Read Yucateco Josué 16 Bible Online

Josué 16 - Yucateco bible

Josué 16

¹Le lu'umo'ob dzaabo'ob ich buul ti' u ch'i'ibalo'ob Josee', cu chúunul ca'ach j lakin tu yáalcab ja'il Jordán, tu tojil u sayabilo'ob Jericó, te'elo' cu jaytal x tocoy lu'um, cu ch'actic tuláacal u chowaquil le pu'uco'ob cu bin Jericó tu tojil Betel.

²Cu jóokol Betel, le cu kaaba'intic xan Sáasil, cu ch'actic u lu'umo'ob le j arquitaobo' cu kuchul tac Astarot,

³cu dzo'ocole' cu jaytal tu chikin u lu'umo'ob le jafletaob, tac u kuchbal tu xuul Bet-horón yaan caabalo', cu kuchul tac Gezer. Te'elo' cu jóokol ca'ach tac tu ka'anabil Mediterráneo.

⁴Le lu'umo'ob tu kamajo'ob u ch'i'ibalo'ob Manasés yéetel Efraín u ch'i'ibalo'ob Joseo', leti' le je'elo'oba':

⁵U xuul u lu'umilo'ob u ch'i'ibalo'ob, Efraine' cu jaytal tu lakin Atarot-adare' cu kuchul tac Bet-horón yaan ca'analo'.

⁶Te'elo' cu jaytal tac u ka'anabil Mediterráneo. U xuul tu'ux cu náacal u lu'umo'ob Micmetat, te'elo' u xuul le lu'umo'obo' cu ch'a'ic u tojil j lakine' cu kuchul tac Taanat-siloe' cu ch'aacat Janoa

⁷cu yéemel Atarot yéetel Naarat, cu cóojol Jericoe' cu jóokol tac tu yáalcab ja'il Jordán.

⁸Tapuae' u jáal u xuul le lu'um cu jayicubáa j chikine' tac u kuchbal tu t'o'ol ja'il Caná yéetel u ka'anabil Mediterráneo. Le lu'umo'oba' leti' j dzaab ti'ob u ch'i'ibalo'ob Efráin, j t'o'ox ti' u jujun p'éelil u ch'i'ibalo'ob.

⁹Yanchaj xan jujun p'éel caajo'ob yéetel x péet caajo'ob ich u lu'umo'ob u ch'i'ibalo'ob Manasés j dzaab ti' Efraín.

¹⁰Ba'ale' u ch'i'ibalo'ob Efraine' ma' tu jóokeso'ob Gezer le j cananeob cajnáalo'obo', ba'ale' tu cha'ajo'ob u cajtal ichilo'ob quex tumen tu beetajo'ob u bo'otico'ob patan. Tac bejela'a' cajnáal le j cananeob ichilo'obe'.