Read Yucateco 2 Timoteo 3 Bible Online

2 Timoteo 3 - Yucateco bible

2 Timoteo 3

¹Bey xan unaj a wojéeltique' ti' u dzo'oc ja'abo'obe' bíin taalac talam kiino'ob.

²Máaco'obe' bíin dzu'utchajco'ob, bíin u yaabilto'ob taakin, bíin ca'analchajac u yicho'ob yéetel bíin u nojba'alcunsuba'ob. Bíin t'aanaco'ob tu contra Ku, ma' túun u yu'ubo'ob u t'aan u taataob, ma' túun u dza'ob nib óolal yéetel ma' túun u tziquilto'ob u ma'alob cuxtalil le ocsaj óolalo'.

³Ma' túun yantal u yaacunajo'ob mix u ch'a'a óotzililo'ob, bíin u beeto'ob u j líiksaj t'aanilo'ob, ma' túun páajtal u dzáanche'etico'ob u kaakas dzíibolalo'obi', bíin jach kasa'anchajac u pucsi'ikalo'ob yéetel bíin u p'ecto'ob tuláacal ba'al ma'alob.

⁴Bíin u cúulpachcunto'ob máac, bíin u yocsuba'ob tu'ux ma' unaji', chuupo'ob yéetel nonojbáil, bíin u yaabilto'ob u kaakas dzíibolalo'ob ba'ale' ma' bin u yaabilto'ob Kui'.

⁵Bíin u beeto'ob jach ma'alob ba'ax chéen u yo'ocabil le ma'alob cuxtalo', ba'ale' bíin u cúulpachcunto'ob u páajtalil le ma'alob cuxtalo'. Ma' a wocsicabáa yéetel le máaco'ob beyo'obo'.

⁶Tumen ichilo'obe' yaan le máaxo'ob cu jupicuba'ob ti' le najo'obo' yéetel cu tusico'ob le co'olelo'ob luba'an u muuko'ob yéetel chuupo'ob yéetel kebano'. Lelo'oba', tumen táan u jíilta'alo'ob tumen u jejeláasil kaakas dzíibolalo'obe',

⁷mantadz táan u canbalo'ob ba'ale' ma' táan u kuchul u na'atico'ob le jaajo'.

⁸Bey túun je'el bix le j wáayo'ob Janes yéetel Jambres yanji'ob tu contra Moisese', bey xan le máaco'obo' cu yanta'alo'ob tu contra le jaajo'. Máaco'ob dzo'oc u kastal u tuuculo'ob, ma' kambe'eno'ob ti' tuláacal ba'ax yaan u yil le ocsaj óolalo'.

⁹Ba'ale' ma' bíin xi'ico'ob náachili', tumen u x ma' na'atilo'obe' bíin kaj óolta'ac tumen tuláacal máac je'el bix úuchic ti' le ca'a túulo'ob yanji'ob tu contra Moiseso'.

¹⁰Ba'ale' teche' dzo'oc a bin ma'alob tu paach in ca'ansajo'ob, ti' bix in cuxtal, ti' ba'ax in káati', ti' in wocsaj óolal, ti' in chuca'an óolal, ti' in yaacunaj yéetel ti' tuláacal ba'ax dzo'oc in mukyajtic,

¹¹le ca j ch'a'apachta'aben yéetel le ca j yanchaj in mukyajo'. A wojel tuláacal ba'ax úuch teen tu caajilo'ob Antioquía, Iconio yéetel Listra, yéetel le ch'a'apachtajilo'ob tin mukyajtajo'; ba'ale' Yuumtzile' tu tocajen ti' tuláacal lelo'.

¹²Tumen tu jaajile' tuláacal le máaxo'ob u káato'ob cuxtal u kubmaj u yóolo'ob ti' Cristo Jesuse' yaan u mukyajtico'ob ch'a'apachtajilo'ob.

¹³Ba'ale' le máaxo'ob kasa'ano'obo' yéetel le cu tuuso'obo' bíin xi'ico'ob ti' kaas tac tu mas kaasil, táan u tuuso'ob yéetel táan u tu'usulo'ob.

¹⁴Ba'ale' teche' jéedzel p'áaten ti' le ba'ax dzo'oc a canico', ti' le ba'ax dzo'oc a ma'alob ocsic ta tuuculo'. Teche' a wojel máax ca'ans teech.

¹⁵Tumen ta kaj óoltaj ta paalil le Quili'ich Dzíibo'obo', lela' cu páajtal u dzáic teech na'at u ti'al le tocsajil cu yantal tu yo'olal u yocsaj óolta'al Cristo Jesuso'.

¹⁶Tuláacal Quili'ich Dzíibe' Ku j dzáa ti' tuucul u ti'al ca dzíibta'ac, ma'alob xan u ti'al ca'ansaj, u ti'al keyaj, u ti'al tojquinaj yéetel u ti'al tzol xiquin ti' jun p'éel toj cuxtal,

¹⁷u ti'al beyo' le máac u ti'al Kuo' ca utzil chuca'anchajac yéetel nu'uca'an u ti'al u beetic tuláacal u jejeláasil ma'alob meyajo'ob.