Read Yucateco Josué 24 Bible Online

Josué 24 - Yucateco bible

Josué 24

¹Josuee' tu much'quintaj tu lu'umil Siquem tuláacal u ch'i'ibalo'ob Israel. Tu t'aanaj le u nuuquilo'ob, náacomo'ob le aj ba'atelo'ob, u aj u'uyaj ba'atelo'ob yéetel u aj dzíibo'ob tu táan Yuumtzile',

²ca tu ya'alaj ti' tuláacal le caajo': Je'el ba'ax cu ya'alic Yuumtzil u Junab Ku israela': Úuch ca'ache', Taré yéetel u paalalo'ob Abraham yéetel Nacor a máanja'an ch'i'ibale'exe', cajnáalo'ob ca'ach tu jáal u yáalcab ja'il Éfrautese', cu kultico'ob ca'ach yaanal kuob.

³Tu jáal u yáalcab ja'il Éufrates tin ch'a'aj Abrahame', ca tin beetaj u xíimbal tu lu'umilo'ob Canaán. tin beetaj u ya'abtal, ca tin dzaj ti' yáax táanile' Isaac u paal,

⁴ti' Isaaque' tin dzaj ca'a túul u paalal, Jacob yéetel Esaú. Ti' Esaue' tin dzaj u pu'uquilo'ob Seir, ba'ale' Jacob yéetel u paalalo'obe', j bino'ob Egipto.

⁵Ba'ale' tene' tin túuchi'itaj Moisés yéetel Aarone', ca tin loobquintaj yéetel quíimil le j egipciobo', ca tin jóokesaje'exi'.

⁶Le ca jóoko'ob a máanja'an ch'i'ibale'ex Egiptoe', le j egipciobo', j bino'ob u ch'a'apachto'ob yéetel u bolanilo'ob ba'atel bey xan yéetel tzíimino'ob tac te j ka'anabo'.

⁷Leti'obe' tu t'anajeno'obe', tene' ca tin dzaj jun p'éel éekjoche'enil chúumuc ti' leti'ob yéetel ti' le j egipciobo', ca tin beetaj u bu'ulul le j egipciob tumen le ka'anabo'. Te'exe' ta wilaje'ex le ba'ax tin beetaj Egiptoo'. Cu dzo'ocole', te'exe' j p'áate'ex ya'abcach kiino'ob ti' le x tocoy lu'umo',

⁸tac ca tin taasaje'ex tu lu'umo'ob le j amorreob tu lakin le Jordano'. Leti'obe' tu ba'atelte'exo'ob, ba'ale' tene' tin beetaj u lúubulo'ob ta kabe'ex, ca ta pa'aje'ex u muuko'ob, ca ta ti'a'alintaje'ex u lu'umo'oba'.

⁹Cu dzo'ocole' Balac u paal Zipor u ajawil le j moabitaobo', j taal u ba'atelte'ex. Balaque' tu túuchi'itaj j ch'a'abil Balaam, u paal Beor u ti'al u loolob t'antique'ex.

¹⁰Ba'ale' tene' ma' tin cha'aj u loob t'antique'exi', ca j yanchaj u qui' t'antique'ex. Bey úuchic in toquique'exo'.

¹¹Te'ex túune' ta ch'actaje'ex u yáalcab ja'il Jordane', ca j kuche'ex tac Jericó. U cajnáalilo'ob Jericó (j amorreo', j ferezeob, j cananeob, j hititaob, j gergeseob, j heveob yéetel jebuseobe') tu ba'atelte'exo'ob, ba'ale' tene' tin beetaj a pa'ique'ex u muuko'ob.

¹²Le ca'a túul ajawo'ob j amorreobo', ma' ta pa'aje'ex u muuko'ob yéetel máascab mix yéetel x p'úunche'i', ba'ale' teen tin túuxtaj in x pak sajaquil táanil ti' te'exe', ca j áalcabnajo'ob ca'aliquil ma' kuchque'ex tu yicnalo'ob.

¹³Tene' tin dzaj ti' te'ex lu'umo'ob ma' a meyajtme'exi', bey xan caajo'ob ma' te'ex beetmailo'obi'. Bejela'e' ti' cajnáale'exi', bey xan ca jaantique'ex uvaob yéetel aceitunaob ma' te'ex pakmaili'. Tu ya'alaj xan Josué:

¹⁴Tu yo'olal tuláacal lela', tzique'ex Yuumtzil, meyajte'ex yéetel jaaj óolal bey xan yéetel chuca'an óolal. Tzelaba'ex tu táano'ob le kuob j kulta'abo'ob tumen a j máanja'an ch'i'ibale'ex tu jáal u yáalcab ja'il Éfrautes yéetel Egiptoo', ca a meyajte'ex chéen Yuumtzil.

