Read Yucateco Josué 18 Bible Online

Josué 18 - Yucateco bible

Josué 18

¹Tuláacal u caajil le j israelitaobo' j much'lajo'ob Silo, u ti'al u t'ino'ob u noj Paselil u yúuchul much'tal yéetel Ku. Dzo'oc ca'ach u jáanpayta'al le lu'umo'ob ti' le kiino'obo',

²quex tumen yaan siete u ch'i'ibalo'ob le j israelitaob ma' dza'abac u lu'umo'ob ca'achi'.

³Josué túune' tu ya'alaj ti' le j israelitaobo': ¿Ba'ax ca pa'atique'ex u ti'al a ch'a'ique'ex le lu'umo'ob tu dzaj te'ex Yuumtzil u Ku a máanja'an ch'i'ibale'exo'?

⁴Yéeye'ex óox túul j xiibo'ob ti' tu jujun p'éelil a u múuch' cajtalilo'ob a wotochnáale'ex u ti'al in túuxto'ob u xíimbalto'ob le cúuchilo', u ti'al ca u taaso'ob teen u t'aanil bix unaj u t'o'oxol.

⁵Le j xiibo'oba' unaj u jóokesico'ob siete xéet'elo'ob ti' le lu'umo'obo', ca u p'ato'ob j noojol u lu'umo'ob Judá yéetel j xaman u lu'umo'ob u ch'i'ibal José.

⁶Cu dzo'ocol u jatzico'ob siete xéet'elilo'ob le lu'umo'obo', cu taalo'ob u ye'eso'ob teen bix úuchic u jatzico'ob u xéet'elo'obe', quin beetic u buulil in t'oxic tu táan Yuumtzil c Ku

⁷Ti' le j levitaobo' ma' bíin dza'abac mix jun xéet' lu'umi', tumen ti' leti'ob bíin dza'abac u meeyjul aj kiinil u ti'al Yuumtzil. Ba'ale' u ch'i'ibalo'ob Gad yéetel Rubén bey xan u táancoch ch'i'ibalo'ob Manasese', dzo'oc u dza'abal u lu'umo'ob tu lakin u yáalcab ja'il Jordán, lelo' j dzaab ti'ob tumen Moisés u palitzil Yuumtzil.

⁸Le máaxo'ob bíin xi'ico'ob u yilo'ob bix úuchac u nu'ucta'al ca'ach xéet'elo'ob le lu'umo'obo', tu líikesuba'ob j bin, ca j a'ala'ab ti'ob tumen Josué: Xeene'ex te j lu'umo'obo' ca a jóokese'ex u xéet'elo'ob, cu dzo'ocole' ca suute'ex ca in beet u buulilo'ob way Silo tu táan Yuumtzile'.

⁹Le j xiibo'obo' j bino'ob u xíimbalto'ob le lu'umo'obo', ca tu jóokeso'ob siete u xéet'elo'obe', ca tu dzíibtajo'ob. Cu dzo'ocole' j suunajo'ob Silo tu yicnal Josué tu'ux jelecbalo'ob.

¹⁰Te j Silo túuno', Josuee' tu t'oxaj le lu'umo'ob ti' le j israelitaobo', tu beetaj u buulil tu táan Yuumtzil.

¹¹Le ca j dzo'oc u beeta'al le buul u ti'al u ch'i'ibalo'ob Benjamine', j dzaab lu'umo'ob ti'ob tu yáam u lu'umo'ob Judá yéetel José.

¹²U xuul le lu'umo'oba' cu cáajal ca'ach tu xaman u yáalcab ja'il Jordane', cu jáayal tu tojil u xaman Jericoe', cu máan tu chikin u lu'umil pu'uco'ob, cu taal jóokol tu x tocoy lu'umil Bet-avén.

¹³Te'elo' cu tojtáantic Luz (u káat u ya'ale' Betel) tu jáal j noojole' cu yéemel tac Atarot-adar ti' le pu'uc yaan tu noojol Bet-horón yaan caabalo';

¹⁴Cu dzo'ocole' u xuule' cu sutcubáa tu tojil u ka'anabil Mediterráneo tu jáal j noojol le pu'uc, yaan actáan ti' Bet-jorono', cu kuchul tac Quiriat-baal, cu kaaba'intic ca'ach xan Quiriat-jearim, ti'alinta'an tumen Judao'. Lela' leti' u xuulilo'ob j chikin.

¹⁵U xuul j noojole', cu jóokol tu naklic Quiriat-jearim, tu tojil j chikine' tac tu sayabil Neftoa,

¹⁶cu yéemel tac tu naklic le pu'uc yaan actáan ti' u kóom táax lu'umil Ben-hinom, tu xaman u kóom táax lu'umil Refaim. Cu dzo'ocole' cu yéemel tu kóom táax lu'umil Hinome', cu ch'aacat tu noojol u níixcabil Jebuse', cu yéemel tac tu sayabil En-rogel.

¹⁷Cu dzo'ocole' cu suut j xamane' cu jóokol tac En-semes, tu'ux cu tojtáantic tac Gelilot, yaan actáan ti' u níixcabil Adumine', cu yéemel tac tu suytuunil Bohán Ben-rubén;

¹⁸cu dzo'ocole' cu ch'aacat actáan j xaman ti' le níixcabil actáan ti' u kóom táax lu'umil Jordán, cu yéemel tac Jordane'

¹⁹cu ch'aacat j xaman ti' Bet-hogla, u ti'al u núup'ul tu ti'itz j xaman ti' le quimen ka'anab tu'ux cu náacal u yáalcab ja'il Jordán. Lelo' leti' u tojil j noojol lu'umo'ob.

²⁰U yáalcab ja'il Jordane', leti' ca'ach u jáal j lakin. Lelo'oba' u xuulo'ob le lu'umo'ob tu t'oxaj ti' u cajtalil u yotochnáalo'ob Benjamín.

²¹Le caajo'ob j dzaab ti' u ch'i'ibalo'ob Benjamino', jun jaatze' leti'elo'oba': Jericó, Bet-ogla, Emec-casis,

²²Bet-Arabá, Zemaraim, Betel,

²³Avim, Pará, Ofra,

²⁴Quefar-haamoni, Ofni yéetel Geba, doce caajo'ob yéetel u x péet caajilo'ob.

²⁵J dzaab xan ti'ob Gabaón, Ramá, Beerot,

²⁶Mispa, Cafira, Mozah,

²⁷Requem, Irpeel, Tarala,

²⁸Zela, Elef, Jebús (cu kaaba'intic xan Jerusalén), Gabaa yéetel Quiriat, catorce caajo'ob yéetel u x péet caajilo'ob. Lelo'oba' leti' le lu'umo'ob j dzaab ti'ob u ch'i'ibalo'ob Benjamín.