Read Yucateco Josué 14 Bible Online

Josué 14 - Yucateco bible

Josué 14

¹Lelo'oba' leti' le u lu'umilo'ob Canaán tu kamajo'ob le j israelitaob u ti'alinto'ob je'el bix t'o'oxic ti'ob tumen aj kiin Eleazar, Josué yéetel u nuuquilo'ob u yotochnáalilo'ob u múuch' cajtalilo'ob j Israel.

²Le lu'umo'obo' j t'oxo'ob yéetel buul ichil le nueve ca tac táancoch u múuch' cajtalil le otochnáalo'ob, je'el bix tu ya'alajilac Yuumtzil ti' Moisés ca u beete'.

³Moisese' dzo'oquili' u dzáic lu'um tu táanxel tzéelil Jordán ti' u múuch' cajtalilo'ob u yotochnáalo'ob Rubén, Gad yéetel táancoch u ch'i'ibalo'ob Manasés; ba'ale' ti' le j levitaobo' ma' tu dzaj lu'umo'obi'.

⁴U ch'i'ilancab Josee', yaan ca'ach ca'a ch'i'ibalo'ob, Manasés yéetel Efraín, Ba'ale' ti' le j levitaobo' ma' dzaab mix jun xéet' lu'umi', chéen j dzaab caajo'ob u ti'al u cajtalo'ob yéetel káaxo'ob u ti'al u tzéenta'al wacax yéetel j tamano'ob.

⁵Le j israelitaobo' tu t'oxla'anto'ob le lu'umo'ob jach je'el bix tu nu'uctilac Yuumtzil ti' Moiseso'.

⁶U ch'i'ilancab Judae' j bino'ob Gilgal j t'aan yéetel Josué, Caleb j cenezeo u paal Jefone', ca tu ya'alaj ti' Josué: Ka'ajac teech ba'ax tu ya'alaj Yuumtzil ti' u palitzil Moisés Cades-barnea, ta wo'olal yéetel tin wo'olal.

⁷Tene' yaan ca'ach cuarenta ja'abo'ob ca tu túuchi'itajen Moisés líikbal Cades-barnea in xakalt il le cúuchilo', le ca suunajen túune' tin wa'alaj jach u jaajil ba'ax tin wilaje'.

⁸Le máaxo'ob j bino'ob tin wéetelo', tu ja'asajo'ob u yóolo'ob le máaco'obo', ba'ale' tene' ma' tin kéex óoltaj Ku in Yuumtzili'.

⁹Moisés túune' tu jalach t'antajen: Le lu'um tu'ux jéedz a woco', bíin a ti'alint tuláacal ja'abo'ob yéetel a ch'i'ibalo'ob, tumen teche', j chúucpaj a wóol ti' u t'aan Ku in Yuumtzil.

¹⁰Dzo'oc u máan cuarenta yéetel cinco ja'abo'ob u ya'al Yuumtzil bey ti' Moiseso', le ca'aliquil táan u máano'ob le j israelitaob te x tocoy lu'umo', tumen je'el bix tu séeb chi'itilac Yuumtzilo', tu p'ataj cuxa'anen. Bejela'e' yaan teen ochenta yéetel cinco ja'abo'ob,

¹¹Ba'ale' la'ili' mu'uka'anen je'el bix ca tu túuxtajen Moisés in xakalt il le lu'umo', je'el u páajtal in máane' je'el xan u páajtal in ba'atel je'el bix ca'acho'.

¹²Let o'olal quin káatic teech ca a dzáa teen u lu'umilo'ob le witzo'ob je'el bix tu séeb chi'itilac teen Yuumtzilo'. Teche' a wojel ti'ili' cajnáalo'ob u ch'i'ibal wa'apáach' Anac te'elo', yaan xan nucuch caajo'ob kala'antac yéetel u tuulumilo'ob. Ba'ale' tene' quin alab óoltic Yuumtzil, bíin u láakinten, bíin xan u yáanten in tzelo'ob je'el bix u ya'almajilo'.

¹³Josué túune' tu qui' t'antaj Caleb, ca tu dzaj Hebrón u ti'alint leti' yéetel u ch'i'ibalo'ob.

¹⁴Bey úuchic u p'áatal Hebrón u ti'alint Caleb yéetel u ch'i'ibalo'ob, u ti'alo'ob tac bejela'e', tumen Calebe' ma' tu kéex óoltaj Yuumtzil u Kuil Israeli'.

¹⁵U yúuchben kaaba' Hebrone', Quiriat-arbá ca'achi, tumen Arba ca'ache' jun túul u ch'i'ibal wa'apáach' Anac. Cu dzo'ocol lelo' yanchaj jéedzel tu lu'umil Israel.