Read Yucateco 1 Timoteo 5 Bible Online

1 Timoteo 5 - Yucateco bible

1 Timoteo 5

¹Ma' a keyic le máax dzo'oc u ch'íijilo'; ba'ale' tzol u xiquin bey je'el bix a taatae; yéetel bisabáa yéetel le máaxo'ob táanquelemo'obo' bey je'el bix a sucu'uno'obe'.

²Bisabáa yéetel le co'olelo'ob dzo'oc u ch'íijilo'obo' bey je'el bix a maamae', bey xan yéetel le x ch'úupalo'obo' bey je'el bix a quiico'obe', yéetel tuláacal ma'alob tuucul.

³Áant le x quimen íichamo'ob jach tu jaajil óotzilo'obo'.

⁴Ba'ale' wa jun túul x quimen íicham yaan u paalal wa u yaabilo'obe', lelo'oba' unaj u canico'ob táanile' u táan óolt u láaktzilo'ob, yéetel u sutico'ob le yaacunaj tu kamajo'ob ti' u taataobo', tumen lela' ma'alob yéetel kambe'en tu táan Ku.

⁵Le co'olel jach tu jaajil x quimen íichamo', máax dzo'oc u p'áatal tu juunalo', cu dzáic u alab óolal ti' Yuum Ku yéetel ma' tu jáawal u payalchi' yéetel kiin bey xan yéetel áakab.

⁶Ba'ale' le x quimen íicham cu kubicubáa ti' u qui'imac óolalilo'ob yóokolcaaba' quex cuxa'ane' quimen yanil.

⁷Ca'ans ti'ob le ba'alo'oba', u ti'al ma' u yantal ba'ax o'olal u ke'eyelo'ob.

⁸Tumen wa yaan máax ma' tu táan óoltic u láaktzilo'obe', asab le u yotochnáalo'obo', dzo'oc u mixba'alcuntic le ocsaj óolalo' yéetel asab kaas yanil ti' le máax ma' tu yocsaj óolo'.

⁹Te tu'ux cu dzíibta'al u kaaba' le x quimen íichamo'obo' unaj u dzíibta'al chéen le máax sesenta u ja'abilo'ob wa maanalo' yéetel chéen le yanchaj jun túulili' u yíichamo'.

¹⁰Unaj kaj óola'an tu yo'olal u yutzil meyajo'ob; wa u líiksmaj u paalal, wa tu utzil kamaj le máaxo'ob cu kuchulo'ob tu taanajo', wa u meyajtmaj yéetel cabal óolal le sucu'uno'ob ti' le ocsaj óolalo', wa u yáantmaj le máaxo'ob cu mukyajo'obo', yéetel wa u beetmaj je'el máacalmáac u láak ma'alob meyaje'.

¹¹Ba'ale' ma' a dzíibtic u kaaba' le x quimen íichamo'ob x lo'obayano'obo'; tumen le quéen u tzeluba'ob ti' Cristo tu yo'olal u dzíibolalo'obe', u káato'ob dzo'ocol u beelo'ob tu ca'a téen,

¹²cu yantal túun u si'ipilo'ob tumen ma' tu dzo'ocbesico'ob ba'ax u ya'almajo'ob.

¹³Bey xan wa cu máano'ob chi'ichi' najile' cu ma'akóoltalo'ob, ma' chéen cu ma'akóoltalo'obi', ba'ale' cu suuto'ob x líiksaj t'aano'ob, cu yocsicuba'ob ti' tuláacal ba'al yéetel cu ya'alico'ob ba'al ma' unaji'.

¹⁴Le o'olal in káate' le x quimen íichamo'ob x lo'obayano'obo' ca dzo'ococ u beelo'ob, ca yanac u paalalo'ob, ca u táan óolt u taanajo'ob, yéetel ma' u dzáico'ob tu'ux u ya'ala'al ba'al tumen u enemigo'.

¹⁵Tumen yaan dze'edzec x quimen íichamo'ob dzo'oc u tzelcuba'ob yéetel dzo'oc u bino'ob tu paach Satanás.

¹⁶Wa jun túul j ocsaj óolal, xiib wa co'olel, yaan x quimen íichamo'ob ichil u láaktzilo'obe', unaj u yáantico'ob yéetel ma' unaj u cha'ic u p'áatal le cuuch tu yóokol le Iglesiao'. Beyo' le Iglesiao' cu páajtal u yáantic le x quimen íichamo'ob jach tu jaajil kaabéet u yáantalo'obo'.

¹⁷Le anciano'ob cu táan óoltico'ob ma'alob le Iglesiao' unaj u kamico'ob ca'ajmat tziquil, táanilbe'eno'ob le máaxo'ob cu tze'eco'obo' yéetel le máaxo'ob cu ca'ansajo'obo'.

¹⁸Tumen le Quili'ich Dzíibo' cu ya'alic: Ma' a dzáic jok ni' ti' le wacax cu meyaj ichil a pakalo'. Bey xan: Jun túul j meyaje' cu najmatic u bo'ota'al.

¹⁹Ma' a beetic u cuentail le tac poolo'ob cu beeta'al tu contra jun túul anciano' wa mina'an ca'a túul wa óox túul jaajcuntico'.

²⁰Ba'ale' le máaxo'ob ma' tu p'atico'ob u kebano'obo', unaj a keyico'ob tu táan tuláacal, u ti'al ca u ch'a'ob sajaquil le u láako'obo'.

²¹Quin kubentic teech tu táan Ku yéetel tu táan Yuumtzil Jesucristoe', bey xan tu táan u ángelo'ob u yéeymaje', ca a dzo'ocbes le kuben t'aano'oba' x ma' chíin poolil yéetel yéeyajil u ti'al mix máac.

²²Ma' a téec dzáic a kab tu yóokol mix máac, beyo' ma' tu yantal ba'al a wil yéetel u kebano'ob u láako'ob; tzelabáa ti' tuláacal kaas.

²³Tumen mantadz koja'anech ti' a nake', ma' a wukic chéen ja', ba'ale' uk jun p'íit vino xan.

²⁴U keban dze'edzec máaco'obe' cu yila'al jach t'áalcab ma'ili' xi'ico'ob u ti'al ca p'is óolta'aco'obi', ba'ale' ti' u láako'obe' ma' tu yila'al p'is u dzo'ocol u p'is óolta'alo'obe'.

²⁵Bey xano', le ma'alob meyajo'obo' t'áalcab u yila'alo'ob; yéetel quex ma' u yila'alo'obe' ma' tu páajtal u p'áatal ta'aca'an mantadz.