Read Yucateco Josué 11 Bible Online

Josué 11 - Yucateco bible

Josué 11

¹Le ca tu yojéeltaj Jabín u ajawil Hazor tuláacal le ba'alo'oba', tu túuchi'itaj aj bisaj t'aano'ob u ti'al u beetic kax t'aan yéetel Jobab u ajawil Madón, bey xan yéetel u ajawilo'ob Simrom yéetel Acsaf,

²bey xan yéetel tuláacal le ajawo'ob yano'ob tu witzilo'ob j xamano', tu táax lu'umil Jordán yaan tu noojol u xéel ja'il Cineret, tu kóom lu'umil yéetel le cúuchilo'ob yaan naadz ti' Dor yaan j chikino',

³yéetel le j cananeob yano'ob j chikin yéetel j lakino', yéetel j amorreob, le j ititaob, le j ferezeob, le j jebuseob yano'ob te j witzo'ob bey xan le j heveob yano'ob tu witzilo'ob Hermón tu tojil Mizpao'.

⁴Tuláacal le ajawo'oba' jóoko'ob yéetel u múuch' aj ba'atelo'ob, bey xan sen ya'ab tzíimino'ob yéetel u bolanilo'ob ba'atel. Mina'an ca'ach u xooquil sen ya'abilo'ob je'el bix u sa'am lu'umil ka'anabe'.

⁵Tuláacalo'ob tu beetajo'ob jun p'éel kax t'aan, ca j much'lajo'ob tu jáal u ja'ilo'ob Merón, u ti'al ca u puluba'ob tu yóokol le j israelitaobo'.

⁶Ba'ale' Yuumtzile' tu ya'alaj ti' Josué: Ma' a ch'a'ique'ex sajaquil, tumen walquil sáamala', bíin in beet u láaj lúubulo'ob quimeno'ob ta táane'ex. Teech túune', láaj ca'aca'ach u yooc u tziimino'ob, tóoc xan u bolanilo'ob u ba'atelo'ob.

⁷Josué yéetel u aj ba'atelo'ob túune', tu puljuba'ob tu yóokolo'ob ca'aliquil naayal u yóolo'ob tu jáal u ja'ilo'ob Merón,

⁸Yuumtzil xane' tu beetaj u dzáanche'eta'alo'ob tumen le j israelitaobo', tu pulajuba'ob tu yóokolo'obe' ca tu ch'a'apachtajo'ob tac tu nojoch caajil Sidón yéetel Misrefot-maim, bey xan j lakin tac tu táax lu'umil Mizpa. Mix jun túul ti'ob j p'áat wa'atal cuxa'anil.

⁹Josue' tu dzo'ocbesaj le ba'ax a'ala'ab ti' tumen Yuumtzilo', tumen tu láaj ca'acachaj u yooc u tziimino'ob le aj p'eeco'obo', tu tóocaj xan u bolanilo'ob u ba'atelo'ob.

¹⁰Cu dzo'ocole' j suunaje' ca tu ch'a'aj u caajil Azor, u cúuchil le kax t'aano', ca tu quíimsaj u ajaw

¹¹bey xan tuláacal le máaxo'ob caja'ano'obo'. Tu láaj xiixcuntaj ca tu tóocaj le caajo'.

¹²Bey tu láaj beetilac yéetel u caajilo'ob le kax t'aano': tu ch'a'aláantajo'obe' ca tu quíimsaj u ajawilo'obe', ca tu láaj xiixcuntajo'ob jun puli' je'el bix tu túuchi'itajil Moisés u palitzil Yuumtzile'.

¹³Ba'ale' le j israelitaobo' ma' tu tóocajo'ob mix jun p'éel ti' le caajo'ob yano'ob ti' le jo'ol lu'umo'obo', chéen Azor tu tóocajo'ob.

¹⁴Tu quíimsajo'ob yéetel u yej máascab tuláacal le máaxo'ob cajnáalo'ob ti' le caajo'obo', ma' tu p'atajo'ob mix máac cuxa'ani', tu ch'a'ajo'ob xan tuláacal le ba'alche'ob yéetel le ba'axo'ob yano'obo'.

¹⁵Yuumtzile' tu ya'alaj ca'ach ti' Moisés ba'ax unaj u beeta'al, Moisés xane' tu ya'alaj ti' josué, leti'e' tu láaj dzo'ocbesaj, ma' j máan yóokol mix jun p'éeli'.

¹⁶Josuee', tu jáanpaytaj tuláacal le cúuchilo', u káat u ya'ale' leti' le witzo'obo', tuláacal Néguev, tuláacal u lu'umil Gosén, u táax lu'umil yéetel u kóom táax lu'umil Jordán, bey xan tuláacal u táax lu'umilo'ob yéetel u witzilo'ob Israel.

¹⁷Líikbal tu witzil Halac, cu líikil tu tojil Seire', tac Baal-gad, le yaan tu táax lu'umilo'ob Líbano', tu chuun u witzil Hermón, Josuee' tu machaj yéetel tu láaj quíimsaj u ajawilo'ob le cúuchilo'obo',

¹⁸ya'ab kiino'ob ba'atelnajo'ob yéetelo'ob.

¹⁹Chéen yéetel ba'ax caajil tu beetaj nup t'aan le j israelitaobo', leti' le j heveob Gabaonitaobo'. Tuláacal u láak caajo'obo', jáanpaytbil beeta'abico'ob,

²⁰tumen Yuumtzile' tu beetaj u pechicubáa le aj p'eeco'ob tu táan le j israelitaobo', tu yo'olal ca xu'ulsaco'ob j ma' ch'a'ab óotzilil ti'ob tumen le j israelitaob je'el bix tu ya'alajil Yuumtzil ti' Moiseso'.

²¹Ti' le kiino'ob xano', Josuee', tu jáanpaytaj yéetel tu láaj xu'ulsaj u caajilo'ob le j anaquitaob j cajnáalo'ob tu witzil Hebrón, Debir, Anab yéetel tuláacal u witzilo'ob Judá yéetel Israel,

²²ma' j p'áat mix jun túul u ch'i'ibal Anac tu lu'umil Israeli'. Chéen tu'ux j p'áat u ch'i'ibalo'ob Anaque', Gaza, Gad yéetel Asdod.

²³Bey túuno', Josuee' tu láaj jáanpaytaj le lu'umo', je'el bix a'ala'abic tumen Yuumtzil ti' Moisese'. Cu dzo'ocole' u t'oxaj ichil u ch'i'ibalo'ob Israel, ca u ti'alinto'ob. Cu dzo'ocol tuláacal lelo' yanchaj jéedzel ti' le cúuchilo'.