Read Yucateco Hebreos 10 Bible Online

Hebreos 10 - Yucateco bible

Hebreos 10

¹Tumen u ya'almaj t'aan Moisese' chéen jun p'éel u yoochel le ma'alob ba'alo'ob bíin taalaco', ma' jach bixo'ob tu jaajili'. Bey túuno', le a'almaj t'aano' mix bikin cu páajtal u yutzil chuca'ancuntic le máaxo'ob cu nadzicuba'ob ti' Ku tu yo'olal le quiimsbil siibalo'ob cu ku'ubulo'ob cada ja'abo'.

²Tumen wa le a'almaj t'aan cu páajtal u utzil chuca'ancuntico'obo', le quiimsbil siibalo'obo' je'el u jáawal u ku'ubulo'obe'; tumen le máaxo'ob kubico' le quéen p'o'oboco'ob jun téen ti' u kebano'obe' ma' túun u yu'ububa'ob wa yaan u si'ipilo'ob.

³Ba'ale' le quiimsbil siibalo'oba' cu meyajo'obe' u ti'al u ka'ajsico'ob u kebano'ob cada ja'abo',

⁴tumen u ki'ikel wacaxo'ob yéetel j tamano'obe' mix bikin cu páajtal u lukesic le kebano'obo'.

⁵Le o'olal Cristoe' le ca j taal way yóokolcaabe' tu ya'alaj ti' Ku: Ma' a káat quiimsbil siibalo'obi' mix ca ku'ubuc teech ba'alche'obi', ba'ale' dzo'oc a nu'uctic teen jun p'éel wíinclil.

⁶Ma' utz ta t'aan le tóocbil siibalo'obo' mix le quiimsbil siibalo'ob cu ku'ubulo'ob u ti'al u lukesa'al le kebano'.

⁷Tin wa'alaj túun: Je'el quin taal u ti'al in beet ba'ax a káate', Ku, je'el bix dzíibta'an tin wo'olal te j libro'o'.

⁸Yáaxile' cu ya'alic: Ma' utz ta t'aan le quiimsbil siibalo'obo' mix le ba'alche'obo', mix le tóocbil siibalo'ob mix le siibalo'ob u ti'al u lukesa'al kebano', quex le a'almaj t'aan a'alic ca ku'ubuco'obo'.

⁹Cu dzo'ocole' cu ya'alic: Je'el quin taal u ti'al in beet ba'ax a káate', Ku. U káat u ya'ale' cu lukesic le úuchben quiimsbil siibalo'obo' u ti'al u dzáa le u láak quiimsbil siibal u jeelinto'.

¹⁰Kue' dzo'oc u quili'ichcuntico'on tumen Jesucristoe' tu beetaj ba'ax u káat Ku le ca tu kubaj u wíinclil bey jun p'éel quiimsbil siibal chéen jun téenili' u ti'al tuláacal kiino'obe'.

¹¹Tuláacal aj kiin judióe' cu beetic u meyaj sáamsamal yéetel bin u ca'aj u kub ya'ab u téenel le quiimsbil siibalo'oba', quex tumen le quiimsbil siibalo'oba' mix bikin cu páajtal u lukesico'ob le kebano'obo'.

¹²Ba'ale' Jesucristoe' tu kubaj tu yo'olal le kebano'obo' chéen jun p'éelili' quiimsbil siibal u ti'al kiino'ob mina'an u xuul, cu dzo'ocole' ca j culaj tu x no'oj Ku.

¹³Ti' cu pa'ataj tac quéen dza'abac u aj p'eeco'ob yáanal u yooc,

¹⁴tumen yéetel jun p'éelili' quiimsbil siibale' tu utzil chuca'ancuntaj u ti'al kiino'ob mina'an u xuul le máaxo'ob u quili'ichcuntmajo'.

¹⁵Le Quili'ich Pixano' cu jaajcuntic to'on lela', tumen yáaxile' cu ya'alic:

¹⁶Le nup t'aan quin in beet tu yéetelo'ob cu dzo'ocol u máan le kiino'obo' bey bíin béeyaca', cu ya'alic Yuumtzil: Bíin in dzáa in wa'almaj t'aano'ob tu pucsi'ikalo'ob, yéetel bíin in dzíibt tu tuuculo'ob.

¹⁷Cu dzo'ocole' cu ya'alic: Mix bikin bíin in ka'ajes u kebano'ob mix u kasa'anilo'ob.

¹⁸Bey túuno', tumen dzo'oc u sa'atsa'al le kebano'obo', ma' kabéet u ku'ubul u láak quiimsbil siibalo'ob tu yo'olalo'obi'.

¹⁹Le o'olale' sucu'une'ex, bele' cu páajtal c ocol yéetel tuláacal kub óolal tac ti' le jach Quili'ich Cúuchilo' tu yo'olal u ki'ikel Jesucristo',

²⁰ti' le túumben bejo', le u bejil cuxtalo', le bej tu je'aj to'on ti' le cortinao', u káat u ya'ale', ti' u wíinclil.

