Read Yucateco Hebreos 12 Bible Online

Hebreos 12 - Yucateco bible

Hebreos 12

¹Le o'olal to'one', tumen bakpachta'ano'on tumen ya'ab máaxo'ob dzo'oc u ye'esico'ob u yocsaj óolalo'obe', co'ox p'atic jun tzéelil le ba'axo'ob katic c beelo', yéetel le keban cu wo'oltico'ono', ca c áalcabt yéetel chuca'an óolal le bej yaan táanil to'ono'.

²Co'ox dzáic c paacat ti' Jesús, ti' máax cu taal c ocsaj óolal yéetel máax cu yutzil chuca'ancuntic. Jesuse' j mukyajnaj ti' le cruzo', ma' tu beetaj u cuentail wa subtzil u quíimil máac beyo', tumen u yojele' cu dzo'ocol u mukyaje' yaan u yantal qui'imac óolal ti'; cu dzo'ocole' ca j culaj tu x no'oj u trono Ku.

³Dzáa a tuucule'ex túun ti' Jesús, máax tu mukyajtaj jach ya'ab ch'a'a p'ectajil tu kab le j keban máaco'obo'; le o'olale' ma' a ca'anle'ex mix u lúubul a wóole'ex.

⁴Tumen te'exe' ma' kuchuque'ex tac ti' quíimil ti' a ba'atele'ex tu contra le kebano'.

⁵¿Dzo'oc wa a tu'ubsique'ex ba'ax cu tzol xiquintic te'ex Ku je'el bix u paalalo'obe'? Cu ya'alic bey ti' le Quili'ich Dzíibo': In Paal, ma' a p'ectic le jaadz ba'ax yéetel cu tojquintiquech Yuumtzilo', mix u lúubul a wóol le quéen u keyecho'.

⁶Tumen Yuumtzile' cu tojquintic le máaxo'ob u yaabiltmajo', yéetel cu jadzic tuláacal le máaxo'ob cu kamic bey u paalalo'obe'.

⁷Mukyajte'ex le jaadzo', tumen Kue' táan u táan óoltique'ex beye'ex u paalalo'obe', ¿yaan wa paal ma' táan u tojququinta'al tumen u taata?

⁸Ba'ale' wa Ku ma' táan u tojquintique'exe', je'el bix u tojquintic tuláacal u paalalo'obe', ma' jach u paalale'ex túuni', ba'ale' chéen caxanbil paalale'ex.

⁹Tu yóokol lela', le ca'ach paalalo'one', c taataob way te yóokol le lu'uma' cu tojquintico'ono'ob yéetel c tziquiltico'ob. ¿Ba'ax téen ma' táan c dzáicbáa yáanal u páajtalil c ca'anil Taata, u ti'al beyo' ca yanac to'on cuxtal?

¹⁰C taataob way yóokol le lu'uma' cu tojquintico'ono'ob u ti'al le cóomcom cuxtala', je'el bix tu tucultajo'ob ma'alobe'; ba'ale' Kue' cu tojquintico'on u ti'al c jaajil utzil, u ti'al u quili'ichcuntico'on je'el bix leti' quili'icho'.

¹¹U jaajile' mix jun p'éel jaadz utz t t'aan ti' le jun súutuc táan c kamico', ba'axe' cu yaatal to'on; ba'ale' le máaxo'ob cu canbalo'ob yéetel le jaadzo', cu dzo'ocole' cu yantal ti'ob jun p'éel toj yéetel jéedzel cuxtal.

¹²Bey túuno', dza'ex túumben muuk ti' le a kabe'ex ca'anano'obo' yéetel ti' le a píixe'ex luba'an u muuko'obo',

¹³yéetel caxte'ex le toj bejo'obo'. Bey túuno' u yooc le máax móocho' yaan u yutztal, ma' bíin asab lóochoqui'.

¹⁴Il a wile'ex u yantal te'ex jéedzel óolal yéetel tuláacal máac, iquil a bisique'ex jun p'éel quili'ich cuxtal; tumen x ma' quili'iche' mix máac cun páajtal u yilic Yuumtzil.

