Read Yucateco Josué 20 Bible Online

Josué 20 - Yucateco bible

Josué 20

¹Yuumtzile' tu t'anaj Josuee' ca tu ya'alaj ti':

²T'aanen yéetel le j israelitaobo' ca wa'al ti'ob ca u yéeyo'ob u caajilo'ob ta'acbesajil je'el bix tin túuchi'itaj ti' Moisés ca u ya'ale'.

³Wa yaan máax cu quíimsic u láak máac, wa ma' j taali' ti' u quíimsique', cu páajtal u púudzul ti' jun p'éel le caajo'ob u ta'acbesicubáa u ti'al ma' u quíimsa'al tumen u jach nadza'an láak le quimeno'.

⁴Le máax cu bin u ta'acbesmajubáa ti' jun p'éel le cúuchilo', bíin xi'ic tu jool le caaj u cáant ti' u nuuquilo'ob ba'ax tu beetaj. Leti'obe' bíin u kamo'ob te j caajo' cu dzico'ob tu'ux u cajtal.

⁵Wa cu ch'a'apachta'al tumen u jach nadza'an láak le quimeno', u nuuquilo'ob le caajo', ma' bíin u kubo'ob le máac cu ta'acbescubáo', tumen ma' j taali' ti' tu quíimsajilac u láaki', ma' u p'ecmaj ca'achi.

⁶Ba'ale' le máax u ta'acbesmajuba'o', yaan u p'áatal te j caaj ca'aliquil ma' xi'ic u ti'al p'is óoltbil tumen tuláacal le caajo', yéetel p'is u quíimil xan u nojoch le aj kiino'ob cu meyaj tu kiinilo'obo'; le máax u ta'acbesmajubáo' je'el u páajtal u suut cajtal tu caajale'.

⁷Le j israelitaob túuno' tu ye'esajo'ob u ti'al ta'acbesajil u caajilo'ob Cedes tu lu'umil Galileae', tu pu'uquilo'ob Neftalí, Siquem, tu pu'uquilo'ob Efraín, yéetel Quiriat-arba, cu kaaba'intic xan Hebrón, tu pu'uquilo'ob Judá.

⁸Tu táanxel tzéelil Jordane', tu yóokol u táax pu'uquil u x tocoy lu'umil Jericoe', tu yéeyajo'ob Beser, tu ch'i'ibalo'ob Rubén; Galaade' tu yéeyajo'ob Ramot tu ch'i'ibalo'ob Gad; yéetel Basane' tu yéeyajo'ob Golán tu ch'i'ibalo'ob Manasés.

⁹Lelo'oba' leti'ob u caajilo'ob ta'acbesajil j yéeya'abo'ob u ti'al tuláacal j israelil yéetel le j táanxel lu'umilo'ob bíin cajlaco'ob ichilo'ob. Te'elo' je'el u páajtal u ta'acbesicubáa le máax cu quíimsic u láak máac ma' j taali' ti' ca'ach u quimsiqui', beyo' u jach nadza'an láak le quimeno', ma' bíin páatac u sutic u jeel le quíimil ca'aliquil ma' p'is óolta'ac tumen le caajo'.