Read Yucateco Josué 22 Bible Online

Josué 22 - Yucateco bible

Josué 22

¹Josué túune' tu t'anaj u ch'i'ibalo'ob Rubén yéetel Gad bey xan u táancoch u ch'i'ibalo'ob Manasese'

²ca tu ya'alaj ti'ob: Te'exe' dzo'oc a dzo'ocbesique'ex tuláacal ba'ax tu túuchi'itaj te'ex Moisés u palitzil Yuumtzil, Bey xan dzo'oc a dzo'ocbesique'ex ba'ax tin wa'alaj.

³Tac ti' le kiin bejela'a' bey xan tuláacal le dzo'oc u máano'obo', ma' ta xúump'attaje'ex a láake'exo'obi', dzo'oc a dzo'ocbesique'ex yéetel chuca'an óolal u nu'ucbe'en t'aano'ob Yuumtzil a Kuex.

⁴Bejela'a' bey leti' dzo'oc u dzo'ocbesic u séeb chi' tu yo'olal tumen yaan jéedzel ti' a sucu'une'exo'obo', suunene'ex ta chuybil naje'ex te j lu'um tu dzaj te'ex Moisés u palitzil Yuumtzil tu lakin Jordano'.

⁵Chéen ba'ax quin káat óoltic te'exe', ca a dzo'ocbese'ex yéetel chuca'an óolal le nu'ucbe'en t'aan yéetel le a'almaj t'aano'ob tu dzaj te'ex Moisés u palitzilo', u káat u ya'ale', ca a yaabilte'ex Yuumtzil a Kuex, máanene'ex mantadz tu beelo'ob yéetel u'uyaj t'ante'ex u nu'ucbe'en t'aano'ob, xíimbalnene'ex tu yéetel, meyajte'ex yéetel tuláacal a pucsi'ikale'ex bey xan yéetel tuláacal a cuxtale'ex.

⁶Cu dzo'ocole' Josuee' tu qui' t'antajo'obe', ca tu ya'alaj ti'ob ca xi'ico'ob yéetel utz, leti'obe' j bino'ob tu chuybil najo'ob.

⁷Ti' táancoch u ch'i'ibalo'ob Manasese', Moisese' tu dzaj ca'ach ti'ob u lu'umilo'ob Basán. U láak táancoch u múuch' cajtalilo'ob u yotochnáalo'ob Manasese', Josuee' tu dzaj lu'um ti'ob ichil le j israelitaob tu chikin Jordán, le yáax jun jaatzo' tu qui' t'anto'obe' ca tu ya'alaj ti'ob ca suunaco'ob tu lu'umo'ob.

⁸Ca tu ya'alaj ti'ob: Bejela'e', te'exe' suunene'ex ta lu'ume'ex yéetel le nucuch ayikalilo'oba' yéetel ya'abcach ba'alche'ob, ya'abcach oro, plata, bronce yéetel fierro, bey xan ya'ab nooko'ob. Múuch' t'oxláante'ex ichile'ex yéetel ichil a láake'ex le ba'axo'ob ta tocaje'ex ti' le aj p'eeco'obo'.

⁹Bey túuno' u ch'i'ibalo'ob Rubén yéetel Gad bey xan u táancoch u ch'i'ibalo'ob Manasesa', j luko'ob Silo tu lu'umil Canaán tu yicnalo'ob u chuucáan j israelitaobo', ca j suunajo'ob tu cúuchilo'ob tu lu'umilo'ob Galaad, tu'ux yaan u lu'umo'ob je'el bix u ya'almajil Yuumtzil tu chi'il Moiseso'.

¹⁰Le ca j kucho'ob u ch'i'ibalo'ob Rubén yéetel Gad bey xan u táancoch ch'i'ibalo'ob Manasés tu yáalcab ja'il Jordane', ca'aliquil ma' u ch'acto'ob u lu'um le j canaanilo', tu beeto'ob tu tzéel le áalcab ja'o', jun p'éel u nojoch multuunil kultaj.

