Read Yucateco 1 Timoteo 3 Bible Online

1 Timoteo 3 - Yucateco bible

1 Timoteo 3

¹Lela' jach jaaj: Wa yaan máax cu dzíiboltic u beet u obispoile' jun p'éel ma'alob meyaj u káat u beete.

²Le o'olale', le máax yaan u meyajil obispo ti'e', unaj u cuxtal jach ma'alob u ti'al ma' u yantal mix ba'al o'olal u ke'eyel, dzoca'an u beel chéen yéetel jun túulili' co'olel yéetel unaj u cuxtal x ma' báaxal óolil, yéetel toj tuuculil bey xan yéetel tziquilbe'enil. Ca u kam u'ulabo'ob tu yotoch; ma'alob xan u ti'al ca'ansaj;

³ma' unaj u cáaltali' mix u caxan ba'ateli', mix u yóoltic ca yanac taakin ti' chéen beyo'. Ba'ale' unaj u yantal utzil pucsi'ikal ti', jedzel u yóol yéetel ma' u dzaamaj u tuucul chéen ti' taakini'.

⁴Unaj u yojel u nu'uct ma'alob u beel u yotochnáalo'ob, yéetel ca u beetic u yu'ubaj t'aan u paalalo'ob yéetel ca tziquilnaco'ob;

⁵tumen wa jun túul máac ma' u yojel u nu'uct u beel u yotochnáalo'obe' ¿bix je'el u páajtal u canantic u Iglesia Kue'?

⁶Le obispo túuno' unaj ma' táant u yocsaj óolale', bic ca'analchajac u yiche' ca lúubuc ti' le xot kiin lúubic kasilba'alo'.

⁷Bey xan unaj ca tzi'iquic ichil le máaxo'ob ma' j ocsaj óolo'obo', u ti'al ma' u lúubul kaasil yéetel ma' u lúubul ti' u léech kasilba'al.

⁸Bey xan le diacono'obo' unaj tziquilbe'en máaco'ob ma' unaj u p'áatal ma' u beetico'ob ba'ax cu ya'alico'obi', mix u cáaltalo'ob, mix u yóoltico'ob taakin ma' u náajaltmo'ob ma'alobi'.

⁹Unaj u yantalo'ob mantadz ti' le jaaj chíicbesa'an dzo'oc c ocsaj óoltico' yéetel jun p'éel ma'alob tuucul.

¹⁰Unaj u yila'al wa ma'alobo'ob u ti'al le meyajo', cu dzo'ocole', wa mina'an u si'ipilo'obe', cu páajtal u beetic u diaconoilo'ob.

¹¹Le co'olelo'obo' unaj xan tziquilbe'eno'ob, ma' x líiksaj t'aano'obi', ma' x báaxal óolo'obi', chuca'an u yóolo'ob ti' tuláacal.

¹²Jun túul diaconoe' unaj dzoca'an u beel chéen yéetel jun túulili' co'olel, yéetel unaj u yojel u nu'uct ma'alob u beel u paalalo'ob yéetel u yotoch.

¹³Tumen le diacono'ob cu beetico'ob ma'alob u meyajo'obo', cu náajaltico'ob jun p'éel tziquilbe'en cúuchil yéetel cu yantal ti'ob asab kub óolal u ti'al u t'aano'ob tu yo'olal u yocsaj óolalo'ob ti' Cristo Jesús.

¹⁴Quin pa'atic in bin séeba'an in wilech; ba'ale' quin dzíibtic teech lela'

¹⁵u ti'al, wa ca xáanaquene', ca a wojéelt bix unaj u cuxtal jun túul máac ichil u paalalo'ob Ku, u káat u ya'ale', u Iglesia le cuxa'an Kuo', u yocmil yéetel u chuunpakil le jaajo'.

¹⁶Jach tu jaajil u ta'acbil ba'alo'ob c ocsaj óolale' jach nojoch: Kue' tu chíicbesubáa je'el bix jun túul máaque'; j a'ala'ab j toj tumen le Quili'ich Pixano' yéetel j ila'ab tumen le ángelo'obo'. J tze'ecta'ab ti' le máaxo'ob ma' judíobo', j ocsaj óolta'ab yóokolcaab yéetel j ka'am te j ca'ano'.