Read Yucateco Josué 8 Bible Online

Josué 8 - Yucateco bible

Josué 8

¹Yuumtzile' tu ya'alaj ti' Josué: Ma' a ch'a'ic sajaquil mix u lúubul a wóol. Ch'a'a tuláacal a aj ba'atelo'obo', ca xi'iquech a ch'a'a u caajil Hai, tumen tene' bíin in beet a dzáanche'etic u ajawil Hai bey xan u cajnáalilo'ob. U caajilo'ob yéetel u lu'umile' bíin a ti'alinto'ob,

²teche' bíin a beet ti' Hai yéetel u ajawil le ba'ax ta beetaj ti' Jericó yéetel u ajawe', chéen ba'ale' bejela'e' cu p'áatal te'ex u nu'uculo'ob yéetel u yaalako'ob, bey xan le máaxo'ob bíin a dzáanche'ete'exo'. Nu'ucbes jun p'éel ba'atel ca'aliquil naayal u yóolo'ob, ooquen tu paach le caajo'.

³Josue' tu nu'ucbesaj tuláacal u aj ba'atelo'ob u ti'al j binbalo'ob u ch'a'ob u caajil Hai. Tu yéeyaj treinta mil aj ba'atelo'ob, tu túuchi'itajo'ob yéetel áakab

⁴tu ya'alaj ti'ob beya': U'uye'ex ma'alob: xeene'ex tu paach le caajo' ta'acbesaba'ex naadz ti', nu'ucbesaba'ex u ti'al a pulaba'ex tu yóokol.

⁵U yalab le máaco'obo' bíin u nadzuba'ob ti' le caajo', le quéen jóokoc le caaj u pulubáa t óokole', to'one' bíin áalcabnaco'on ti'ob je'el bix t beetilac yáaxo'.

⁶Leti'obe' bíin u ch'a'apachto'ono'ob le quéen áalcabnaco'on ti' le caajo', tumen bíin u tuculto'ob dzo'oc u ca'a beetico'ob c áalcab.

⁷Te'ex túune' bíin jóokoque'ex le tu'ux a ta'acbesmaba'exo', ca ch'a'ique'ex le caajo', tumen Yuumtzil a Kuexe' bin u ca'aj u kub te'ex.

⁸Le quéen dzo'ococ a ch'a'ique'exe', tóoque'ex je'el bix tu ya'alajilac Yuumtzilo'. Tumen bey tu ya'alajilaco'.

⁹Josué túune' tu ya'alaj ti'ob ca jóokoc u binbalo'ob, leti'obe' j bino'ob u ta'acbesmajuba'ob chúumuc ti' Betel yéetel Hai, tu chikin Hai, ca'aliquil Josue' tu máansaj áakab tu cúuchil tu'ux cu je'elelo'obo'.

¹⁰Tu láak kiine', Josuee' j líik jach piknale' ca tu t'anaj tu kaaba' u aj ba'atelo'ob. Cu dzo'ocole' j máan táanil ti'ob, láakinta'an tumen u nuuquilo'ob Israele', ca tu dzajubáa u pulubáa tu yóokol Hai.

¹¹Tuláacal le j xiibo'obo' j náadzo'ob actáan ti' le caajo', ca j je'elo'ob j xaman ti', ca j p'áat le táax lu'umo' chúumuc ti' leti'ob yéetel ti' le caajo'.

¹²Josuee' tu ta'acaj míin cinco mil máaco'ob tu táancoch bejil Betel yéetel Hai, tu chikin le caajo',

¹³beyo' tuláacal le aj ba'atelo'obo', j t'o'oxo'ob ca'a jaatz, jun jaatze' ta'acbesa'abo'ob tu chikin le caajo', u láake' j p'áato'ob tu cúuchil tu'ux cu je'elelo'ob tu xaman. Ti' le áakabo' Josuee' j bin táanil ti'ob tac tu chúumuc le táax lu'umo'.

¹⁴Le ca tu yilaj u ajawil Hai le ba'ax cu yúuchulo', tu lep'cuntaj u yóol yéetel tuláacal u aj ba'atelo'ob u ti'al u puluba'ob u ba'atelto'ob Israel tu táax lu'umil jordán, ma' tu yojéeltaj wa yaan u láak j israelitaob u ta'acbesmajuba'ob ca'ach tu paach le caajo'.

¹⁵Josué yéetel u aj ba'atelo'obe' tu beetajo'ob bey táan u yáalcabo'ob ti'obe', ca j áalcabnajo'ob tu táan Hai tu bejil le x tocoy lu'umo'.

¹⁶Tuláacal túun u aj ba'atelilo'ob Haie' tu yu'ubo'ob u t'aanil u ch'a'apachtico'ob, le ca tu ch'a'apachtajo'ob Josuee', náachchajo'ob ti' le caajo'.

¹⁷Ma' j yanchaj mix jun túul u j xiibil Hai mix Betel ma' u jóokol u ch'a'apacht le j israelitaobo'; ba'ale' ichil u yaamyamil u ch'a'apachtajo'obe' mix máac j p'áat canantic le caajo'.

¹⁸Yuumtzil túune' tu ya'alaj ti' Josué: Dzaj u chíiculal u bino'ob yóokol Hai, tumen bin in ca'aj in kub teech. Josue' tu dzaj u chíiculal tu'ux cu ya'alic ca u puluba'ob tu yóokol.

