Read Yucateco Josué 9 Bible Online

Josué 9 - Yucateco bible

Josué 9

¹Le ajawo'ob hititaob, amorreob, cananeob, ferezeob, heveob yéetel jebuseobo' tu yojéeltajo'ob le ba'ax dzo'oc u yúuchulo'. (Le ajawo'oba', ti' caja'ano'ob ca'ach tu jáal u chikin u yáalcab ja'il Jordán, ti' le witzo'obo', te j táax lu'umo' yéetel tu jáal u ka'anabil Mediterraneo tac tu lu'umilo'ob Líbano.)

²Tuláacalo'ob túune' tu kax t'antajo'ob u much'cuba'ob u ti'al u ba'ateltico'ob Josué yéetel le j israelitaobo'.

³Ba'ale' le j heveob cajnáalo'ob ca'ach Gabaono', tu yojéeltajo'ob ba'ax tu beetaj Josué ti' u caajilo'ob Jericó yéetel Hai,

⁴ca tu tucultajo'ob u tusico'ob. Tumen j bino'ob bey aj túuchi'obe' tu dzajo'ob yóokol u burro'ob u x lalab nu'ucul u cuucho'ob yéetel u x lalab kéewelilo'ob u dzáico'ob ca'ach u kab uva jach laabtaco'ob, jaatalo'ob yéetel pakacocta'ano'ob;

⁵tu búuquintajo'ob xan x lalab nooko'ob bey xan tu dzajo'ob x lalab xanabo'ob pakacocta'ano'ob, ca tu ch'a'ajo'ob u ti'al j bej chéen chuchul cuuxum waajo'ob.

⁶Le ca j kucho'ob Gilgal tu'ux cu je'elelo'ob Josuee', tu ya'alajo'ob ti' yéetel ti' le j israelitaobo': Ti' náachil lu'um c taal. Beete'ex jun p'éel nup t'aan t éetel.

⁷Le j israelitaobo' tu núucajo'ob ti' le j heveobo': Te'exe' míin naadz way cajane'exe' ma' náach ti' to'oni'; ¿bix túun bíin c beet jun p'éel nup t'aan ta wéetele'exi'?

⁸Ba'ale' leti'obe' tu ya'alajo'ob ti' Josué: To'one' je'el c meyajtque'exe'. Josuee' tu káat chi'itaj ti'ob: ¿Máaxe'exi'? ¿Tu'ux a taale'ex?

⁹Leti'obe' tu núucajo'ob: Sen náach tu'ux c taal, tu yo'olal u sen péectzilil Yuumtzil a Kuexo'. Kucho'on c ojéelt tuláacal ba'ax tu beetaj Egipto,

¹⁰bey xan tuláacal ba'ax tu beetaj ti' le ca'a túul ajawo'ob amorreob tu táanxel tzéelil le Jordano', c káat a'ale' Sehón u ajawil Hesbón yéetel Og u ajaw Basán cajnáalo'ob ca'ach Astarot.

¹¹Let o'olale' u nuuquilo'ob c caajal yéetel c éet caajalo'obe' tu ya'alajo'ob ti' to'on: Ch'a'ex janal u ti'al le bejo', ca xi'ique'ex tu yicnalo'ob. A'ale'ex ti'ob je'el c meyajtico'obe' bey xan c káat c beet jun p'éel nup t'aan yéetelo'ob.

¹²Le ca jóoko'on u ti'al c taalbal c caxte'exe', le waaja' táant u beeta'ale', bejela'e' dzo'oc u cuuxumtal, dzo'oc xan u chuchultal.

¹³U nu'ucul le ukulo'ob xana', túumbentaco'ob ca t chupajo'ob yéetel u kaab uva, bejela'e' dzo'oc u jáatalo'ob. Bey xan dzo'oc u yúuchul ti' c nook yéetel c xanab, tumen le bejo' sen chowac.

¹⁴Le j israelitaobo' tu túuntajo'ob u janalo'ob le gabaonitaobo', ba'ale' ma' káat chi'inajo'ob ti' Yuumtzili'.

¹⁵Josué túune' tu beetaj u nup t'aanil jéedzel tu yéetelo'ob, tu jalach t'antaj ma' bíin u quíimso'obi'; bey xan tu jalach t'antilo'ob u nuuquilo'ob Israel.

¹⁶Tu yóox p'éel kiine' le j israelitaobo' tu yojéeltajo'ob tu tzéelo'ob caja'ano'ob le gabaonitaobo', naadz yanilo'ob ti'ob.

¹⁷Leti'ob túune' j bino'ob u caxanto'ob u caajal le gabaonitaobo', ca j kucho'ob tu caajilo'ob tu yóox p'éel kiin, le caajo'obo' cu kaaba'intico'ob Cafira, Beerot yéetel Quiriat-jearin.

¹⁸Ba'ale' ma' quíimsa'abo'ob tumen le j israelitaobo', tumen u nuuquilo'obe' tu jalach t'antajo'ob tu kaaba' Yuumtzil u Kuil Israel ma' bíin quíimsa'aco'obi'. Let o'olale' le caajo' tutuc chi'inajo'ob tu yo'olal u nuuquilo'ob caaj:

¹⁹Ba'ale' u nuuquilo'ob le caajo' tu ya'alajo'ob: To'one' dzo'oc jalach t'antic ti' Yuumtzil u Kuil Israel ma' bíin c quíimso'obi'. Bejela'e', ma' bíin páatac c beetic mix ba'al ti'obi'.

²⁰Yaan c cha'ic u p'áatalo'ob cuxa'ano'ob, tumen wa c pa'ic c jalach t'aane', Yuumtzile' bíin p'u'ujuc t éetel.

²¹Bey túuno' u nuuquilo'ob Israele' tu ya'alajo'ob ca cha'abac u cuxtalo'ob, ba'ale' ca dzabaco'ob ch'ac si' yéetel púut ja' u ti'al le caajo'. Beyo' u nuuquilo'ob Israele' tu dzo'ocbesajo'ob ba'ax tu jalach t'antajo'ob.

²²Josué túune' tu t'anaj le j gabaonitaobo' ca tu káat chi'itaj ti'ob: ¿Ba'axten ta tusajo'one'ex úuchic a wa'alique'ex náach a taale'ex wa ti' cajnáale'ex way naadze'?

²³Tu yo'olal lela' bíin p'áataque'ex yáanal loolob t'aan, mantadz kiino'ob bíin a beete'ex a palitzilile'ex. Yaan a ch'aquique'ex si' yéetel yaan a jóoksique'ex le ja' kabéet u ti'al u yotoch in Kuo'.

²⁴Leti'obe' tu núucajo'ob ti' Josué: To'one' t beetaj beyo', tumen sen sajacchajo'on ti' teech tumen je'el a quíimsico'one', to'one' t ojéeltaj Yuumtzil a Kue' tu ya'alaj ti' Moisés u palitzil, bíin u dzáa ti' te'ex tuláacal le cúuchila', yéetel ca u láaj quíims le máaxo'ob cajnáalo'ob waye'.

²⁵Ba'ale' ti' yano'on ta kabe'; beet t éetel le ba'ax ca tucultic ma'alobe'.

²⁶Josuee', ma' tu cha'aj u quíimsa'al le gabaonitaob tumen le j israelitaobo',

²⁷ba'ale' tu ya'alaj ca dzabaco'ob j ch'ac si' yéetel púut ja' u ti'al le caajo' bey xan u ti'al Yuumtzil, ti' le cúuchil bíin u yéey Yuumtzile'. Tac bejela'e', le j gabaonitaobo', leti' le meyaj cu beetico'obo'.