Read Yucateco Hebreos 2 Bible Online

Hebreos 2 - Yucateco bible

Hebreos 2

¹Tu yo'olal lela' unaj c ch'en xiquint asab le ba'ax dzo'oc c u'uyico', u ti'al ma' c sa'atal.

²Le t'aan j dzaab ti' u láak kiino'ob tu yo'olal le ángelo'obo', jaajcunta'abi', yéetel le máaxo'ob kebanchajo'ob bey xan le máaxo'ob ma' tu dzo'ocbesajo'obo' ti'ilbilbe'en ja'adzico'ob.

³¿Bix je'el u páajtal c jechicbáa to'one' wa ma' c táan óoltic le jach nojoch tocsajilo'? Tumen Yuumtzil yáax tze'ect le tocsajila', cu dzo'ocole' le máaxo'ob u'uye' tu jaajcunto'obe' ca tu máansajo'ob ti' to'on.

⁴Tu yóokol lela', Kue' dzo'oc u jaajcuntic yéetel chíiculalo'ob, jakbe'en ba'alo'ob bey xan yéetel ya'ab talam beetbil ba'alo'ob, bey xan tu yo'olal le u siibalilo'ob Quili'ich Pixan u dzaamaj to'ono', je'el bix tu yóoltaje'.

⁵Kue' ma' u dzaamaj yáanal u páajtalil le ángelo'obo' le yóokolcaab bíin taalac táan c a'alico'.

⁶U jaajile', wa tu'ux ti' le Quili'ich Dzíibo' yaan máax cu ya'alic: ¿Ba'ax le máaco', u ti'al ca a ka'ajes techo', Ku? ¿Wa ba'ax jun túul u paal máac u ti'al ca tuuculnaquech tu yo'olal?

⁷Ta beetaj jun p'íit asab cabal ti' le ángelo'obo', ba'ale' ta péet jo'oltaj yéetel nojbe'enil bey xan yéetel tzicbe'enil, ca ta dzáa páajtalil ti' tu yóokol le ba'alo'ob ta beetajo';

⁸tuláacal ta dzáa yáanal u yooc. Bey túuno', le ca tu dzáa tuláacal yáanal u yooc máaque', mixba'al tu p'ataj wa ma' ti' yaan yáanal u páajtalile'. Quex beyo', láili' ma' táan c ilic u yu'uba'al u t'aan máac tumen tuláacal ba'ali'.

⁹Ba'ale' c ilic Jesús, máax beeta'ab jun p'íit asab cabal ti' le ángelo'obo' u ti'al dze'edzec kiino'ob. Kue' ichil u siibal utzile' tu yóoltaj ca quíimic tu yo'olal tuláacal; bele' péet jo'ol ta'an yéetel nojbe'enil bey xan yéetel tzicbe'enil tu yo'olal le quíimil tu mukyajtajo'.

¹⁰Tuláacal ba'al yane' u ti'al Ku bey xan tu yo'olal leti', Ku xane' u káat u bis ya'abcach paalal ti' u nojbe'enil. Le o'olale' Kue' yanchaj u beetic tu yo'olal le mukyajo' u chuca'anchajal le máax u j tocsajil leti'obo'.

¹¹Tumen le máaxo'ob quili'ichcunta'ano'ob yéetel le máax quili'ichcunto'obo', tuláacalo'ob u ti'alo'ob jun túulili' Taata. Le o'olale' Jesuse' ma' tu ch'a'ic subtal u ya'alic sucu'un ti'ob,

¹²iquil u ya'alic ti' le Quili'ich Dzíibo': Bíin t'aanaquen ta wo'olal ti' in sucu'uno'ob, yéetel bíin in kay teech kaayo'ob chúumuc u múuch'ul le j ocsaj o'olo'obo'.

¹³Bey xan cu ya'alic: Tene' bíin in alab óolt Ku. Yéetel cu ya'alic tu ca'a téene': Je'elo'ona', teen yéetel le paalalo'ob tu dzáa teen Kuo'.

¹⁴Bey je'el bix le paalalo'ob táacpaja'ano'ob ti' bak yéetel ti' ki'ike' bey xan Jesús yanji' u táacpajal ti' bak yéetel ti' ki'ik, u ti'al ca páatac u xu'ulsic yéetel u quíimile' u yuumtzil le quíimilo', u káat u ya'ale', kasiba'al.

¹⁵Beyo' dzo'oc u jáalkabtic tuláacal le máaxo'ob tu yo'olal u sajaquililo'ob ti' le quíimilo' cuxa'ano'ob beyo'ob palitzile' tuláacal u cuxtalo'ob.

¹⁶Tumen tu jaajile' ma' j taal u ti'al u yáant le ángelo'obo', ba'ale' u ti'al u yáant u ch'i'ibal Abraham.

¹⁷U ti'al lelo' kabéetchaj ca beeta'ac ti' tuláacale' je'el bix u sucu'uno'obe', u ti'al ca kuchuc u beet u nojoch aj kiinil chuca'an u yóol bey xan chuup yéetel ch'a'a óotzilil tu táan Ku, u ti'al u lukesic u keban máaco'ob.

¹⁸Leti'e' tumen j mukyajnaj yéetel j túunta'ab u yóole', bele' cu páajtal u yáantic xan le máaxo'ob cu túunta'al u yóolo'obo'.