Read Yucateco 2 Tesalonicenses 3 Bible Online

2 Tesalonicenses 3 - Yucateco bible

2 Tesalonicenses 3

¹Tu dzooque', sucu'une'ex, payalchi'inene'ex t o'olal, u ti'al ca kuchuc séeba'an tuláacal tu'ux u ma'alob péectzil Yuumtzil, yéetel ca ka'amac yéetel utzil je'el bix úuchic ichile'exo'.

²Payalchi'inene'ex xan u ti'al ca to'ococo'on ti' máaco'ob kasa'ano'ob yéetel loochol u tuuculo'ob, tumen ma' ti' tuláacal yaan ocsaj óolali'.

³Ba'ale' Yuumtzile' chuca'an u yóol, leti' túun cun u beet a jéedzel páajtale'ex yéetel cun u canante'ex ti' kaas.

⁴C dzaama c alab óolal ti' Yuumtzile' te'exe' táan a beetique'ex yéetel táan u bin a beetique'ex le ba'ax c a'almaj te'exo'.

⁵Yuumtzil ca u yáam te'ex u ti'al ca a wu'uye'ex u yaacunaj Ku yéetel ca yanac te'ex u chuca'an óolal Cristo.

⁶Sucu'une'ex, c a'alic te'ex tu kaaba' Yuumtzil Jesucristoe', ca a tzelaba'ex ti' je'el máacalmáac sucu'unil ma' u káat meyaji', wa ti' le máax ma' u cuxtal je'el bix le ca'ansajo'ob dzo'oc c dzáaic te'exo'.

⁷Tumen te'exe' a wojele'ex bix unaj a cuxtale'ex u ti'al a beetique'ex je'el bix t beetaj to'one'; to'one' ma' cuxlajo'on ichile'ex x ma' meyajili',

⁸yéetel ma' t jaantaj u yo'och mix máac wa ma' c bo'otiqui'. Ma' beyi', ba'ale' meyajnajo'on yéetel mukul muuknajo'on yéetel kiin bey xan yéetel áakab u ti'al ma' c dzaíc u cuuch mix jun túul ti' te'ex.

⁹Quex yaan to'on u páajtalil ca wáanto'one'exe', ba'ale' j meyajnajo'on u ti'al c e'esic te'ex bix unaj a cuxtale'ex.

¹⁰Tumen le ca anji'on ta wéetele'exe', t dzaj te'ex le tzol t'aana': Le máax ma' u káat meyaje', ma' u janal xan.

¹¹Tumen cu ya'ala'al to'one' dze'edzec ti' te'exe' cuxa'ano'ob x ma' meyajil, jach u kubmajuba'ob u ti'al ma' u beetico'ob mix ba'al, wa chéen u ti'al u yocsicuba'ob ti' yaanal ba'alo'ob.

¹²Ti' le cuxa'ano'ob beyo' c a'alic yéetel c kubentic ti'ob, tu yo'olal u páajtalil c Yuumtzil Jesucristoe', ca meyajnaco'ob yéetel jéedzel óolal u ti'al ca u náajalto'ob ba'al u jaanto'ob.

¹³Sucu'une'ex, ma' a ca'anle'ex a beete'ex utz.

¹⁴Wa yaan máax ma' táan u yu'ubic ba'ax c a'alic ti' le ju'una', ile'ex máaxi', bey xan ma' u yantal mix ba'al a wile'ex yéetel, u ti'al ca u ch'a'a subtal.

¹⁵Ba'ale' ma' a wilique'ex bey jun túul enemigoe', ba'ax a beete'exe' tzole'ex u xiquin bey jun túul sucu'une'.

¹⁶U Yuumtzil le jéedzel óolalo' ca u dzáa te'ex jéedzel óolal tuláacal kiin yéetel ti' jejeláas bixilo'ob. Yuumtzil ca yanac ta wéetele'ex tuláacale'ex.

¹⁷Teen Pabloe', quin dzíibtic te'ex le tziiquil t'aana' yéetel in kab. Bey in beetic ti' tuláacal in dzíibil ju'uno'ob. Bey in dzíibo'.

¹⁸U siibal utzil c Yuumtzil Jesucristoe' ca yanac ti' tuláacale'ex.