Read Yucateco Josué 13 Bible Online

Josué 13 - Yucateco bible

Josué 13

¹Cu dzo'ocol u sen nuxibtal Josuee', j a'ala'ab ti' tumen Yuumtzil: Teche' dzo'oc u sen ch'íijil, ba'ale' ya'ab lu'um cu bineltic a ch'a'ique'exo'.

²Táan u bineltic a ch'a'ique'ex u lu'umo'ob le filisteob yéetel le gesureobo',

³cu chúunul tu yáalcab ja'il Sihor tu lakin Egipto, tac tu'ux cu xu'ulul Ecrón, te j xamano' cu tuculta'al u lu'um j cananeob; te'elo' yaan cinco u nuuquil filisteobi', lelo'obo' u nuuquilo'ob u caajil Gaza, u caajil Asdod, u caajil Ascalón, u caajil Gad yéetel Ecrón. P'áatal xan u lu'um le aveobo',

⁴j xamane', tuláacal u lu'um le j cananeobo', cu chúunul tu caajal le j sidoniobo', tac Afec, tu'ux cu xu'ulul u lu'um j amorreob.

⁵P'aatal xan u lu'um le j giblitaobo', bey xan tuláacal Líbano yaan j lakino', cu chúunul Baal-gad, tu chuun u witzil Hermón, tac u yoocbal Hamat.

⁶Bin in ca'aj in tzel tu táan le j israelitaob le j sidonilo'obo', yéetel tuláacal le cajnáalo'ob te j pu'uco'obo', cu chúunul Libanoe' tac Misrefot-maim. Teche' il a dzáic le lu'um u ti'alint le j israelitaob je'el bix tin wa'alaj techo'.

⁷T'ox le lu'um ti' le nueve múuch' cajtalilo'ob otochnáalilo'obo' yéetel ti' u táancoch ch'i'ibalo'ob Manasés.

⁸U ch'i'ibalo'ob Rubén, Gad yéetel táancoch u ch'i'ibalo'ob Manasese' tu kamajo'ob u t'ooxilo'ob le ca j dzaab ti'ob tumen Moisés le lu'um yaan tu lakin le Jordano'.

⁹Ti' leti'obe' j dzaab le cu chúunul Aroer tu jáal u yáalcab ja'il Arnón, yéetel le caaj yaan tu chúumuc le kóom táax lu'umo', bey xan tuláacal u táax u jo'ol pu'uquil le Medebao', tac Dibón,

¹⁰pa'ate' yéetel tuláacal u caajalo'ob ajaw Sehón amorreo Hesbón, tac tu'ux cu xu'ulul u lu'um amonitaob.

¹¹Dzaab xan ti'ob Galaad u lu'umo'ob le gesureob yéetel u lu'umo'ob le maacateob, u witzil Hermón yéetel tuláacal u lu'umil Basán tac Salca,

¹²t'o'ox ti'ob u lu'umo'ob Og u ajawil Basán máax méektáantmail ca'ach Astarot yéetel Edrei, leti' ca'ach u dzooc le j refaitaob, le máaxo'ob j pa'ab u muuko'ob tumen Moiseso', ca j tze'elo'ob te j cúuchilo'.

¹³Le yano'ob Gesur yéetel Maacao' ma' tze'elo'obi', leti'obe' j p'áato'ob cajtal ichil le j israelitaob tac bejela'e'.

¹⁴Ti' u ch'i'ibalo'ob Levie', ma' j dzaab lu'um u ti'alinto'ob tumen Moisesi', tumen ti' leti'ob bíin dza'abac le ti'ibil óolalo'ob cu tóoca'alo'ob tu nojbe'enil Yuumtzil u Ku Israel je'el bix u ya'almajil leti'o'.