¹¹U láak jun jaatz j israelitaobo' tu yojéeltajo'ob u tzicbalil le bin u ch'i'ibalo'ob Rubén yéetel Gad bey xan u táancoch u ch'i'ibalo'ob Manaseso', dzo'oc u beetico'ob jun p'éel u multuunil kultaj tu jáal u xuul u lu'umilo'ob Canaán tu tzéel Jordán tu lu'umilo'ob le j israelitaobo';

¹²le ca j kuch u tzicbalil tu xiquin le j israelitaobo' tu much'ajuba'ob Silo' u ti'al u bino'ob u ba'atelto'ob.

¹³Táanil tu túuchi'itajo'ob Finees u paal aj kiin Eleazar u ti'al ca xi'ic Galaad, tu'ux yano'ob ca'ach u ch'i'ibalo'ob Rubén yéetel Gad bey xan u táancoch ch'i'ibalo'ob Manasés.

¹⁴Yéetel leti'e' j bin diez u nuuquilo'ob Israel, tu jujun túulile' j bin tu kaaba' u ch'i'ibalo'ob bey xan u múuch' caajo'ob.

¹⁵Tuláacalo'obe' j bino'ob tu'ux yano'ob u ch'i'ibalo'ob Rubén yéetel Gad bey xan u táancoch ch'i'ibalo'ob Manasese', ca tu ya'alajo'ob:

¹⁶To'one' c t'aan tu kaaba' u caajal Yuumtzil. ¿Ba'ax kaakas tuuculil yaan ta poole'ex u ti'al ca a beete'ex le ba'al bey ti' u Kuil Israel? ¿Ba'axten ca xúump'attique'ex u ti'al a beetique'ex jun p'éel u multuunil kultaj u ti'al a we'esique'ex a ma' u'uyaj t'aanile'ex ti' Yuumtzil?

¹⁷¿Ma' wa ya'ab a wilique'ex u keban Peor, u p'atmajo'on kaasil tac bejela'e' yéetel tu beetaj u quíimil ya'ab u caajal Yuumtzilo'?

¹⁸¿Ma' wa náakac te'ex tuláacal le ba'ax úucho', u ti'al xan a xúump'atte'ex Yuumtzil? Wa te'ex ca dzu'uytale'ex bejela'a' ti' Yuumtzile', sáamale' leti'e' bíin p'u'ujuc yéetel tuláacal u caajil le j israelitaobo'.

¹⁹Wa táan a tucultique'ex kaas yanil le lu'umo'oba', co'otene'ex tu lu'umo'ob Yuumtzil, tu'ux yaan u quili'ich cúuchil Yuumtzil. Ch'a'ex jun xéet' lu'umo'ob ichilo'on. Ba'ale' ma' a dzu'uytale'ex ti' Yuumtzil mix ti' to'on u ti'al a beetique'ex u láak u multuunil kultaj jun páay ti' u multuunil u kulta'al Yuumtzil c Ku.

²⁰Ka'ajac te'ex Acán, u paal Zara, kebanchaj iquil tu ch'a'ajilac ba'ax jun páaycuna'an u ti'al xu'ulsbil, tu yo'olal u si'ipile' Yuumtzile' j p'u'uj yéetel tuláacal u caajil Israel. ¡Ma' chéen Acán j quíim tu yo'olal u kebani'!

²¹Rubén yéetel Gad bey xan u táancoch u ch'i'ibalo'ob Manasese' tu núucajo'ob ti' u nuuquilo'ob le j israelitaobo';

²²Yuumtzil u Ku tuláacal kuobe' u yojel ma' t beetaj le u multuunil kultaj u ti'al c ma' u'uyaj t'antic wa u ti'al c p'atic u beeli'. Leti'e' u yojel, yéetel cu beetic xan a wojéeltique'ex; wa t beetaj yéetel le tuucul je'elo', ¡ma' a sa'atsique'ex c cuxtal!

²³Wa t beetaj le u multuunil kultaj u ti'al c xúump'attic Yuumtzil, wa u ti'al c táanbesic ba'alo'ob u ti'al láaj tóocbil, wa u ti'al ti'ibil óolal jejeláas janalbe'en neeko'ob wa u quíimsbil ba'alche'ilo'ob ca'a bisajbáile', u p'is óolto'on Yuumtzil.

²⁴Tu jaajile' lela' t beetaje', tumen ma' j káat ca kuchuc u kiinil u ya'alic a paalale'ex ti' c paalal beya': ¿Ba'ax yaan a wile'ex te'ex yéetel Yuumtzil u Kuil Israel?

