Read Yucateco Hebreos 11 Bible Online

Hebreos 11 - Yucateco bible

Hebreos 11

¹U yantal ocsaj óolal ti' to'one' u káat u ya'al túune', u yantal ti' to'on u chuca'an jéedzelil yaan c kamic le ba'ax c pa'atico', yéetel u yocol ti' c tuucule' jun p'éel ba'al ma' táan c ilique' jach u jaajil.

²Le úuchben máaco'obo' j ka'amo'obe' tumen yanji' u yocsaj óolalo'ob.

³Tu yo'olal le ocsaj óolalo' c ojele' Kue' tu beetaj tuláacal ba'al yéetel u t'aan, Bey túuno' le ba'ax c ilic bejela'a' j beeta'ab yéetel le ba'ax ma' tu yila'alo'.

⁴Tu yo'olal le ocsaj óolalo' Abele' tu kubaj ti' Ku jun p'éel siibal asab ma'alob ti' le tu kubaj Caino', le o'olale' j ka'am tumen Ku bey jun túul máac toje' ca j ka'am xan u siibalo'ob. Bey túuno', quex quimen Abele', láili' táan u t'aan tu yo'olal le ocsaj óolal anji ti'o'.

⁵Tu yo'olal le ocsaj óolalo' Enoque' j bisa'abi' quex ma' tu yilaj quíimili'; ma' j caxta'abi' tumen j bisa'ab tumen Ku. Le Quili'ich Dzíibo' cu ya'alique' ma'ili' bisa'aque' Enoque' j lúub utzil tu táan Ku.

⁶Ba'ale' ma' tu páajtal u lúubul máac utzil tu táan Ku wa mina'an ocsaj óolal, tumen u ti'al u nadzicubáa máac ti'e', kabéet u yocsaj óolta'al yaan Ku yéetel leti'e' cu bo'otic le máaxo'ob caxtico.

⁷Tu yo'olal le ocsaj óolalo' Noee', le ca j a'ala'ab ti' tumen Ku bíin u ca'aj úuchul ba'alo'ob ma'ili' páatac u yila'alo'obe', tu yu'ubaj t'aan ca tu beetaj le cheem u ti'al u toquic u yotocho'. Tu yo'olal anji u yocsaj óolale', tu xot kintaj le máaxo'ob yóokolcaabilo'obo' yéetel j ka'am bey jun túul máac toj tu táan Kue', tu yo'olal le ocsaj óolalo'.

⁸Tu yo'olal le ocsaj óolalo' Abrahame', le ca j t'aan tumen Kue', tu yu'ubaj t'aane' ca jóok u ti'al u binbal ti' le cúuchil bíin dza'abac ti' tumen Kuo'. Jóok ti' u lu'ume' quex ma' u yojel tu'ux cu bini'.

⁹Tumen yanji' u yocsaj óolale' Abrahame' j cuxlaj ti' le lu'um a'ala'an ti' tumen Ku yaan u dza'abal ti'o' bey ti' táanxel lu'ume'. J cajlaj ti' pasel nooko'ob bey xan tu beetjilaco'ob Jacob máaxo'ob tu kamajo'ob xan le dzaabil t'aano'.

¹⁰Tumen Abrahame' táan u pa'atic le caaj ma'alob u chuun pakilo'obo', le caaj tuculta'an yéetel beeta'an tumen Kuo'.

¹¹Tu yo'olal le ocsaj óolal xano' Sarae' quex dzo'oc u sen x nuuctal u ti'al u yantal u paalale', tu kamaj páajtalil u ti'al u síijsaj; yanji' túun jun túul u paale' tumen tu yocsaj óoltaje' Kue' yaan u dzo'ocbesic u dzaa t'aan.

¹²Bey túuno' Abrahame' quex ta'aytac u kuchul tu xuul u kiinilo'ob u cuxtale', u ch'i'ibalo'obe' jach ya'abchajo'ob je'el bix le eeko'ob yaan te j ca'ano' yéetel je'el bix le sa'am lu'um yaan tu jáal le ka'anabo' mix máac cu páajtal u xoquic.