¹⁵Moisese' tu t'oxaj le lu'umo'ob ti' u ch'i'ibalo'ob Rubén ti' u jujun p'éelil u cajtal le otochnáalo'ob,

¹⁶bey túuno' u lu'umo'obe' chúunbal Aroer, tu jáal u yáalcab ja'il Arnón, bey xan le caaj yaan tu chúumuc le kóom táax lu'um, yéetel yóokol tuláacal u táax jo'ol lu'umil Medeba,

¹⁷tac Hesbón yéetel tuláacal u caajilo'ob le táax jo'ol lu'umo': Dibón, Bamot-baal, Bet-baal-meón,

¹⁸Jahaza, Cademot, Mefat,

¹⁹Quiriataim, Sibma, Zaret-sahar, yaan tu jo'ol lu'umil le kóom táax lu'umo',

²⁰Bet-peor, Beb-jesimot yéetel u tzéelilo'ob u witzil Pisga,

²¹u káat u ya'ale' le caajo'ob yaan tu táax lu'umil le jo'ol lu'umo' yéetel tuláacal u lu'umo'ob Sehón u ajawil le j amorreob, le Hesbón. Bey xan u nuuquilo'ob Madián le máaxo'ob meyajtic ca'acho': Evi, Requem, Zur, Jur yéetel Reba.

²²Le j israelitaobo' tu quíimsajo'ob xan Balaam, le aj wáay, u paal Beor, yéetel u láak ya'abcach máaco'ob.

²³U lu'umo'ob u múuch' cajtalil u yotochnáalo'ob Rubén le j t'oxa'ab ti'ob tu jujun p'éelil u caajil u yotochnáalo'obe', láaj dzaab ti'ob le caajo'ob yéetel u péet caajilo'ob, tac u kuchbal Jordán.

²⁴Bey xan u múuch' u cajtalil u yotochnáalo'ob Gade', j t'o'ox u lu'umo'ob tumen Moisés le buca'aj u ch'i'ibalo'obe'.

²⁵Ti' leti'obe' j dzaab Jazer yéetel tuláacal u caajilo'ob Galaad, bey xan táancoch u lu'umil j amonitaob tac tu caajil Aroer cu p'áatal actáan ti' Rabá,

²⁶bey xan le lu'um yaan tu chúumuc Hesbón, Ramat-mispa bey xan Betomim yéetel tu'ux cu xu'ulul u lu'umil Debir.

²⁷Te j kóom táax lu'umo', j dzaab ti'ob Bet-aram, Sucot yéetel Zafón, chéen le lu'um p'aatal ca'ach ti' Sehón u ajawil Hesbón. Bey túuno' u lu'umo'obe' cu cáajal j lakin tu jáal u yáalcab ja'il Jordán tac j noojol tu'ux cu xu'ulul u xéel ja'il Cineret.

²⁸Lelo'oba' leti' le caajo'ob pa'ate' yéetel u x péet caajilo'ob dzaab ti' u múuch' cajtalil u yotochnáalo'ob Gad tu jujun p'éelil u caajil u yotochnáalo'ob.

²⁹Bey xan ti' u táancoch ch'i'ibalo'ob Manasese' j t'o'ox ti'ob tumen Moisés ti' u jujun p'éelil u caajil u yotochnáalo'ob.

³⁰T'o'ox ti'ob tuláacal le lu'um u ti'al ca'ach Og u ajawil Basán, u káat u ya'ale', tuláacal Basán cu chúunul Mahanaim, pa'ate' yéetel u sesenta mejen caajilo'ob méektáanta'ano'ob ca'ach tumen Jair,

³¹táancoch u lu'umil Galaad, bey xan u caajilo'ob Astarot yéetel Edrei. Tuláacal lela' j dzaab ti' u táancoch ch'i'ibal Maquir, u paal Manasés, ti' u jujun p'éelil u cajtalil u yotochnáalo'ob.

³²Le lu'umo'oba' leti' j dzaab ti'ob tumen Moisés u ti'alinto'ob tu táax lu'umilo'ob Moab, tu lakin u yáalcab ja'il Jordán actáan ti' Jericó.

³³Ba'ale' ti' u ch'i'ibalo'ob Levie' ma' tu t'oxaj lu'um u ti'alinto'obi', tumen tu ya'alaj ti'ob: Yuumtzil u Kuil Israele' leti' ba'al a ti'ale'ex.