Read Yucateco Josué 4 Bible Online

Josué 4 - Yucateco bible

Josué 4

¹Cu dzo'ocol u láaj ch'aacato'ob te j Jordano', Yuumtzile' tu ya'alaj ti' Josué:

²Yéey doce j xiibo'ob ichil le caajo', jujun túul ti'o' ichil u múuch' cajtalil le j otochnáalo'ob,

³a'al ti'ob ca u jóokeso'ob doce tuunicho'ob tu chúumuc le áalcab ja'o', te tu'ux wa'alacbal le aj kiino'obo', ca u biso'ob u much'quinto'ob te j cúuchil tu'ux bíin je'eleco'ob ti' le áakaba'.

⁴Josué túune' tu t'anaj le doce j xiibo'ob tu yéeyajo',

⁵ca tu ya'alaj ti'ob: Oquene'ex tu chúumuc le Jordano', tu táan u ba'asche' Yuumtzil a Kuexo', ta jujun túulile'exe' cúuchqueléembalte'ex jujun p'éel tuunich tu yo'olal u jujun p'éelil u múuch' cajtalilo'ob yotochnáalo'ob Israel, u ti'al ca u chuc doce tu pa'ate'il.

⁶Le tuunicho'oba' bíin meyajnaco'ob bey chíiculalile' le kiin bíin u káat te'ex a paalale'ex: ¿Ba'ax cu chíicultic le tuunicho'oba'?

⁷te'exe' bíin a núuque'ex ti'ob: Le ca tu ch'actaj le Jordán u ba'asche' Yuumtzile', le áalcab ja'o' buj ca'a jaatzil tu táan le ba'asche'o'. Le tuunicho'oba' cu meyaj ti' le j israelitaob u ti'al u ka'ajsico'ob ba'ax úuch te'ela'.

⁸Leti'obe' tu beetajo'ob le ba'ax j a'ala'ab ti'ob tumen Josue'.

⁹Cu dzo'ocole' Josuee' tu much'quintaj u láak doce tuunicho'ob ichil le áalcab ja'o', le tu'ux wa'alajo'ob le aj kiino'ob cu bisico'ob ca'ach u ba'asche' Yuumtzilo'. Le tuunicho'obo' ti' yano'ob tac bejela'e'.

¹⁰Le aj kiino'ob bisico'ob ca'ach u ba'asche'il le nup t'aano' j p'áato'ob tu chúumuc le Jordán ca'aliquil le j israelitaobo', táan u beetico'ob ca'ach le ba'ax tu túuchi'itaj Yuumtzil ti' Josueo'. Tuláacal j beeta'ab je'el bix tu túuchi'itajil Moisés ti' Josuee'. Le máaco'obo' séeb ch'aacatnajico'ob,

¹¹cu dzo'ocol u láaj ch'aacato'ob tu táanxel tzéelilo', ch'aacatnajo'ob le aj kiino'ob yéetel u ba'asche' Yuumtzilo', ca tu dzajuba'ob táanil ti' le caajo'.

¹²Ch'aacatnajo'ob xan te j áalcab ja' u aj ba'atelo'ob u múuch' cajtalilo'ob yotochnáalo'ob Rubén, Gad yéetel u táancoch ch'i'ibalo'ob Manasés. U ch'a'amajo'ob u nu'uucul u ba'atelo'ob, j bino'ob xan táanil ti' le j israelitaobo', je'el bix tu túuchi'itajil Moiseso'.

¹³Óoli' cuarenta mil j xiibo'ob u ch'a'amajo'ob u nu'uucul ba'atel ti' u yóolo'ob te j ba'atelo' j máano'ob tu tzoolol máanico'ob tu táan Yuumtzil, ca j bino'ob tu táax lu'umilo'ob Jericó.

¹⁴Ti' le kiino'obo' Yuumtzile' tu beetaj u yutzul pacta'al yéetel u tzi'iquil Josuee', je'el bix tu beetaj u tzi'iquil Moisés ca'aliquil cuxa'ane'.

¹⁵Yuumtzil túune' tu ya'alaj ti' Josué:

¹⁶A'al ti'ob le aj kiino'ob cu bisico'ob u ba'asche'il le nup t'aano', ca jóokoco'ob ichil le Jordano'.

¹⁷Josuee' tu ya'alaj ti'ob ca jóokoco'ob,

¹⁸tu séeblaquil jóokico'ob le aj kiino'ob le ca tu t'alcuntajo'ob u yooco'ob ti' tiquin lu'ume', u ja'il le áalcab ja'o' j suunaj tu cúuchil, ca j áalcab tuulnaj je'el bix ca'ache'.

¹⁹Le j israelitaobo' jóoko'ob ichil le Jordán tu diez kiinil le yáax meso', ca je'elo'ob Gilgal tu lakin Jericó.

²⁰Te'elo' Josuee' tu tzolaj le doce tuunicho'ob jóoksa'abo'ob ichil le Jordano',

²¹ca tu ya'alaj ti' le j israelitaobo': Ti' le kiino'ob cu taalo'obo', le quéen káatac te'ex: ¿ba'ax cu chíicultic le tuunicho'obo'?,

²²tzicbalte'ex ti'ob bix úuchic u ch'aacat Israel tu yáalcab ja'il Jordán yóokol tiquin lu'um,

²³bey xan bix tiquincunta'abic u ja'il Jordán ca'aliquil táan a ch'actique'ex je'el bix tu tiquincuntilac ca'ach le chac ka'anab ca'aliquil táan c ch'actico'.

²⁴Beyo' tuláacal u caajilo'ob yóokolcaabe' bíin u yojéelto'ob u nojoch páajtalil Yuumtzil, te'ex xane' bíin a nojbe'encunte'ex Yuumtzil Ku u ti'al mina'an u xuul.