Read Yucateco Josué 23 Bible Online

Josué 23 - Yucateco bible

Josué 23

¹Cu dzo'ocol u máan ya'abcach kiino'ob u dzaa jéedzel Yuumtzil ti' le j israelitaob ti' u aj p'eeco'obe', Josué ti' le kiino'obo' dzo'oc ca'ach u nuxibtal,

²Josue' tu túuchi'itaj t'anbil tuláacal le j israelitaobo', pa'ate' yéetel u nuuquilo'ob, u jo'olpóopilo'ob, aj u'uyaj ba'atelo'ob yéetel u aj dzíibo'ob, ca tu ya'alaj ti'ob: Tene' dzo'oc in nuxibtal, dzo'oc u t'onquintiquen le ja'abo'oba'.

³Te'exe' dzo'oc a wilique'ex ba'ax tu beetaj Yuumtzil ti' le caajo'ob cu xachicuba'ob ca'acho', tumen leti' j ba'atelnaj ta wo'olale'ex.

⁴Tene' tin beetaj u buulil u ti'al u t'ooxil le lu'umo'oba', ichil tuláacal u múuch' cajtalilo'ob le otochnáalo'obo'. Ma' chéen le lu'umo'ob dzo'oc u ch'a'abal tin t'oxajo', tin t'oxaj tac le ma' ch'a'abaco'obo' líikbal tu yáalcab ja'il Jordán te j lakino' tac tu ka'anabil Mediterráneo j chikin.

⁵Yuumtzil bíin u tzel ti' le lu'umo'oba' le máaxo'ob cajnáalo'obo', u ti'al ca a ch'a'ex je'el bix u séeb chi'itmail Yuumtzilo'.

⁶J xiibil máacchajaque'ex u ti'al a dzo'ocbesique'ex le ba'ax cu ya'alic u ju'unil u nu'ucbe'en t'aan Moiseso'; láaj dzo'ocbese'ex jach je'el bix ya'alico'.

⁷Ma' a xa'akbesicaba'ex yéetel le máaco'ob p'áato'ob cajtal ichile'exo'. Ma' a kultique'ex u kuob, mix a wu'uyaj t'antique'exo'ob; mix u táabal a ch'a'achi'itique'ex u kaaba'ob le kuobo', mix a jalach t'aane'ex tu kaaba'ob.

⁸Xíimbalnene'ex mantadz yéetel Yuumtzil a Junab Kuex je'el bix a beetique'ex tac bejela'o'.

⁹Yuumtzile' dzo'oc u tzelic ta táane'ex nucuch caajo'ob mu'uka'ano'ob, tac bejela'e' mix máac páatchajac u wa'atal j ba'atel ta táane'ex.

¹⁰Chéen jun túul ti' te'exe' je'el u yáalcabansic mile', tumen Yuumtzil a Kuexe' cu ba'atel ta wo'olale'ex je'el bix u séeb chi'itma'ilo'.

¹¹Canantaba'ex ta juunale'ex, yaabilte'ex xan Yuumtzil a Kuex

¹²Tumen in káat ca wojéelte'ex lela': Wa ca tzelicaba'ex tu beel Ku u ti'al a xa'akbesicaba'ex yéetel le máaco'ob dzo'oc u p'áatalo'ob ichile'exo', bey xan ca paaclan dzo'ocol a beele'ex tu yéetelo'obe', Yuumtzile' a Kuexe' ma' bíin u tzel ta táane'exo'ob le máaco'oba', ba'ale' bíin u suuto'ob léechil yéetel núup'il u ti'al a lúubule'ex, u nu'ucul ja'adz ta paache'ex, ki'ixo'ob ta wiche'ex, tac quéen p'áatac mina'an mix jun túul ti' te'ex ti' le ma'alob lu'um tu dzaj te'ex Yuumtzil a Kuexo'.

¹⁴Tene' bin in ca'aj quíimil, ba'ale' ma'ili' quíimquene' in káat ca a wutzil kaj óolte'ex yéetel tuláacal a pucsi'ikale'ex bey xan yéetel tuláacal a wóole'ex dzo'oc u béeychajal tuláacal ba'ax tu séeb chi'itaj Yuumtzil. Mix jun p'éel u séeb chi' j p'áat wa ma' béeychaji'.

¹⁵Ba'ale' je'el bix úuchic u béeytal tuláacal le ba'ax ma'alob u ya'almaj Yuumtzilo', bey xan bíin u taas loobo'ob ta wóokole'ex tac u p'áatal mina'an mix jun túul ti' te'ex ti' le ma'alob lu'um tu dzaj te'exo',

¹⁶wa ma' ta dzo'ocbesique'ex le nup t'aan tu beetaj ta wéetele'exo'. Wa ca bine'ex a kulte'ex u láak kuob bey xan ca chintale'ex tu táano'obe', Yuumtzile' bíin p'u'ujuc ta wéetele'ex, jach séeba'an bíin tu'upsa'ac a kaaba'ex tu yóokol le ma'alob lu'um tu dzaj te'exo'.