¹³Tuláacalo'ob j quíimo'ob quex ma' tu kamajo'ob le ba'alo'ob j a'ala'ab ti'o' tumen Kuo'; ba'ale' tumen yaan u yocsaj óolalo'obe', tu pactajo'ob náachile' ca tu yocsaj óoltajo'ob, ca tu yilajo'ob yéetel qui'imac óolal. Beyo' tu ye'esajo'obe' j táanxel lu'umilo'ob chéen káatal cu beetico'ob way yóokolcaabe';

¹⁴tumen le máaxo'ob cu t'aano'ob beyo' jach sáasil u dzáico'ob na'atbile' táan u caxantico'ob jun p'éel lu'um tu'ux u cajtalo'ob.

¹⁵Wa ca u dzáa u tuuculo'ob ti' le lu'um tu'ux jóoko'obo', cu páajtal ca'ach u suuto'obi'.

¹⁶Ba'ale' u káato'ob jun p'éel lu'um asab ma'alob, u káat u ya'ale', le ca'anil lu'umo'. Le o'olale; Kue' ma' táan u ch'a'ic subtal u ya'ala'al leti' u Kuo'ob, tumen u nu'uctmaj jun p'éel caaj u ti'alto'ob.

¹⁷Tu yo'olal le ocsaj óolalo' Abrahame', le ca j ila'ab tumen Ku wa chuca'an u yóole', tu taasaj Isaac u ti'al u kub bey jun p'éel quiimsbil siibale'. Chuca'an u yóol u kubic u jun túulili' paal, quex a'ala'an ti' tumen Kue':

¹⁸Tu yo'olal Isaac cun yantal a ch'i'ibal.

¹⁹Tumen Abrahame' tu kaj óoltaje' Kue' yaan páajtalil ti' tac u ca'a púut cuxquintic le quimeno'obo'; cu páajtal túun ya'ala'ale', bey jun p'éel queet t'aane', Abrahame' tu kamaj u paal tu ca'a téen ti' ichil le quimeno'obo'.

²⁰Tu yo'olal le ocsaj óolalo' Isaaque' tu qui'iqui' t'antajo'ob Jacob yéetel Esaú tu yo'olal ba'alo'ob bíin úuchuco'ob.

²¹Tu yo'olal le ocsaj óolalo' Jacobe' le ca j kuch u kiinil u quíimile', tu qui'iqui' t'antaj u jujun túul ti' u paalalo'ob José, ca tu kultaj Ku, táan u jedzic u muuk tu xóolte'.

²²Tu yo'olal le ocsaj óolalo' Josee', le ca j quíime', tu ya'alaj bíin jóokoco'ob le israelilo'ob ti' u lu'umil Egipto, ca tu ya'alaj ba'ax unaj u beetico'ob yéetel u baaquelo'ob u wíinclil.

²³Tu yo'olal le ocsaj óolalo', le ca j síij Moisese', u taataobe' tu ta'acajo'ob tu yáam óox p'éel winalo'ob; tumen tu yilajo'obe' jun túul qui'ichquelem paal, ma' tu ch'a'ajo'ob sajaquil ti' le t'aan u ya'almaj ajaw u ti'al ca químsa'aco'.

²⁴Tu yo'olal le ocsaj óolalo' Moisese' le ca nojoch máacchaje, ma' tu yóoltaj ca t'a'anac bey u paal u x ch'upul paal u ajawil Egiptoi',

²⁵ba'ale' tu yóoltaj mukyaj yéetel u caajal Kue' ma' ca u qui'imaccuns u yóol tu yo'olal dze'edzec kiino'ob ti' u qui'imac óolalilo'ob le kebano'.

²⁶Tu yu'ubaje' u ayikalil iquil u mukyajtic ch'a'a p'ectajil tu yo'olal Cristoe' mas ti' tuláacal u ayikalil Egipto; tumen u dzaamaj u paacat ti' le bo'ol cun dzaabil ti' tumen Kuo'.

