacal le ajawo'ob cajnáalo'ob te j witzo'obo', dzo'oc u much'icuba'ob u ba'atelto'ono'ob.

⁷Josué túune' jóok Gilgal yéetel tuláacal u múuch' aj ba'atelo'ob j xiixib máaco'ob,

⁸Yuumtzile' tu ya'alaj ti': Ma' a ch'a'ic sajaquil tumen bin in ca'aj in láaj kubo'ob teech, mix jun túul bíin páatac u wa'atal j ba'atel ta táani.

⁹Josuee' jóok Gilgale' ca tu nadzajubáa tu yicnalo'ob yéetel áakabe' ca tu puljubáa tu yóokolo'ob ca'aliquil naayal u yóol le j amorreobo'.

¹⁰Yuumtzile' tu beetaj u sen ja'akal u yóolo'ob tu táan le j israelitaobo', ca j quíimsa'ab ya'ab ti'ob tu lu'umil Gabaón tumen Josué. Cu dzo'ocole' tu ch'a'apachtajo'ob tac tu beel Bet-jorone', ca j bin u quíims le j amorreob tac Azeca yéetel Maceda.

¹¹Le ca j éem le j amorreob tu níix lu'umil Bet-horone', ca'aliquil táan u púudzulo'ob ti' le j israelitaobo', Yuumtzile' tu beetaj u káaxal nucuch tuunich tu yóokolo'ob, ca tu quíimsaj máanja'an ya'abil amorreob ti' le quíimsa'ab tumen le j israelitaob yéetel u máascabo'ob.

¹²Le ca j ku'ub le j amorreob tu kab le j israelitaob tumen Yuumtzilo', Josuee' tu t'anaj Yuumtzil tu táan le caajo' ca tu ya'alaj: Kiin, wa'alen Gabaón; Luna, wa'alen tu táax lu'umil Ajalón.

¹³Le kiin yéetel le luna'o' ma' j péecnajo'ob tac dzo'oquic u sutico'ob le loob ti' le u aj p'eeco'obo'. Bey dzíibta'anil tu ju'unil aj ti'ibil bejo'. Le kiino' ma' péecnaj tu chúumuc le ca'ano', óoli' jun p'éel kiin ma' t'úubi'.

¹⁴Mix jo'oloj, mix bejela'a' yanac u láak kiin bey je'el bix le ca tu yu'ubaj Yuumtzil u t'aan jun túul máac, tumen Yuumtzile' cu ba'atel ca'ach tu yo'olal Israel.

¹⁵Cu dzo'ocole' Josué yéetel le j israelitaobo', j suunajo'ob Gilgal tu cúuchil u je'elelo'ob,

¹⁶le cinco ajawo'obo' j púudzo'obe' ca tu ta'acbesajuba'ob Maceda ti' jun p'éel áactun.

¹⁷Ba'ale' túuchi'ita'ab a'albil ti' Josué dzo'oc u nuptáanta'al le cinco ajawo'ob u ta'acbesmajuba'ob Maceda ti' jun p'éel u áactunil.

¹⁸Josué túune' tu túuchi'itaj a'albil beya': Balkese'ex tuunicho'ob tu jool le áactuno' u ti'al a maquique'ex, dza'ex xan máaco'ob tu jool u ti'al canantic.

¹⁹Ba'ale' te'exe' ma' a p'áatale'ex waye'. Xeene'ex tu paach le aj p'eeco'obo' pulaba'ex paachil ti'ob. Ma' a p'atique'ex u suuto'ob tu caajalo'ob, tumen Yuumtzil a Kuexe' dzo'oc u kubic ta kabe'ex.

²⁰Cu dzo'ocol u láaj pa'abal u muuko'ob le j amorreob tumen le j israelitaobo', tumen quíimsa'abo'ob ya'ab ti'obi', le amorreob p'áato'ob cuxa'ano'obo' tu ta'acbesajuba'ob tu caajalo'ob.

²¹Ba'ale' le j israelitaobo' j suunajo'ob Maceda toj u yóolo'ob yéetel cuxa'ano'ob tu cúuchil tu'ux cu je'elelo'ob, tu'ux yaan Josué. Mix máac cu táabal u ya'al mix ba'al kaas ti' le j israelitaobo'.

²²Josué túune' tu ya'alaj: Lukese'ex u maac le áactuno', jóokese'ex le cinco ajawo'obo'.

²³Le j israelitaobo' tu beetajo'ob beyo' ca tu jóokeso'ob u ajawilo'ob Jerusalén, Hebrón, Jarmut, Laquis yéetel Eglón.

²⁴Le ca j taasa'abo'ob tu táan Josuee', leti'e' tu t'anaj tuláacal u j xiibilo'ob Israel, ca tu ya'alaj ti' u nuuquilo'ob le aj ba'atelo'ob yano'ob tu yicnalo': Nadzaba'exe' ca a dza'ex a wooque'ex tu ko'ocho'ob le ajawo'oba'. Leti'obe' tu beetajo'ob beyo',

²⁵Josué túune' tu ya'alaj ti'ob: ma' a ch'a'ique'ex sajaquil mix u lúubul a wóole'ex; ba'ale' xiixib máacchajaque'ex mu'uka'anchajaque'ex xan, tumen bey bíin u beet Yuumtzil yéetel tuláacal a aj p'eequexo'obo'.

