Read Yucateco Josué 6 Bible Online

Josué 6 - Yucateco bible

Josué 6

¹Mix máac ca'ach cu páajtal u jóokol mix u yocol tu caajil Jericó, tumen dzo'oc ca'ach u ka'alal u jool najilo'ob u ti'al u cananta'al ti' le j israelitaobo'.

²Ba'ale' Yuumtzile' tu ya'alaj ti' Josué: Tene' dzo'oc in kubic teech Jericó, u ajawil yéetel u aj ba'atelo'ob.

³Te'exe' u aj ba'atele'ex Israele', súut xíimbalnene'ex tu bakpach le caaj jun téen sáamsamal ichil seis kiino'ob.

⁴Siete aj kiino'ob bíin xi'ico'ob tu táan u ba'asche'il u nup t'aan Yuumtzil, tu jujun túulile' yéetel jun p'éel jóopsaj paax u baac j taman, tu siete kiine' bíin a súut xíimba'alte'ex siete u téenel le caajo', ca'aliquil le aj kiino'obo' táan u jóopsico'ob u paaxo'ob.

⁵Le quéen a wu'uye'ex u juum le jóopsaj paaxo'ob chéen u ti'al ba'atelo', ka'am awatnene'ex yéetel tuláacal a muuke'ex, ca níiquic u tuulumilo'ob le caajo'. Ta junjun túulile'ex túune' unaj a bine'ex a pulaba'ex tu yóokol le caajo'.

⁶Josuee' tu t'anaj le aj kiino'obo' ca tu ya'alaj ti'ob: Bise'ex u ba'asche'il u nup t'aan Yuumtzil, siete ti' te'exe' xi'ic táanil ti' le ba'asche'o', u ch'a'amajob u jóopsaj paaxilo'ob u baac j taman.

⁷Ti' le caajo' tu ya'alaj: Xeene'ex súut xíimbalte'ex Le caajo'. Le j xiibo'ob u ti'al le ba'atelo', xi'ico'ob táanil ti' u ba'asche' Yuumtzil,

⁸Tuláacalo'obe' tu beetajo'ob le ba'ax j a'ala'ab ti'ob tumen Josue'. Le siete aj kiino'obo' cu bino'ob ca'ach tu táan u ba'asche'il u nup t'aan Yuumtzil, ca'aliquil táan u jóopsico'ob le paaxo'obo', paachil ti'obe' cu bisa'al ca'ach u ba'asche'il le nup t'aano'.

⁹Le j xiibo'ob u ti'al le ba'atelo', cu bino'ob ca'ach tu táan le aj kiino'obo', u láak aj ba'atelo'obe' paachil ti' le ba'asche' cu bino'obo', ca'aliquil le aj kiino'obo' táan u jóopsico'ob u paaxo'ob x ma' je'elelil.

¹⁰Ba'ale' ti' le aj ba'atelo'obo', Josuee' tu ya'alaj ca xíimbalnaco'ob x ch'ench'enquil tac quéen téec a'ala'ac ti'ob ca awatnaco'ob yéetel tuláacal u muuko'ob.

¹¹Josuee' tu beetaj u yáax bisa'al tu bakpach Jericó u ba'asche' Yuumtzil. Cu dzo'ocole' j suunajo'ob tu'ux jelecbalo'obo', ca tu máansajo'ob áakabi'.

¹²Tu piknalil u láak kiine', Josuee' j líik yéetel le aj kiino'obo' ca tu ch'a'ajo'ob u ba'asche' Yuumtzil.

¹³Le siete aj kiino'ob cu bino'ob ca'ach tu táan u ba'asche' Yuumtzile', mantadz táan u xíimbalo'ob bey xan táan u jóopsico'ob u paaxo'ob. Le j xiibo'ob aj ba'atelo'obo' cu bino'ob ca'ach táanil ti'ob, u láako'obo' cu bino'ob tu paach le ba'asche'o'. Le jóopsbil paaxo'obo' ma' tu jáawal u juumo'ob.

¹⁴Tu ca'a p'éel kiine', xíimbalnajo'ob tu ca'a téen tu bakpach le caajo' ca j ca'a suunajo'ob tu'ux cu je'elelo'obo'. Buul seis kiino'ob tu beetajo'ob beyo'.

