Read Yucateco 1 Timoteo 2 Bible Online

1 Timoteo 2 - Yucateco bible

1 Timoteo 2

¹Yáax táanile' quin kubentic ca a káate'ex ti' Yuum le ba'axo'ob kaabéeto', ca payalchi'inaque'ex, ca káat óolnaque'ex yéetel ca a dza'ex nib óolal ti' tu yo'olal tuláacal máaco'ob.

²Unaj u yúuchul payalchi' tu yo'olal le máaxo'ob cu beetic u nojochilo'obo' yéetel tu yo'olal tuláacal le jalach wíinico'obo'. u ti'al ca páatac c cuxtal ich qui' óolal yéetel jéedzel óolal, jun p'éel cuxtal kuba'an ti' Yuum Ku yéetel tziquilbe'en ti' je'el ba'alaque'.

³Lela' ma'alob yéetel utz tu t'aan Ku c Tocsajil,

⁴tumen leti'e' u káat ca to'ococ tuláacal máaco'ob yéetel ca kuchuc u chuca'an kaj óolto'ob le jaajo'.

⁵Yaan chéen jun túulili' Junab Ku, jun túulili' xan máax cu páajtal u dzáic ma'alobil tuláacal máac tu táan Yuum Ku: Jésucristo.

⁶Jesucristoe' tu kubjubáa ti' quíimil u ti'al u bo'otic u tojol u tocsajil tuláacal máaco'ob lela' j dza'ab ojéeltbil jach tu kiinil.

⁷U ti'al lela' dza'anen bey jun túul j tze'ec, yéetel apóstol, u ti'al in ca'ansic le ocsaj óolalo' yéetel le jaajilo' ti' le máaxo'ob ma' judíobo'; je'el bix jun túul u j ocsaj óol Cristoe' quin wa'alic u jaajil ma' tin tuus.

⁸Le o'olal in káate' tuláacal tu'ux ca payalchi'inac máaco'ob, táan u líiksico'ob quili'ich kabo'ob x ma' kuuxilil mix yéetel ba'atel t'aano'obi'.

⁹Bey xan le co'olelo'obo' ca u búuquinto'ob kambe'en nooko'ob, yéetel ch'a'a subtalil bey xan yéetel cabal óolal ca u jadzutzquintuba'ob ma' yéetel niqui' xáache'eta'al u tzo'otzel pooli' mix yéetel oroi', perlaob wa co'ocoj nookobi,

¹⁰ba'ale' yéetel ma'alob meyajo'ob, je'el bix unaj u beetico'ob le co'olelo'ob dzo'oc u jun páaycunticuba'ob u ti'al Kuo'.

¹¹Le co'olelo'obo' x ma' t'aanil unaj u yu'ubico'ob le tzol xiquino'obo' yéetel tuláacal cabal óolal.

¹²Tumen ma' tin cha'ic u ca'ansaj le co'olel tu táan máaco'obo', mix ca yanac páajtalil ti' tu yóokol xiib, ba'ale' unaj u maquic u chi'.

¹³Tumen Kue' yáax táanil tu beetaj Adan, cu dzo'ocole' ca tu beetaj Eva;

¹⁴Adane' ma' j tu'usi' ba'ale' le co'olelo', le ca j táabsa'abe', j lúub ti' keban.

¹⁵Ba'ale' le co'olelo' bíin to'ococ iquil u síijsic u paalal, wa cu p'áatal ti' ocsaj óolal, yaacunaj, quili'ichil, bey xan yéetel cabal óolal.