Read Yucateco Tito 3 Bible Online

Tito 3 - Yucateco bible

Tito 3

¹Ka'ajes ti'obe' ca yanaco'ob yáanal le jalach wíinico'obo' yéetel yáanal u noj poolilo'ob caaj, ca u yu'ubo'ob u t'aano'ob yéetel ca yanac u yóolil ti'ob u beetico'ob tuláacal ba'al ma'alob.

²Ma' u t'aano'ob kaas tu yo'olal mix máac, ma' u caxan ba'atelo'ob, ba'ale' ca cuxlaco'ob yéetel utzil pucsi'ikal, mantadz ca u ye'eso'ob cabal óolal tu táan tuláacal máac.

³Tumen to'on xan ca'ache' j ma' na'ato'on yéetel j ma' u'uyaj t'ano'on ti' Yuum Ku; saatal c máan ca'achi' yéetel palitzilo'on ca'ach ti' tuláacal u jejeláasil dzíibolalo'ob yéetel qui'imac óolalilo'ob yóokolcaab. Cuxa'ano'on ca'ach ichil kaas yéetel poochil; j p'ecbe'eno'on yéetel táan c p'ecticbáa t baatzil.

⁴Ba'ale' le ca tu ye'esaj Ku c Tocsajil u ch'a'a óotzilil yéetel yaacunaj tu yo'olal tuláacal máaque',

⁵tu to'oco'on, ma' tumen t beetaj wa ba'ax ma'alobi', ba'ale' tumen tu ch'a'aj to'on óotzilil. Tu toco'on tu yo'olal le p'o'obáil iquil Quili'ich Pixan cu beetic c síijil tu ca'a téen yéetel ca cuxlaco'on ti' jun p'éel túumben cuxtal.

⁶Tu yo'olal c J Tocsajil Jesucristoe' Kue' dzo'oc u dzáic to'on le Quili'ich Pixan jach taj ya'abo',

⁷u ti'al ca u kamo'on ichil u siibal utzil, u ti'al beyo' ca c kam le cuxtal mina'an u xuul c pa'atico'.

⁸Lela' jach jaaj; in káate' ca a sen a'al le ba'alo'oba', u ti'al beyo' le máaxo'ob cu yocsaj óoltico'ob Kuo' ca cuxlaco'ob táan u beetico'ob utzil meyajo'ob. Le ba'alo'oba' ma'alobtac yéetel yaan u biilalo'ob u ti'al tuláacal máac.

⁹Ba'ale' tzelabáa ti' le t'anal t'aano'ob mixba'al u biilalo', ti' le tzicbalo'ob tu yo'olal le ch'i'ibalo'obo', ti' le jatzlantáanbailo' yéetel ti' le ba'atelo'ob tu yo'olal u ya'almaj t'aan Moiseso'. Lelo'oba' ba'alo'ob mixba'al u biilalo'ob yéetel chéen cunelo'ob.

¹⁰Wa yaan máax táan u beetic u yantal jatzlantáanbaile', tzol xiquint jun téen wa ca'a téen; wa ma' tu yu'ubic a táane' ma' kamic;

¹¹tumen yéetel lelo' a wojel le máaco' kaschaja'an u tuucul yéetel táan u xot kinta'al tumen keban.

¹²Le quéen in túuxtech Artemas wa Tiquicoe', il a wil a taal tac Nicópolis u ti'al a wilen, tumen dzo'oc in tucultic in máansic u kiinilo'ob que'elil te'elo'.

¹³Tac tu'ux ca páataqueche' áant Zenas máax aj ca'anbesaj ti' le a'almaj t'aano' bey xan Apolos; dzáa ba'ax kabéet ti'ob u ti'al u bimbalo'ob, yéetel ma' u bineltic mixba'al ti'ob.

¹⁴Le c ti'alo'obo' ca u cano'ob xan u beeto'ob utz yéetel ca áantajnaco'ob le quéen ka'abéetchajaque', u ti'al ca yanac u biilal u cuxtalo'ob.

¹⁵Tuláacal le yano'ob tin wéetelo' cu túuxtico'ob teech tziquil t'aano'ob. Tziquil t'ant le máaxo'ob u yaabiltmajo'on ti' le ocsaj óolalo'. U siibal utzil Ku ca yanac ti' tuláacale'ex.