Read Yucateco 2 Timoteo 4 Bible Online

2 Timoteo 4 - Yucateco bible

2 Timoteo 4

¹Tu táan Ku yéetel tu táan Yuumtzil Jésucristo, máax bíin taalac je'el bix Ajaw u ti'al u p'is óolt le cuxa'ano'ob yéetel le quimeno'obo' quin jach kubentic teech

²ca a tze'ect le ma'alob péectzilo'; ca tzol xiquinaquech tu kiinil wa quex ma' tu kiinili'. E'es u si'ipilo'ob, keyo'ob yéetel tzol xiquinto'ob yéetel tuláacal chuca'an óolal bey xan yéetel ca'ansaj.

³Tumen bíin kuchuc u kiinil ma' bíin óolta'ac tumen máaco'ob u kamo'ob le ma'alob ca'ansajo'; ba'ax cun úuchule', je'el bix cun u dzíibolto'obe', bíin u much'quinto'ob aj ca'anbesajo'ob u ti'al ca ca'ansa'ac ti'ob chéen le ba'ax u káat u yu'ubo'obo'.

⁴Bíin u cúulpachcunto'ob le jaajo', yéetel bíin u dzáa u yóolo'ob ti' tuláacal u jejeláasil chéen tzicbatbil ba'alo'ob.

⁵Ba'ale' teche' p'áaten mantadz yéetel ma'alob tuucul, mukyajt le yaayaj óolalo'obo', kub a wóol a tze'ect le ma'alob péectzilo'. Beet ma'alob a meyaj.

⁶Tumen tene' ta'aytac in ku'ubul u ti'al quiimsbil; táan u náadzal u kiinil in binbal.

⁷Dzo'oc in ba'ateltic le ma'alob ba'atelo', dzo'oc in wáalcabtic le bej tac tu xuulo', dzo'oc in canantic le ocsaj óolalo'.

⁸Bele táan u pa'atiquen u siibalil jun p'éel toj cuxtal, lela' bíin u dzáa teen Yuumtzil ti' le kiino', tumen leti'e' jun túul juez toj u p'is óol. Ma' chéen ti' teen bíin u dza'i' ba'ale' tac ti' le máaxo'ob táan u dzíiboltico'ob yéetel yaacunaj u taalbalo'.

⁹Beet tac tu'ux cu páajtal u ti'al a séeb taal a wilen.

¹⁰Tumen Demase' dzo'oc u xúump'attiquen tumen tu dzíiboltaj asab u ba'alilo'ob le yóokolcaaba', ca j bin Tesalónica. Crescente dzo'oc u bin tu lu'umil Galicia, Titoe' tu lu'umil Dalmacia.

¹¹Chéen Lucas yaan tin wéetel. Caxant Marcos ca a tas ta wéetel, tumen cu páajtal u yáantiquen ti' le meyajo'.

¹²Tiquicoe' tin túuxtaj tu caajil Efeso.

¹³Le quéen taaqueche' tas teen le u yo'ocabil nook tin p'ataj Troas tu yotoch Carpo; bey xan le libro'obo', táanilbe'en le in ju'uno'obo'.

¹⁴Alejandro le j men máascabo' dzo'oc u beetic teen ya'abcach kaas. Yuumtzil bíin u bo'ot ti' je'el bix cu najmatic le ba'axo'ob dzo'oc u beetico'.

¹⁵Teche' canantabáa ti', tumen dzo'oc u dzáicubáa tu contra le ma'alob péectzil c tze'ectico'.

¹⁶Le ca yáax j anjien tu táan le jalach wíinico'ob u ti'al in wa'alic in t'aane', mix máac áanten; tuláacal tu xúump'atteno'ob. Quin pa'atic ma' u si'ipiltalo'ob tumen Ku tu yo'olal lela'.

¹⁷Ba'ale' Yuumtzile' tu yáanten ca tu dzáa in muuk, le o'olale' páatji' in tze'ectic le ma'alob péectzilo' yéetel in beetic ca u'uya'ac tumen tuláacal le máaxo'ob ma' judíobo'. Bey túuno' Yuumtzile' tu tocajen ti' u chi' le chacmo'olo'.

¹⁸Bíin u toquen xan ti' tuláacal kaas yéetel bíin u cananten u ti'al u ajawil te j ca'ano'. ¡Nojbe'enil ti' leti' u ti'al kiino'ob mina'an u xuul! Amén.

¹⁹Tziquil t'aano'ob ti' Prisca yéetel ti' Aquila, bey xan ti' u láaktzilo'ob Onesíforo.

²⁰Erastoe' j p'áat Corinto, yéetel Trófimoe' koja'an tin p'atil Mileto.

²¹Il a wil a taal ma'ili' cáajac u kiinil que'elil. Tan u túuxtico'ob teech tziquil t'aano'ob Eubulo, Pudente, Lino, Claudia yéetel tuláacal le sucu'uno'obo'.

²²Yuumtzil Jésucristo ca yanac ta wéetel, yéetel u siibal utzil Ku ca yanac ta wéetele'ex.