Read Yucateco Josué 17 Bible Online

Josué 17 - Yucateco bible

Josué 17

¹Lelo'oba' leti' le lu'umo'ob j dzaab ti' u ch'i'ibalo'ob Manasés u yáax paal José. Ti' Maquir jun túul aj ba'atel máac, u yáax paal Manasés u taata Galaade', j dzaab u lu'umilo'ob Galaad yéetel Basán tu lakin Jordán.

²Beeta'ab xan u buulil le lu'umo'ob bíin dza'abac ti' u jujun p'éelil u cajtalil u yotochnáalo'ob u chuucáan u paalal Manasés: ti' Abiezer, ti' Helec, ti' Asrier, ti' Siquem, ti' Hefer yéetel Semida, u paalalo'ob Manasés u yáabilo'ob José.

³Ba'ale' Zelofejad, u paal Efer u yáabil Galaad, u paal Maquir u yáabil Manasese', ma' j yanchaj mix jun túul u j xibil paali', chéen j yanchaj cinco u x ch'upul paalal tu kaaba'intajo'ob Maala, Noa, Hogla, Milca yéetel Tirsa.

⁴Leti'obe' j bino'ob u yilo'ob aj kiin Eleasar yéetel Josué bey xan u nuuquilo'ob le caajo' ca tu ya'alajo'ob ti'ob: Yuumtzile' tu ya'alaj ti' Moisés ca u dzaa to'on lu'umo'ob, je'el bix ti' c láako'obe'. Josué túune' tu dzaj lu'um ti'ob je'el bix ti' u láaktzil u taataob je'el bix tu ya'alajilac Yuumtzile'.

⁵Bey túuno' u ch'i'ibalo'ob Manasese' tu kamajo'ob diez u xéet'elo'ob lu'um, cu dzo'ocole' tu kamajo'ob xan u lu'umilo'ob Galaad yéetel Basán yaan tu lakin Jordano',

⁶tumen u x ch'upul paalal Manasese' j dzaab lu'umo'ob ti'ob je'el bix dza'abic ti' u j xiibilo'obe'. Galaade' j dzaab ti' u láak jun jaatz u paalal Manasés.

⁷U lu'umo'ob u ch'i'ibalo'ob Manasese' cu jaytal Asere' tac Micmetat, yaan actáan ti' Siquem, cu bin tu noojol tac actáan ti' Tapúa.

⁸Quex tumen u lu'umilo'ob Tapúa u ti'al u ch'i'ibalo'ob Manasese', u caajil Tapúa le yaan tu xuul u lu'um Manaseso', u ti'al Efraín.

⁹Cu dzo'ocole' u xuul u jáal le lu'umo' cu yéemel j noojol tac tu t'o'ol ja'il Caná, let o'olal u caajilo'ob Efraino' ti' yaan ichil u caajilo'ob Manasés quex tumen u xuul le t'o'ol ja' u ti'al Manasés pa'ate' yéetel tu'ux cu xu'ulul le ka'anabo'.

¹⁰Efraine' ti' yaan ca'ach tu noojol le t'o'ol ja'o', Manasese' ti' yaan j xamane', u xuul u lu'ume' cu kuchul tu jáal u ka'anabil Mediterráneo, j xamane' cu xu'ulul tu jáal u lu'umo'ob Aser, j lakine' tu jáal u lu'um Isacar.

¹¹J dzaab xan ti' Manasés le caajo'ob yaan tu lu'umo'ob Isacar yéetel Aser, pa'ate' yéetel u nadza'an x péet caajilo'ob; Bet-seán, Ibleam, Dor, Endor, Taanac yéetel Meguido, bey xan le óox jo'ol lu'umo'ob.

¹²Ba'ale' u ch'i'ibalo'ob Manasese', ma' páatchaj u ch'a'ico'ob le caajo'obo', tumen le j cananeobo' tu pechajuba'obe' ca j p'áato'obi'.

¹³Ba'ale' le ca tu ch'a'ajo'ob muuk le j israelitaobo' tu beetajo'ob u bo'ota'al patan ti'ob tumen le j cananeobo', ba'ale', ma' tu jóokesajo'ob te'elo'.

¹⁴U ch'i'ibalo'ob Josee' tu ya'alajo'ob ti' Josué: ¿Ba'axten chéen jun p'éel u buulil lu'um ta dzaj to'on, to'on xane' ya'abo'on dzo'oc xan u qui' t'antico'on Yuumtzil?

¹⁵Josué tu núucaj: Bey tumen sen ya'abe'ex ma' tu yantal tu'ux a cajtale'ex tu pu'uquilo'ob Efraino', xeene'ex a cole'ex le káaxo'ob yaan tu lu'umo'ob le ferezeob yéetel le refaitaobo'.

¹⁶Leti'obe' tu ya'alajo'ob: Tu jaajile' le pu'uco'oba' ma' chuca'an c ti'ali'. Ba'ale' le j cananeob cajnáalo'ob ti' le táax lu'umo'obo', yaan u bolano'ob fierro u ca'ajo'ob, je'el bix le cajnáalo'ob Betseán yéetel u x péet caajilo'obo' bey xan le cajnáalo'ob tu táax kóom lu'umil Jezreelo'.

¹⁷Josué túune' tu núucaj ti' u ch'i'ibalo'ob José u ch'i'ibalo'ob Efraín yéetel Manasés: Te'exe' ya'abe'ex yéetel mu'uka'ane'ex, ma' tu dzáic te'ex chéen yéetel jun jaatz le lu'umo'obo',

¹⁸ba'ale' tuláacal le pu'uc bala'an tumen le káaxo'obo' bíin a ti'alinte'ex xan, bíin cajlaque'exi'. Te'ex bíin a tzele'exo'obi quex tumen mu'uka'ano'ob yéetel yaan u bolano'ob fierro u ca'ajo'ob.