²⁶Cu dzo'ocole' josuee', tu quíimsaj le ajawo'obo' ca tu beetaj u ch'uyquinta'al tu jujun túulil ti' junjun cúul che', ca j p'a'ato'ob bey tac tu yocbal kiino'.

²⁷Le ca jo'op' u t'úubul kiine', Josuee' tu túuchi'itaj éemsbilo'ob ti' le che'obo' u ti'al ca pu'uluco'ob ichil le áactun tu'ux tu ta'acbesajuba'ob ca'acho'. Cu dzo'ocole' j ma'ac u jool le áactun yéetel dze'edzec nucuch tuunicho'obo', ti'ili' yano'ob tac bejela'e'.

²⁸Ti' le kiino' Josuee', tu ch'a'aj u caajil Macedae' ca tu jach xu'ulsaj; tu láaj quíimsaj ch'acbil yéetel máascab tuláacal máaxo'ob cajnáalo'obi', ma' tu p'ataj cuxa'an mix máaqui'. Tu beetaj ti' u ajawil Maceda le ba'ax tu beetaj ti' u ajawil Jericoe'.

²⁹Te'elo', Josué yéetel le j israelitaobo' j bino'ob tu caajil Libnae' ca tu puljuba'ob tu yóokol.

³⁰Yuumtzile' tu kubaj xan ti'ob le caajo' yéetel u ajawil. Ma' j p'áat mix ba'al yéetel ma' j p'áat mix máac cuxa'ani', tu beetaj ti' u ajawil Libna le ba'ax tu beetaj ti' u ajawil Jericoe'.

³¹Cu dzo'ocole' Josuee', jóoko'ob tu caajil Libnae' ca j bino'ob tu caajil Laquis, ca j je'elo'ob actáan ti' le caajo', ca tu pulajuba'ob tu yóokol.

³²Tu ca'a p'éel kiine', Yuumtzile' tu kubaj Laquis ti' je'el bix Libnae', le j israelitaobo' tu quíimsajo'ob ch'acbil yéetel máascab tuláacal le máaco'ob yéetel le ba'alche'ob cajnáalo'ob te'elo'.

³³Horán, u ajawil Gezere', jóok yéetel u múuch' aj ba'atelo'ob u yáant Laquis, Ba'ale' dzáanche'eta'ab tumen Josué, ma' j p'áat mix máac cuxa'ani'.

³⁴Cu dzo'ocol u ch'a'ic u caajil Laquise', Josué yéetel le j israelitaobo', j bino'ob tu caajil Eglone', je'elo'ob tu táan ca tu pulajuba'ob tu yóokol.

³⁵La'ili' ti' le kiino' tu ch'a'ajo'ob, tu quíimsajo'ob ch'acbil yéetel máascab tuláacal le máaxo'ob cajnáalo'obi', tu jach xu'ulsajo'ob je'el bix tu beetilaco'ob yéetel Laquis.

³⁶Le ca j luko'ob Eglone' j bino'ob tu caajil Hebrón, ca tu puljuba'ob tu yóokol.

³⁷Le ca tu ch'a'ajo'obe' tu jach xu'ulsajo'ob tu jaajil, tu quíimsajo'ob ch'acbil yéetel máascab u ajawil bey xan tuláacal le máaco'ob yéetel ba'alche'ob cajnáalo'obo', bey xan le yano'ob ti' le mejen caajo'ob yaan tu tzéelo'ob je'el bix tu beetajil ti' Eglono'.

³⁸Le ca jóoko'ob te'elo', Josué yéetel le j israelitaobo' j bino'ob tu caajil Debire' ca tu pulajuba'ob tu yóokol,

³⁹ca tu quíimsajo'ob ch'acbil yéetel máascab u ajawil bey xan u cajnáalilo'ob le mejen caajo'ob yaan tu tzéelo'obo'. Mix jun túul u cajnáalil Debir j p'áat cuxa'an; láaj xu'ulsa'abo'ob je'el bix beeta'abic ti' Hebrón, ti' Libna bey xan ti' u ajawilo'ob.

⁴⁰Bey túuno' Josuee' tu ch'a'aj tuláacal le lu'umo'. Tu dzáanche'etaj u ajawo'ob le witzo'obo', le Néguevo', le táax lu'umo'obo' bey xan le níixcab lu'umo'obo'. Tu láaj xu'ulsa'ajo'ob, tu láaj quíimsajo'ob; ma' tu p'ataj mix ba'ali' mix tu p'ataj mix máac cuxa'ani', tu beetaj je'el bix a'ala'abic ti' tumen Yuumtzil u Kuil Israele'.

⁴¹Jun páaquil tu jáanpaytajilac tuláacal le lu'umo'ob yaan u chúumuc Cades-barnea yéetel Gaza, bey xan tu lu'umil Gosén tac tu caajil Gabaón, tumen Yuumtzil u Kuil Israele', ba'atelnaj tu tzéel le j israelitaobo'.

⁴²

⁴³Cu dzo'ocole' Josué yéetel le j israelitaobo' j suunajo'ob tu cúuchil u je'elelo'ob yaan Gilgalo'.