Read Yucateco Josué 3 Bible Online

Josué 3 - Yucateco bible

Josué 3

¹Tu láak kiin jach tu ja'atzcabile', Josué yéetel le j israelitaobo' jóoko'ob Sitime' ca j kucho'ob tu yáalcab ja'il Jordán; ba'ale' ma'ili' u ch'acto'obe', je'elo'ob te'elo'.

²Cu máan óox p'éel kiino'obe', u nuuquilo'obo' tu xíimbaltajo'ob le cúuchil tu'ux jelecbalo'obo',

³ca tu ya'alajo'ob ti' le j israelitaob beya': Le quéen a wile'ex u ch'aacat u ba'asche' Yuumtzil cu bisa'al tumen le aj kiino'ob levitaobo', jóokene'ex le tu'ux yane'exe' ca xi'ique'ex tu paach.

⁴Beyo' bíin a wojéelte'ex tu'ux bíin xi'ique'ex, tumen mix jun túul ti' te'ex u xíimbaltmaj le bejo'. Ba'ale' ma' a náadzale'ex ti' le ba'asche'o', p'áatene'ex tu paach bey jun p'éel kilómetroe'.

⁵Josuee' tu ya'alaj ti'ob: Utzquint a wanile'ex, tumen sáamale' bíin a wile'ex u beetic máactzilo'ob Yuumtzil.

⁶Ti' le aj kiino'obo' tu ya'alaj: Ch'a'ex u ba'asche'il le nup t'aano' ca a ch'acte'ex le áalcab ja' táanil ti' le máaco'obo'. Le aj kiino'obo' tu ch'a'ajo'ob u ba'asche'il le nup t'aano' ca j máano'ob táanil ti' le máaco'obo'.

⁷Yuumtzil túune' tu ya'alaj ti' Josué: Líikbal ti' le kiina' bíin in beet a wila'al jach kabéetech tu táan le j israelitaob. Beyo' bíin u yilo'ob ti' yanen ta wéetel je'el bix úuchic in wantal yéetel Moisese'.

⁸Teech túune', a'al ti' le aj kiino'ob máaxo'ob bisic u ba'asche'il le nup t'aano', le quéen kuchuco'ob tu jáal le Jordano', wa'alaco'ob ichil le áalcab ja'o'.

⁹Josué túune' tu ya'alaj ti' le j israelitaobo': Co'otene'ex a ch'en xiquinte'ex ba'ax cu ya'alic Yuumtzil a Kuex.

¹⁰Lela' leti' u chíicul ti' yaan Ku ichile'exe', bey xan bíin u míist ta táane'ex le j ititaob, le j heveob, le j ferezeob, le j gergeseob, le j amorreob yéetel le jebuseobo'.

¹¹Ile'ex, u ba'asche'il u nup t'aan u Yuumtzilil tuláacal yóokolcaabe' bin u ca'aj u ch'act Jordán ta táane'ex.

¹²Let o'olale', bejela'e' yéeye'ex doce j xiibo'ob, jun túul ti' u jujun p'éelil u doce múuch' cajtalilo'ob u yotochnáalo'ob Israel.

¹³Le quéen t'áalac ichil le ja' u yooco'ob le aj kiino'ob máaxo'ob bisic u ba'asche' Yuumtzile', le áalcab ja'o' bíin búujuc ca'a jaatzil, le ja' cu taal ca'analo' bíin jáawac u yáalcab, cu p'áatal j nictal.

¹⁴Le j israelitaobo' jóoko'ob ti' u chuybil najo'ob u ti'al u ch'actico'ob le áalcab ja'o', táanil ti'ob cu bino'ob ca'ach le aj kiino'ob bisic u ba'asche'il le nup t'aano'.

¹⁵Ba'ale' le ca j ooc le aj kiino'ob ichil le áalcab ja'o' le ca j ch'u'ul u yooco'ob tu jáale' (tu buul kiinilo'ob jooche' le Jordano' cu tuul)

¹⁶le ja' cu taal ca'analo' j niclaj, jach náach, tu caajil Adam le yaan tu tzéel u tuulumil Saretano'. Le ja' cu yéemel ti' le quimen ka'anabo' bin u yáalcab tac u láaj éemel. Bey úuchic u búujul ca jaatzil ti' le áalcab ja'o', ca ch'aacatnaj le j israelitaob actáan ti' u caajil Jerico'.

¹⁷Tuláacal le caajo', j ch'aacatnaj ti' tiquin lu'um ichil le Jordano', ca'aliquil le aj kiino'ob bisic u ba'asche' Yuumtzilo', p'áato'ob tu chúumuc le Jordano', ma'alob wa'alico'ob ti' tiquin lu'um.