Read Yucateco Hebreos 3 Bible Online

Hebreos 3 - Yucateco bible

Hebreos 3

¹Bey túuno', quili'ich sucu'une'ex, te'ex táacpaja'ane'ex ichil le máaxo'ob t'ana'ano'ob tumen Kuo', ile'ex ma'alob Cristo Jesuse', u apóstolil yéetel u nojoch aj kiinil le c ocsaj óolalo'.

²Tumen Jesuse' chuca'an u yóol ti' Ku, máax dzáa tu yóokol le meyaja', je'el bix Moisés j chúucpaj u yóol ti' u meyaj xan tu yóokol tuláacal u yotoch Kue'.

³Ba'ale' Jesuse' cu najmatic asab nojoch tziiquil ti' Moisés je'el bix le máax cu beetic jun p'éel naj cu kamic asab nojoch tziiquil ti' le najo'.

⁴Tuláacal naje' unaj u beeta'al tumen wa máax; ba'ale' Ku máax beet tuláacal ba'ax yaan.

⁵Bey túuno', Moisese' j chúucpaj u yóol je'el bix jun túul palitzil ti' tuláacal u yotoch Kue'; u meyaje' u t'aan tu yóokol le ba'alo'ob bíin u ya'al Kuo'.

⁶Ba'ale' Cristoe' chuca'an u yóol je'el bix jun túul paal tu yóokol le u yotoch Kuo'. Le u yotoch Kuo' to'on, wa c p'áatal jejedzquil yéetel yaan to'on alab óolal tac tu xuul, bey xan qui'imac óolal ti' le alab óolal yaan to'ono'.

⁷Le o'olale', je'el bix cu ya'alic le Quili'ich Pixan ti' le Quili'ich Dzíibo': Bejela'e', wa te'ex ca wu'uyique'ex ba'ax cu ya'alic Kue',

⁸ma' a chichcuntic a pucsi'ikale'ex je'el bix le máaxo'ob tu cúulpachcunto'ob Ku yéetel tu túuntajo'ob u yóol Ku te x tocoy lu'umo'.

⁹Te'elo' tu túuntajo'ob in wóol a úuchben taataexo', quex tu yilajo'ob ba'ax tin beetaj tu yáam cuarenta ja'abo'ob.

¹⁰Le o'olale' j kuuxilnajen tu contra le máaco'obo', ca tin wa'alaj: Mantadz saatal u máano'ob ti' u pucsi'ikalo'ob yéetel ma' u yóolto'ob u kaj óolto'ob in beelo'obi'.

¹¹Le o'olal kuuxilnajen tu yéetelo'obe' ca tin wa'alaj yéetel páajtalile', ma' bíin ococo'ob ti' in je'eleli'.

¹²Sucu'une'ex, canantaba'ex mix jun túul ti' te'ex ca yanac ti'e' jun p'éel kasa'an pucsi'ikal ca u tzelubáa ti' le cuxa'an Ku tu yo'olal ma' táan u yocsic u yóol ti'o'.

¹³Ba'ax unaje', líikes a wóole'ex ta baatzile'ex sáamsamal, ca'aliquil ma' máanac u kiinil bejela'e'; u ti'al mix jun túul ti' te'ex ca chichchajac u pucsi'ikal tu yo'olal tusa'anil tumen le kebano'.

¹⁴Tumen wa c p'áatal jeedzel tac tu xuul ti' le alab óolal yanji' to'on le ca j cáaje', bey túuno' táacpaja'ano'on yéetel Cristo.

¹⁵Bey cu ya'ala'al: Bejela'e', wa te'ex ca wu'uyique'ex ba'ax cu ya'alic Kue', ma' a dzu'iquintic a pucsi'ikale'ex je'el bix le máaxo'ob tu cúulpachcunto'ob Kuo'.

¹⁶¿Máaxo'ob le tu yu'ubajo'ob u t'aan Ku cu dzo'ocole' ca tu cúulpachcunto'ob? ¿Ma' wa tuláacal le máaxo'ob jóoko'ob yéetel Moisés ti' u lu'umil Egipto?

¹⁷¿Máax yéetel kuuxilnaj Ku tu yáam cuarenta ja'abo'ob? ¿Ma' wa yéetel le máaxo'ob kebanchajo'obo' yéetel j lúubo'ob quimen te x tocoy lu'umo'?

¹⁸¿Ti' máaxo'ob tu ya'alaj Ku yéetel páajtalil ma' bíin ococo'ob ti' u je'eleli'? ¿Ma' wa ti' le máaxo'ob x ma' u'uyaj t'aanajo'obo'?

¹⁹C ilic túune' ma' páatji' u yooclo'obi' tumen ma' ocsaj óolnajo'obi'.