²⁵Yuumtzile' tu dzaj le Jordán u ti'al jun páaycuntique'ex ti' to'on, u múuch' cajtalile'ex u yotochnáalo'ob Rubén yéetel Gad. Te'exe' mix ba'al yaan a wile'ex yéetel Yuumtzil. Beyo' a paalale'exe', bíin u beeto'ob u jáawal u tzi'iquil Yuumtzil tumen c paalalo'ob.

²⁶Let o'olal t tucultaj c beetic jun p'éel u multuunil kultaj, ma' u ti'al c kubic le ba'axo'ob cu láaj tóoca'al tu nojbe'enil Yuumtzilo', mix u ti'al c táanbesic quíimsbil ba'alche'obi',

²⁷ba'ale' u ti'al jaajcunajil ichile'ex yéetel ichilo'on, bey xan ti' c ch'i'ibalo'ob yéetel a ch'i'ibale'ex, je'el u páajtal c meyajtic Yuumtzile', je'el xan u páajtal c bin tu táan yéetel le ba'axo'ob cu láaj tóoca'al bey xan yéetel u quíimsbil ba'alche'ob tu yo'olal keban yéetel ca'a bisajbáil. Beyo' a ch'i'ibale'exe', ma' bíin páatac u ya'alico'ob ti' c ch'i'ibalo'ob beya': Te'exe', mix ba'al yaan a wile'ex yéetel Yuumtzil.

²⁸T tucultaj wa bíin yanac máax u ya'al bey ti' to'on wa ti' c ch'i'ibalo'obo', to'one' bíin páatac c núuquic: ¡Ile'ex! c máanja'an ch'i'ibalo'obe', tu beetajo'ob le multuunil kultaj ti' Yuumtzila', ma' u ti'al u táanbesico'ob quíimsbil ba'alche'obi', ba'ale' u ti'al jaajcunajil ichile'ex yéetel ichilo'on.

²⁹Ma' u cha'ic Ku c dzu'uytal wa c xúump'attic, u ti'al ca c beet u láak u multuunil kultaj c táanbesic ba'alo'ob láaj tóocbil wa u ti'ibil óolalo'ob jejeláas janalbe'en neeko'ob, wa je'el ba'alac u láak quíimsbil ba'alche'ob, jun páay ti' u multuunil u kulta'al Ku yaan tu táan le quili'ich najo'.

³⁰Le ca tu yu'ubaj aj kiin Finees, bey xan u nuuquilo'ob le caaj yéetel u nuuquilo'ob u cajtalilo'ob le yotochnáalo'ob ba'ax cu ya'alico'ob le u ti'alo'ob Rubén yéetel Gad bey xan u táancoch ch'i'ibalo'ob Manaseso', tu tucultajo'ob ma'alobil.

³¹J a'ala'ab ti'ob túun tumen Finees u paal aj kiin Eleazar: Bejela'e' ma'alob c ojelil ti' yaan Yuumtzil t éetele', tumen te'exe' ma' ta tucultaje'ex a tzelicaba'ex tu beeli', bey túuno' ta toco'one'ex ti' u jaadz Yuumtzil.

³²Cu dzo'ocol lelo', Fines yéetel le máaxo'ob cu bin tu yéetelo'obo' tu paaclan tzicuba'obe', ca j luko'ob tu lu'umilo'ob Galaade' ca j suunajo'ob tu lu'umilo'ob Canaán tu'ux yaan le j israelitaobo'. Le ca tu tzicbalto'ob ba'ax núuca'ab ti'ob tumen u láak u múuch' cajtalilo'ob le yotochnáalo'obo',

³³Tu tucultajo'ob ma'alob le ba'ax a'ala'abo' ca tu qui'iqui' t'anto'ob Ku. Líikbal ti' le kiino', ma' j suunajo'ob u ya'alo'ob u bino'ob j ba'atel yéetel u múuh' cajtalilo'ob u yotochnáalo'ob Rubén yéetel Gadi', mix xan u kascuntico'ob u lu'umo'ob.

³⁴U ch'i'ibalo'ob Rubén yéetel Gade', tu dzajo'ob u kaaba'int le multuunil kultajo' Jaajcunajil táan u ya'alico'ob: Le multuunil kultaja' jun p'éel u jaajcunajil ti' yaan ichilo'on Yuumtzil Junab Kue'.