²¹Jesuse' leti' c nojoch aj kiin tu yóokol u yotoch Ku;

²²le o'olale' unaj c nadzicbáa ti' Ku yéetel u jaajil yóol c pucsi'ikal bey xan yéetel jun p'éel ocsaj óolal jach jeedzel; p'o'an c pucsi'ikal ti' kaakas tuucul bey xan c wíinclile' p'o'an yéetel ma'alob ja'.

²³Co'ox p'áatal jeedzel ti' u alab óolalil c ocsaj óolal, ma' u kéexel c óol, tumen chuca'an u yóol le máax tu dzáa u t'aan ti' to'ono'.

²⁴Yéetel unaj c caxantic bix je'el u páajtal c áanticbáa t baatzile' u ti'al ca yanac to'on yaacunaj yéetel u ti'al c beetic ba'ax utz.

²⁵Ma'unaj c queticbáa yéetel le máaxo'ob suuc ti'ob ma' u taalo'ob j much'tal t éeteli', ba'ale' unaj c líik óolticbáa tbaatzil, asab unaj c beetic bele' tumen táan a wilique'ex unáadzal u kiinil Yuumtzil.

²⁶Tumen wa tu juunal c óol táan c kebanchajal cu dzo'ocol c kamic u kaj óolalil le jaajo', mina'an u láak quiimsbil siibal tu yo'olal le kebano'obo'.

²⁷Chéen cu p'áatal to'on u jak óolil le p'is óolo' yéetel le choco káak bíin u xu'uls u aj p'eeco'ob Kuo'.

²⁸Wa máax ma' táan u dzo'ocbesic u ya'almaj t'aan Moisés, yéetel yaan ca'a túul wa óox túul jaajcunajo'ob tu contrae' cu xot kinta'al u ti'al quíimil x ma' ch'a'a óotzilil.

²⁹Beyo' ¿Buca'aj asab nojoch jaadz ca tucultique'ex cu najmatic le máax cu pe'epe'echa'atic u Paal Ku yéetel cu tucultic mixba'al u biilal u ki'ikele', bey xan cu poch'ic le Quili'ich Pixan cu dzáic siibal utzo'? Le ki'iko' leti' jaajcuntic le nup t'aano' bey xan tu yéetel quili'ichcunta'ano'ob.

³⁰C ojele' Yuumtzile' u ya'almaj: Teen unaj in jaadz; teen quin bo'ol. Bey xan tu ya'alaj: Yuumtzil bíin u p'is óolt u caajal.

³¹¡Yayaj ba'al u lúubul máac tu kab le cuxa'an Kuo'!

³²Ba'ale' ka'ajac te'ex le kiino'ob dzo'oc u máano'obo', le kiino'ob ca ta kamaje'ex le sáasilo' yéetel ca ta mukyajtaje'ex yéetel chuca'an óolal u yaayaj óolalilo'ob jun p'éel nojoch ba'atel.

³³Dze'edzec ti' te'exe' j po'och'e'ex yéetel loobilta'abe'ex tu táan caaj, u láako'obe' táacpajo'ob ti' u mukyajo'ob le máaxo'ob j beeta'ab le ba'alo'ob ti'obo'.

³⁴Te'exe' ta ch'a'aje'ex óotzilil ti' le máaxo'ob j ka'alo'obo' bey xan yéetel qui'imac óolal ta mukyajtaje'ex u lukesa'al te'ex a balaba'ex tumen a wojele'exe' te j ca'ano' yaan a ti'al te'exe' ba'alo'ob asab ma'alobtac yéetel cu xáantalo'ob u ti'al kiino'ob mina'an u xuul.

³⁵Ma' u sa'atal túun a kub óolale'ex, tumen le kub óolalo' bíin u taas te'ex jun p'éel nojoch bo'ol.

³⁶Te'exe' kabéet u chúucpajal a wóole'ex u ti'al a beetique'ex ba'ax u káat Ku u ti'al a kamique'ex beyo' le ba'ax u ya'almaj te'exo'.

³⁷Tumen le Quili'ich Dzíibo' cu ya'alic: Séeba'an, jach séeba'an, bíin taalac le máax yaan u taalo', ma' túun xáantal.

³⁸Ba'ale' le máax quin kamic bey máac toje' bíin cuxlac tu yo'olal le ocsaj óolalo', ba'ale' wa cu suut paachile', ma' bíin qui'imacchajac in wóol tu yéeteli'.

³⁹Ba'ale' to'one' ma' beyo'on le máaxo'ob cu suuto'ob paachil u ti'al sa'atsajilo', ba'ale' beyo'on le máaxo'ob cu yocsaj óolo'obo' yéetel ca to'ococ u pixano'ob.