¹⁵Tu siete kiine' j líiko'ob ma'ili' sáaschajaque' ca tu xíimbaltajo'ob u bakpach le caaj je'el bix u beetico'ob ca'acho', ba'ale' ti' le kiinaco' xíimbalnajo'ob tu bakpach siete u téenel.

¹⁶Le ca tu jóopsajo'ob le paaxo'ob le aj kiino'ob siete u téenelo', Josuee' tu ya'alaj ti' le máaco'obo': ¡Awatnaque'ex! Yuumtzile' dzo'oc u kubic te'ex le caajo'.

¹⁷Le caaj yéetel tuláacal le ba'ax yaan ichilo', bíin láaj xiixcunta'ac, tumen bey dzo'oc u ya'alic Yuumtzil ca beeta'ac. Chéen u cuxtal Rahab le x cáacbach bíin sa'atsa'ac yéetel le máaxo'ob u ta'acbesmajuba'ob tu yotoche', tumen leti'e' tu ta'acbesaj le ch'úuco'ob t túuchi'itaje'exo'obo'.

¹⁸Te'exe' canantaba'ex ma' machique'ex mix ba'al ti' le ba'alo'ob yaan ichil le caajo' tumen dzo'oc u jun páaycunta'al tumen Yuumtzil u ti'al láaj xiixcuntbil, wa ma' ta beetique'ex beyo' je'el a dzáique'ex yáanal loolob t'aan u cúuchil u je'elel Israele', je'el a beetique'ex u loobilta'alo'obe'.

¹⁹Ba'ale' le oro yéetel plata, bey xan le ba'alo'ob bronce yéetel fierro u ca'ajo'obo', bíin jun páaycunta'ac u ti'al Yuumtzil bíin dza'abac tu'ux yaan u ayikalil.

²⁰Le máaco'obo' awatnajo'ob, le paaxo'obo' juumnajo'ob. Le ca j u'uya'ab tumen le j israelitaob u juum le pa'axo'obo', jo'op' u ka'amcach awato'ob, ca jutchaj u tuulumilo'ob le caajo'. Leti'ob túune' tu pulajuba'ob tu yóokol le caajo' ca tu ch'a'ajo'ob'.

²¹Cu dzo'ocole' tu quíimsajo'ob yéetel u yej máascab j xiibo'ob, x co'olelo'ob j táanquelemo'ob yéetel nuxibo'ob, tac xan wacaxo'ob, j tamano'ob bey xan burro'ob. Tuláacal tu xu'ulsajo'ob jun puli'.

²²Josuee' tu ya'alaj ti' le j ch'úuco'ob máaxo'ob xakal xíimbalt le lu'umo': Xeene'ex tu yotoch le x cáacbacho', ca jóokese'ex te'elo' pa'ate' yéetel u láako'ob je'el bix ta jalach t'antilaque'ex ti'e'.

²³Leti'obe' j oocobe' ca tu jóoksajo'ob Rahab, u taata, u maama, u sucu'uno'ob yéetel tuláacal u láako'obe', ca tu bisajo'ob ti' jun p'éel cúuchil tu'ux cu páajtal u p'áatalo'ob ma'alob tu paach u cúuchil u je'elel Israel

²⁴Cu dzo'ocole' Israele' tu tóocajo'ob le caaj yéetel tuláacal le ba'axo'ob yaan ca'acho'. Chéen tu jóoksajo'ob plata, oro yéetel ba'alo'ob bronce yéetel fierro u ca'ajo'obo', ca tu dzajo'ob tu'ux yaan u ayikalil Yuumtzil.

²⁵Ba'ale' Josuee' tu sa'atsaj u cuxtal Rahab yéetel u láaktzilo'obe', tumen leti'e' tu ta'acbesaj le aj ch'úuco'ob túuchi'itabo'ob tumen Josué Jericoo'. Líikbal ti' le kiinaco' u ch'i'ibalo'ob Rahabe', cajlajo'ob ichil le j israelitaobo'.

²⁶Cu dzo'ocole' Josuee' jalach t'aanaj beya': Loolob t'anta'an tu yich Yuumtzil le máax bíin yóolt u ca'a uztquint u caajil Jericoe'. Bíin dza'abac u chuun pakilo'ob tu yóokol u nojochil u paal, bey xan bíin dza'abac u jool najilo'ob tu yóokol u j t'uupil u paal.

²⁷Yuumtzile' tu yáantaj Josué, ca j ki'itpaj u péectzilil Josué tuláacal le cúuchilo'.