²⁷Tu yo'olal le ocsaj óolalo' Moisese' j luk ti' u lu'umil Egipto, ma' tu ch'a'a sajaquil ti' u kuuxilil le ajawo', ba'ale' j p'áat jéedzel ti' u tuucul bey táan u yilic le Ku ma' táan u yila'alo'.

²⁸Tu yo'olal le ocsaj óolalo' Moisese' tu beetaj le pascuao' ca tu túuxtaj widzbil le jool najo'ob yéetel le ki'iko', u ti'al ma' u quíimsa'al mix jun túul yáax paal ti' le israelitaob tumen le ángel cun u taas quíimilo'.

²⁹Tu yo'olal le ocsaj óolalo' le israelitaobo' j máano'ob chúumuc le Chac Ka'anabo', je'el bix u máan máac ti' tiquin lu'ume'; le Egiptoilo'obo' le ca tu yóoltajo'ob u beeto'ob beyo' j búulo'ob.

³⁰Tu yo'olal le ocsaj óolalo' j lúub le pak bakpachtic u caajil Jericoo', cu dzo'ocol u xíimbal le israelilo'ob tu bakpach tu yáam siete kiino'obo'.

³¹Yéetel tu yo'olal le ocsaj óolalo' Rahab le co'olel kaas u cuxtalo', ma' j quíim jun múuch' yéetel le j ma' u'uyaj t'aano'obo', tumen leti'e' tu kamaj yéetel jéedzel le máaco'ob j bino'ob u kaj óolto'ob le caajo'.

³²¿Ba'ax asab je'el in wa'alique'? Mina'an u yorail in t'aan tu yo'olal Gedeón, Barac, Sansón, Jefté, David, Samuel yéetel le aj bóobato'obo'.

³³Tu yo'olal le ocsaj óolalo' tu dzáancha'ato'ob caajo'ob, tu beetajo'ob ba'ax toj yéetel yanji' ti'ob le áantaj j a'ala'ab ti'ob tumen Kuo'. Tu nup'ajo'ob u chi' chacmo'olo'ob,

³⁴tu tupajo'ob nucuch káako'ob, tu jechajo'ob u quíimsa'alo'ob yéetel espada. Le mina'an u muuko'obo' j dza'ab u muuko'ob, j kuch yantal páajtalil ti'ob u ti'al le ba'atelo' ca tu dzáancha'ato'ob le soldado'ob táanxel lu'umilo'obo'.

³⁵Yanji' co'olelo'ob tu kamajo'ob tu ca'a téen u quimeno'ob ca'a púut cuxa'ano'ob. U láako'obe' j quíimo'ob táan u beeta'al u mukyajo'ob, ma' tu yóoltajo'ob ca cha'abaco'obi', u ti'al u ca'a púut cuxtalo'ob ti' jun p'éel cuxtal asab ma'alob.

³⁶U láako'obe' tu mukyajtajo'ob p'a'aso'ob yéetel jaadzo'ob, bey xan j ka'axo'ob yéetel cadenaob yéetel j ka'alo'ob.

³⁷J muruxtunta'abo'ob, xo'oto'ob tu táan chúumuc, túunta'ab u yóolo'ob, j quíimsa'abo'ob yéetel máascab; j máano'ob jejeláas tu'uxo'ob u pixmuba'ob chéen yéetel u kéewelil j tamano'ob yéetel yuuco'ob, óotzilo'ob, yaj u yóolo'ob, loobilta'ano'ob.

³⁸Máaco'ob ma' tu najmata'alo'ob tumen yóokolcaab. J máano'ob ti' x tocoy lu'umo'ob, ti' pu'uco'ob, ti' sajcabo'ob yéetel ti' taamcach áactuno'ob.

³⁹Tuláacal leti'obe' quex j ka'amo'ob tu yo'olal le ocsaj óolal anji' ti'obo', ma' tu kamajo'ob le ba'ax a'ala'an u dza'abal tumen Kuo';

⁴⁰tumen leti'e' u nu'uctmaj jun p'éel ba'al ma'alob, iquil tu dzajilaco'on tu tuucul, u ti'al ca utzi chuca'ancunsa'aco'ob jun múuch' t éetel.