¹⁵Canantaba'ex u ti'al beyo' mix jun túul ca p'áatac ma' u kamic u siibal utzil Ku, yéetel ma' u p'áatal mix jun túul je'el bix jun cúul pakal káaj u yiche', cu beetic loob yéetel cu kascuntic ya'ab máaco'ob ichile'ex.

¹⁶Mix jun túul ti' te'ex ca nup kebanchajac, mix u p'ectic le ba'ax quili'icho' je'el bix tu beetaj Esaú, máax tu yo'olal jun p'éel janale' tu conaj le ba'ax unaj u ti'alintic ca'acho' tumen leti' nojoch sucu'untzil.

¹⁷Te'exe' a wojele'exe' cu dzo'ocole' le ca tu yóoltaj Esaú u kam u qui'qui' t'aan u taatae' ma' j ka'ami'; quex sen okolnaje' ma' tu caxtaj bix u kexic le ba'ax dzo'oc u beetico'.

¹⁸Te'exe' ma' ta nadzaba'ex, je'el bix le israelitaobo', ti' le pu'uc cu páajtal u ma'achalo' yéetel táan u yelel yéetel káak, tu'ux yaan noocoy ca'anil, éekjoch'e'enil, yéetel chac ikal;

¹⁹mix ta wu'uye'ex u juum le trompetao' mix u t'aan Ku máax t'aanaj yéetelo'ob. Le máaxo'ob tu yu'ubajo'ob le t'aano' tu káat óoltajo'ob ma' u ca'a t'a'analo'ob.

²⁰Lelo' tumen ma' táan u páajtal u mukyajtico'ob le a'almaj t'aan cu ya'alic beya': Le máax ca u dzáa u yooc te j pu'uco', yaan u muruxtunta'al, quex jun túul ba'alche'.

²¹Jach jakbe'en le ba'ax cu yila'alo', le o'olale' tac Moisés tu ya'alaj: Táan in quiquilanquil tu yo'olal in sajaquilil.

²²Ba'ale' te'exe' dzo'oc a nadzicaba'ex ti' u pu'uquil Sión yéetel ti' u caajal le cuxa'an Kuo', u káat u ya'ale', le ca'anil Jerusaleno', yéetel ti' sen ya'abcach ángelo'ob

²³much'ucbalo'ob u ti'al u qui'iqui' t'anto'ob Ku, yéetel ti' u múuch'ul u yáax paalalo'ob Ku máaxo'ob dzíiba'an u kaaba'ob te j ca'ano'. Dzo'oc a nadzicaba'ex ti' Ku u juez tuláacal máac, ti' u pixano'ob le toj máaco'ob utzil chuca'ancunta'ano'ob tumen Kuo',

²⁴ti' Jesús máax cu t'aan tu yo'olal le túumben nup t'aano', yéetel ti' le ki'ik widza'ano' le cu t'aan asab ma'alob ti' u ki'ikel Abelo'.

²⁵Le o'olale', canantaba'ex ma' a cúulpachcuntique'ex le máax t'anico'ono'. Tumen wa ma' tu jechuba'ob le máaxo'ob tu cúulpachcunto'ob Ku le ca j t'aano'ob way te yóokol le lu'uma'; asab talam ca c jechabáa to'on wa c cúulpachcuntic le máax cu t'anico'on te j ca'ano'.

²⁶U t'aan Kue', ti' le kiino'obo', tu beetaj u quíilbal le lu'umo'; ba'ale' bele' cu ya'alic: tu dzooque' ma' chéen quin in beet u quíilbal le lu'uma', ba'ale' tac le ca'ano'.

²⁷Le ca tu ya'alaj: Ju láak jun téene' cu na'atale' yaan u lukesa'al le ba'alo'ob cu máanelo'ob tu beetaj Kuo', yéetel yaan u p'áatal le ba'alo'ob ma' tu máanelo'obo'.

²⁸Le ajawil cu dzáic to'on Kuo' ma' táan u páajtal u máan. Co'ox dzáic nib óolal tu yo'olal lela', yéetel co'ox kultic Ku je'el bix utz tu t'ano': yéetel c pucsi'ikal bey xan yéetel cabal óolal;

²⁹tumen c Kue' káak cu xu'ulsaj.