¹⁹Le máaxo'ob u ta'acbesmajuba'obo' jóoko'ob tu séeblaquile', ca tu pulajuba'ob u ch'a'ob le caajo' ca tu t'abajo'ob.

²⁰Le ca tu sutaj u yicho'ob u j xiibilo'ob Haie', tu yilajo'ob u buudzil le caaj cu líikil tac ca'ano'. Mix tu'ux yanchaj u yáalcabo'ob, tumen le j israelitaob cu yáalcabo'ob ca'ach te x tocoy lu'umo', tu sutuba'ob u ti'al u pulicuba'ob tu yóokolo'ob.

²¹Tumen le ca tu yilaj Josue' yéetel tuláacal le j israelitaob dzo'oc u jóokol le máaxo'ob u ta'acbesmajuba'ob u ch'a'ob le caaj bey xan dzo'oc u t'abico'obo', tu sutuba'ob u puluba'ob tu yóokol Hai.

²²Cu dzo'ocole' le máaxo'ob j ch'a'a le caajo' jóoko'ob, let o'olale' le hailo'obo', j ka'al u beelo'ob tumen ca'a jaatz j israeliltaob, lelo'oba' tu pulajuba'ob tu yóokolo'ob tac ca tu láaj quíimsajo'ob.

²³Chéen u ajawil Hai tu p'atajo'ob cuxa'an, tu machajo'obe' ca tu bisajo'ob ti' Josué.

²⁴Cu dzo'ocol u láaj quíimsico'ob yéetel u yej máascab le hailo'ob jóoko'ob ch'a'apachtico'obo', le j israelitaobo' j suunajo'ob Haie' ca tu láaj quíimsajo'ob le máaxo'ob p'áatalo'obo'.

²⁵Le kiinaco' j quíim u doce mil máaco'ob Hailo'ob, j xiibo'ob yéetel x co'olelo'ob,

²⁶tumen Josuee' ma' jáaw u nu'uctic le ba'atel te j caaj tac ca láaj quíimsa'ab u cajnáalilo'obo'.

²⁷Le j israelitaobo' j p'áato'ob yéetel u ba'alche'ilo'obo' bey xan yéetel le ba'alo'ob yano'ob te j caajo', je'el bix tu ya'alajil Yuumtzil ti' Josuee',

²⁸Josuee' tu tóocaj Haie' ca tu p'ataj x lab caajil jun puli', je'el bix u yila'al tac bejela'o'.

²⁹U ajawil Haie', j ch'uyquinta'ab ti' jun cúul che' tumen Josué tac u yocbal kiin, le ca áakabchaje', tu túuxtaj éemsbile' ca j pu'ul u j quimen wíinclil actáan ti' le caajo', bey xan tu beetaj u much'quinta'al tuunich tu yóokol. Le tuunicho'obo' ti' much'ucbalo'ob tac bejela'e'.

³⁰Josuee' tu beetaj tu witzil Ebal jun p'éel u multuunil kultaj u ti'al Yuumtzil, u Kuil Israel,

³¹je'el bix u ya'almajil Moisés u palitzil Yuumtzil ti' le j israelitaobo', bey xan je'el bix dzíibta'anil tu ju'unil u ya'almaj t'aan Moiseso': Jun p'éel multuunil kultaj ma' póola'an u tuunchilo'obi. Le j israelitaob túuno' tu táanbesajo'ob láaj tóocbil ba'alche'ob tu yóokol u multuunil le kultajo', tu táanbeso'ob xan u quíimsbil ba'alche'ilo'ob ca'a bisajbáil.

³²Cu dzo'ocole' tu táan yich le j israelitaobo', Josuee' tu dzíibtaj ti' u tuunichilo'ob u multuunil kultajo', le a'almaj t'aan tu dzaj Moiseso'.

³³Tuláacal túun le caajo', u ch'i'ibalo'ob Israel bey le j táanxel lu'umilo'obo', tuláacal u nuuquilo'ob, u jo'ol poolilo'ob bey xan u aj ilaj tac poolilo'obe', tu dzajuba'ob tu tzéel u ba'asche'il u nup t'aan Yuumtzil, actáan ti' le aj kiino'ob levitaob máaxo'ob bisic cúuchquelembalil. U ti'al u dza'abal u qui' t'aanil u caajil Israele', táancoche' ti' yanchaj tu witzil Gerizime', u láak táancoche' tu witzil Ebal, je'el bix tu yáax a'alajil Moisés u palitzil Yuumtzile'.

³⁴Cu dzo'ocole' Josuee' tu xocaj tu jujun p'éelil u t'aanilo'ob u ju'unil le a'almaj t'aano', je'el bix le qui' t'aano'obo', bey xan le loolob t'aano'obo'.

³⁵Ma' j yanchaj mix jun p'éel ti' le ba'axo'ob u ya'almaj Moisés tu táan u caajil Israel wa ma' tu xocaj Josueo', u'uya'ab tac tumen u co'olelilo'ob yéetel u mejen paalalilo'ob, bey xan le táanxel lu'umilo'ob cajnáalo'ob ichilo'obo'.