¹⁵Ba'ale' wa ma' a káate'ex a meyajte'ex Yuumtzile', tuculte'ex bejela'a' máax bíin a meyajte'ex: wa u kuob a máanja'an ch'i'ibale'ex cajnáalo'ob ca'ach tu jáal u yáalcab ja'il Éufrates, wa u ku le j amorreob cajnáalo'ob ca'ach ti' le lu'uma', ba'ale' teen yéetel in paalale', Junab Ku Yuumtzil bíin c meyajtej.

¹⁶Le caaj túuno' tu ya'alaj: ¡Ma' u yóoltic Yuumtzil ca c xúump'at u ti'al c meyajtic yaanal kuob!

¹⁷Yuumtzile' leti' máax jóokeso'on Egipto yéetel c máanja'an ch'i'ibalo'ob, tu'ux palitzilta'ano'on ca'achi. Leti' j beet ya'abcach máactzilo'ob tu táan c ich, leti' j cananto'on yéetel tu tocajo'on te j bej ti' ya'ab caajo'ob.

¹⁸Leti' jóokes t táan tuláacal le caajo'ob yaan ca'ach t beelo', bey xan le j amorreob cajnáalo'ob ca'ach waye'. Tu yo'olal tuláacal lelo', to'one' bíin c meyajt Yuumtzil tumen leti' c Ku.

¹⁹Ba'ale' Josuee' tu ya'alaj ti'ob: Te'exe' ma' bíin páatchajac a meyajtique'ex Yuumtzili', tumen letie' jun túul Junab Ku quili'ich u p'eec u ke'exel, ma' bíin u sa'ats a lik óole'ex yéetel a kebane'exi'.

²⁰Wa te'ex ca xúump'attique'ex u ti'al a meyajtique'ex u yaanal kuobe', Yuumtzile' bíin u beet u taal loob ta wóokole'ex, bíin u xu'ulse'ex quex tumen dzo'oc u beetic te'ex ya'abcach utz.

²¹Le caajo' tu núucaj: Lelo' ma' bíin úuchuqui'. To'one' bíin c meyajt Yuumtzil.

²²Josué túune' tu ya'alaj: Te'ex a aj jaajcunaje'ex ta juunal a wóole'ex a yéeyique'ex a meyajtique'ex Yuumtzil. Leti'obe' tu núucajo'ob: beyo' to'on, c jaajcunajil.

²³Josuee' tu ya'alaj ti'ob: Láaj lukese'ex túun le kuob yaan ichile'exo', ca suunaque'ex yéetel jaaj óol pucsi'ikal ti' Yuumtzil u Junab Kuil Israel.

²⁴Le caajo' tu núucaj: To'one', bíin c meyajt Yuumtzil c Ku, bíin c beet tuláacal ba'ax bíin u ya'al to'on.

²⁵Láili' ti' le kiino', Josuee' tu beetaj tu lu'umil Siqueme' jun p'éel nup t'aan yéetel le caajo', ca tu kubaj ti'ob, nu'ucbe'en t'aano'ob yéetel ca'ansajo'obe',

²⁶ca tu dzíibtaj tu ju'unil u ya'almaj t'aan Ku. Cu dzo'ocole' tu ch'a'aj jun p'éel nojoch tuuniche', ca tu dzaj tu yáanal le béec yaan tu quili'ich naj Yuumtzilo',

²⁷ca tu ya'alaj ti' le caajo': Le tuunicha', bíin meyajnac ti' to'on aj jaajcunajil, tumen leti' u aj jaajcunajil tuláacal ba'ax dzo'oc u ya'alic to'on Yuumtzil. Bíin meyajnac aj jaajcunajil ta táane'ex u ti'al ma' patcaba'ex tu táan a Kuex.

²⁸Cu dzo'ocole' Josuee' tu túuchi'itaj tu jujun túulil tu lu'umo'ob.

²⁹Cu máan dze'edzec kiine', j quíim Josué u paal Nun u palitzil Yuumtzil, yaan ca'ach cien yéetel diez ja'abo'ob ti'.

³⁰Ca j mu'uc Timnat-sera, te j lu'um yaan tu pu'uquilo'ob Efraín tu xaman u pu'uquil Gaas.

³¹Le j israelitaobo' tu meyajto'ob Yuumtzil ca'aliquil cuxa'an Josue', bey xan cu dzo'ocol u quíimil, ca'aliquil cuxa'ano'ob le u nuuquilo'ob le caaj u yojelo'ob tuláacal ba'ax tu beetaj Yuumtzil yéetel le j israelitaobo'.

³²U baaquelo'ob José j lukesa'ab Egipto tumen le j israelitaobo', j mu'uco'ob Siquem, ti' le lu'um tu manaj Jacob yéetel cien u taakinil plata ti' u paalal Hamor u taata Siquem, le lu'umo' j p'áat u ti'alint u ch'i'ibalo'ob José.

³³Le ca j quíim Eleazar, u paal Aarone', j mu'uc tu jo'ol lu'umil Finees u paal, le j dzaab ti' tu pu'uquil Efraino'.