Read Yucateco 1 Timoteo 6 Bible Online

1 Timoteo 6 - Yucateco bible

1 Timoteo 6

¹Le máaxo'ob palitzilo'obo' unaj u yantal nojoch tziquil ti'ob u ti'al u dzuulilo'ob, u ti'al ma' u kaakas t'anta'al u kaaba' Ku mix c ca'ansaj.

²Wa le palitzilo'ob yaan u dzuulilo'ob j ocsaj óolo'obo', ma' unaj u jáawal u tziquiltico'ob chéen tumen u sucu'uno'ob ti' le ocsaj óolalo'. Ba'ale' unaj u meyajtico'ob asab ma'alob; tumen le máaxo'ob kamic u ma'alob meyajo'obe' j ocsaj óolo'ob yéetel sucu'untzilo'ob yaabila'ano'ob. Ca'anse yéetel tze'ect xan lela'.

³Wa máax cu ca'ansic yaanal ba'alo'ob ma' queet yéetel u ma'alob t'aano'ob c Yuumtzil Jésucristo, mix yéetel u ca'ansajil c ocsaj óolale',

⁴jun túul j ca'anal ich mixba'al u yojel. Yaan ti'e' u koja'anil t'anal t'aan tu yo'olal chéen cunel t'aano'ob; ti' lela' cu taalo'ob kaakas dzíibolalo'ob, ba'atelilo'ob, pooch'ilo'ob, x ma' alab óolalo'ob

⁵yéetel ba'atelo'ob mina'an u xuul ichil máaco'ob kasa'an u tuuculo'ob yéetel ma' u kaj óolo'ob le jaajo', yéetel cu tucultico'obe' u biilal le ocsaj óolalo' u ti'al u náajalta'al taakin. Tzelabáa ti' le máaxo'ob beyo'obo'.

⁶Tu jaajile' le ocsaj óolalo' jun p'éel nojoch náajal ba'ale' u ti'al le máax qui'imac u yóol yéetel le ba'ax yaan ti'o'.

⁷Tumen mixba'al t taasaj way yóokolcaabe', mixba'al xan cu páajtal c bisic;

⁸ba'ale' wa yaan to'on janal yéetel nooke, yéetel lelo' unaj qui'imactal c óol.

⁹Ba'ale' le máaxo'ob u káato'ob ayikaltalo', cu lúubulo'ob ti' le túuntaj óolalo' yéetel ti' u sat óolil ya'abcach chéen cunel dzíibolalo'ob cu lobiltico'ob máac yéetel cu bisico'ob máac ti' kascunajil yéetel ti' xu'ulsajil.

¹⁰Tumen u yaacunaj le taakino' u mootz tuláacal u jejeláasil kaas; yaan dze'edzec máaque' tu yo'olal u dzíiboltico'obe', dzo'oc u tzeelicuba'ob ti' le ocsaj óolalo' yéetel dzo'oc u chupico'ob yéetel yaayaj óolal u cuxtalo'ob.

¹¹Ba'ale' teche', jun túulech j xiib a kubmabáa ti' Kue', púudzen ti' tuláacal le ba'alo'oba'. Bis jun p'éel toj cuxtal yéetel kub óolal ti' Ku, yéetel ocsaj óolal, yaacunaj, chuca'an óolal, bey xan cabal óolal.

¹²Ba'atelt u ma'alob ba'atelil le ocsaj óolalo'; mach le cuxtal mina'an u xuulo', tumen Kue' tu t'anajech u ti'al lelo', yéetel dzo'oc a wa'alic jach ma'alob ba'ax a wocsaj óolal tu táan ya'abcach jaajcunajo'ob.

¹³Beora', tu táan Ku, máax cu dzáic cuxtal ti' tuláacal ba'ax yane, yéetel tu táan Jésucristo, máax tu ya'alaj ba'al jaaj tu táan Poncio Pilatoe', quin kubentic teech

¹⁴ca a dzo'ocbes ba'ax quin wa'alic teech, ma' a kexic, u ti'al ma' u yantal ba'ax o'olal a ke'eyel, tac quéen taalac c Yuumtzil Jésucristo.

¹⁵Le quéen kuchuc jach tu kiinile', Ku bíin u dzo'ocbes lela', tumen chéen leti' le jun túulili' Ku qui'iqui' t'anta'ano' yéetel yaan tuláacal páajtalil ti'o', u Ajaw ajawilo'ob yéetel u Yuumtzil yuumtzilo'ob.

¹⁶Chéen leti' máax ma' tu quíimil máax cuxa'an ti' sáasil tu'ux mix máac cu páajtal u nadzicubai'. Mix jun túul máac ilmail mix cu páajtal u yilic. Le tzicbe'enilo' u ti'al leti' bey xan le páajtalil u ti'al kiino'ob mina'an u xuulo'. Amén.

¹⁷Le máaxo'ob yaan u ayikalil yóokolcaab ti'obo', túuxt ti'ob ma' u ca'analtal u yicho'ob, mix u dzáico'ob u alab óolalo'ob ti' le ayikalilo', tumen jach máanalbe'en. Ba'ale' ca u dza'ob u alab óolalo'ob ti' le cuxa'an Kuo' máax dzáic to'on tuláacal ba'al jach ya'ab u ti'al utzil.

¹⁸Ca u beeto'ob utz, ca ayikalchajco'ob ti' ma'alob meyajo'ob yéetel ca yanac u pucsi'ikalil ti'ob u dzáico'ob le ba'ax yaan ti'obo'.

¹⁹Beyo' bíin yanac ti'ob le ayikalil cu dzáic tu'ux u jéedzelo'ob ma'alob u ti'al le kiino'ob bíin taalaco', yéetel bíin u macho'ob le cuxtal mina'an u xuulo'.

²⁰Timoteo, canant le ba'ax dzo'oc in kubentic techa'. Ma' a wu'uyic chéen cunel yéetel lu'umcabil t'aano'ob, mix u sacach t'aanilo'ob le ba'ax yéetel tuus cu kaaba'intic kaj óolalo'.

²¹Tumen yaan dze'edzec máaxo'ob cu bino'ob tu paach le kaj óolala' dzo'oc u tzelcuba'ob ti' le ocsaj óolalo'. Ca yanac teech siibal utzil.