Read Yucateco 2 Timoteo 2 Bible Online

2 Timoteo 2 - Yucateco bible

2 Timoteo 2

¹Teche', in paal, mu'uka'anchajquech ti' le siibal utzil yaan ti' to'on tu yo'olal nupa'anilo'on ti' Cristo Jesuso'.

²Le ba'ax dzo'oc a wu'uyic in wa'alic tu táan ya'abcach jaajcunajo'obo', kubent ti' máaco'ob cu páajtal a kubic a alab óolal ti'ob, máaxo'ob cu páajtal xan u ca'ansico'ob ti' u láako'ob.

³Teech túune' mukyajt tin wéetel le yaayaj óolalo'obo' je'el bix jun túul ma'alob soldado Jésucristoe'.

⁴Mix jun túul soldado' wa táan u meyaje' cu kaxicubáa yéetel u ba'aluba'ob le cuxtala', u ti'al ca páatac u lúubul utzil tu táan le máax t'aan u ti'al u beetic u soldadoilo'.

⁵Bey xan le máax táacpaja'an ti' le báaxalo'obo' ma' tu páajtal u kamic mix jun p'éel siibal wa ma' tu báaxal jach je'el bix nu'ucta'ano'.

⁶Le máax cu meyajtic le lu'umo' leti' táanil cu najmatic u kamic u yich le joocho'.

⁷Tucult le ba'ax quin wa'alic techa', Yuumtzil cun u beet a na'atic tuláacal.

⁸Ka'ajac teech Jésucristo, le máax ca'a púut cuxlaj ti' le quíimilo', yéetel máax ti' u ch'i'ibal ajaw David u taal, je'el bix le ma'alob péectzil quin tze'ectico'.

⁹Tu yo'olal le ma'alob péectzila' quin mukyajtic yaayaj óolalo'ob, tac iquil kaxa'anilen yéetel cadenaob je'el bix jun túul j quiimsaj wíinique'; ba'ale' u t'aan Kue' ma' kaxa'an yéetel cadenaobi'.

¹⁰Le o'olal quin mukyajtic tuláacal u ti'al u yutzil le máaxo'ob yéeya'ano'ob tumen Kuo', u ti'al ca yanac ti'ob xane' le tocsajil cu taal tu yo'olal nupa'anilo'on ti' Cristo Jesuso' yéetel nojbe'enil mina'an u xuul.

¹¹Lela' jach jaaj: Wa dzo'oc c quíimil tu yéetele', yaan c cuxtal tu yéetel xan.

¹²Wa c mukyaje' yaan c ajawil tu yéetel xan. Wa c cúulpachcuntique', leti'e' yaan u cúulpachcuntico'on xan.

¹³Wa ma' tu chúucpajal c óole', leti'e' cu p'áatal chuca'an u yóol, tumen Kue' ma' tu páajtal u cúulpachcunticubáa tu juunal.

¹⁴Ka'ajes ti'ob lela', yéetel kubent ti'ob tu táan Yuumtzile' ma' u ba'atel t'aano'ob tu yo'olal chéen cunel t'aano'ob. Le ba'atel t'aano'oba' mixba'al u bilalo'ob; ba'ax cu beetico'obe' u kascuntico'ob le máaxo'ob cu yu'ubajo'obo'.

¹⁵Dzáa a wóol a wantal tu táan Ku je'el bix jun túul j meyaj kambe'en, mina'an ba'ax o'olal u ch'a'ic subtale', tumen cu tzolic ma'alob u t'aanilo'ob le jaajo'.

¹⁶Tzelabáa ti' chéen cunel yéetel lu'umcabil t'aano'ob, tumen le ba'alo'oba' cu bisico'ob máac jujun p'íitil ti' le kaaso',

¹⁷yéetel u ca'ansajo'obe' cu bin u janal je'el bix le cancero'. Leti' le ba'ax cu yúuchul yéetel Himeneo yéetel Fileto,

¹⁸máaxo'ob dzo'oc u tzelicuba'ob ti' le jaajo' tumen táan u ya'alico'obe' dzo'oc u yúuchul le ca'a púut cuxtalo', táan u máano'ob beyo' u xa'aktico'ob u yocsaj óolalo'ob dze'edzec máaco'ob.

¹⁹Ba'ale' Kue' u dzaamaj jun p'éel chuunpak jéedzel yanil, ti' lela' yaan jun p'éel chíicul cu ya'alic beya': Yuumtzile' u kaj óol le máaxo'ob u ti'alo'; bey xan tuláacal le máax cu ch'a'a chi'itic u kaaba' Cristoe' u tzelubáa ti' le kaaso'.

²⁰Ti' jun p'éel nojoch naje', ma' chéen yaan nu'uculo'ob beeta'an yéetel oro wa yéetel platai, ba'ale' yaan xan beeta'an yéetel che'i' bey xan yéetel kati'; dze'edzeco'obe' u ti'al u meyajo'ob ti' wa ba'ax tzicbe'enil, u láako'obe' u ti'al u meyajo'ob sáamsamal.

²¹Bey túuno' wa cu tzelicubáa máac ti' tuláacal ba'al kaase', je'el u meyaj je'el bix le nu'ucul u ti'al tzicbe'enilo' jun páaycunta'an yéetel yaan u biilal ti' Yuumtzil kabéetcunta'an u ti'al tuláacal ma'alob meyaj.

²²Púudzen túun ti' u kaakas dzíibolalo'ob le táanquelemilo' yéetel xeen tu paach jun p'éel toj cuxtal, yéetel ocsaj óolal, yaacunaj bey xan jéedzel óolal, jun múuch' yéetel tuláacal le máaxo'ob cu ch'a'a chi'itico'ob u kaaba' Yuumtzil yéetel tuláacal u pucsi'ikalo'obo'.

²³Tzelabáa ti' le t'anal t'aano'ob mina'an mix u pool mix u yooco'; dzo'oc a wojéeltique' cu taasico'ob ba'atelil.

²⁴Tumen u palitzil Yuumtzile' ma' unaj u máan ti' ba'altelilo'obi'; ba'ale' unaj utz u pucsi'ikal u ti'al tuláacal. Unaj ma'alob u ti'al ca'ansaj, yéetel chuca'an u yóol.

²⁵Ca u jóoks ti' ma'alob bej yéetel cabal óolale' le máaxo'ob chich u pucsi'ikalo'obo', táan u alab óoltique' ca ke'exec u tuuculo'ob tumen Kue' yéetel ca u kaj óolto'ob u jaajil,

²⁶u ti'al ca ajaco'ob yéetel ca púudzuco'ob ti' le léech tu'ux kala'ano'ob tumen kasilba'alo' u ti'al u beetic tu yéetelo'obe' le ba'ax u káate'.