Read Yucateco Tito 2 Bible Online

Tito 2 - Yucateco bible

Tito 2

¹Je'el ba'alac ca a wa'ale' unaj mantadz queet yéetel le ma'alob ca'ansajo'.

²Le ch'ija'an máaco'obo' unaj ma' cáaltal máaco'obi', tziquilbe'eno'ob yéetel toj u tuuculo'ob; unaj utz yanilo'ob ti' u yocsaj óolalo'ob, ti' u yaacunajo'ob yéetel ti' u chuca'an óolalo'ob.

³Bey xan le ch'ija'an co'olelo'obo' unaj cuxtalo'ob ich quili'ichil, ma' unaj u líiksaj t'aano'obi' mix u cáaltalo'obi'. Unaj u ye'esico'ob jun p'éel ma'alob cuxtal,

⁴u ti'al u ca'ansico'ob ti' le x lo'obayan co'olelo'obo' u yaabilto'ob u yíichamo'ob, u yaabilto'ob u paalalo'ob,

⁵u tojtal u tuuculo'ob, u canant u cuxtalo'ob, u táan óolt u yotocho'ob, utz u pucsi'ikalo'ob, ca yanaco'ob yáanal u t'aan u yíichamo'ob, u ti'al ma' u po'och'ol u t'aan Yuum Ku.

⁶Tzol xiquint le táanquelem xi'ipalalo'obo' u ti'al ca ma'alobchajac u na'ato'ob,

⁷teech xane' e'es ti'ob yéetel a cuxtale' bix unaj u beetico'ob tuláacal ba'al utz. Le quéen a ca'anso'obe' beet yéetel tuláacal u jaajil a wóol ich tziquilbe'enil.

⁸Ca t'aanaquech yéetel ma'alob t'aano'ob mina'an tu'ux a xot kinta'al tumen mixmáac, beyo' je'el máaxac ca u yóolt t'aan kaase', yaan u ch'a'ic subtal, tumen ma' túun páajtal u t'aan kaas t o'olal.

⁹Tzol xiquint le palitzilo'obo' ca u yu'ubo'ob u t'aan u dzuulilo'ob ti' tuláacal ba'al; ca u beeto'ob ba'ax utz tu t'aan u dzuulilo'ob ma' u núuc t'aano'ob.

¹⁰Ma' u yoocolo'ob, ba'ale' ca u beeto'ob tuláacal ba'al jach ma'alob, u ti'al ca ila'ac tu cuxtalo'ob ti' tuláacal ba'ale' u jadzutzil u ca'ansajo'ob Ku c Tocsajil.

¹¹Tumen Kue' dzo'oc u ye'esic to'on u siibal utzil, lela' cu taasic tocsajil ti' tuláacal máac.

¹²Le u siibal utzil Kuo' cu ca'ansic to'on ca c p'at le kaaso' yéetel le lu'umcabil dzíibolalo'obo' yéetel ca c bis way yóokolcaabe' jun p'éel cuxtal ich ma'alob tuucul, tojil yéetel kub óolal ti' Ku.

¹³Bey xan cu ca'ansic to'on ca cuxlaco'on táan c pa'atic u nojbe'en taalbal c nojoch Ku yéetel c Tocsajil Jésucristo.

¹⁴Leti'e' tu kubjubáa ti' quíimil t o'olal, u ti'al u toquico'on ti' tuláacal kaas, yéetel u ma'alob p'o'ic u ti'al ca u ti'alinte jun p'éel caaj u kubmaj u yóol u beet utzil meyajo'ob.

¹⁵Leti' le unaj a ca'ansico'. Tzol xiquinnen yéetel keyajnen yéetel tuláacal páajtalil. Ma' a dzáic tu'ux a p'ecta'al tumen mix máac.