Read Yucateco Hebreos 5 Bible Online

Hebreos 5 - Yucateco bible

Hebreos 5

¹Tuláacal nojoch aj kiine' yéeya'an ichil máaco'ob yéetel dza'an u ti'al u yantal tu táan Ku tu yo'olal máaco'ob yéetel u ti'al u kub siibalo'ob yéetel quiimsbil siibalo'ob tu yo'olal le kebano'.

²Tumen le aj kiino' cu mukyajtic xan x ma' muukile' le o'olal je'el u páajtal u ch'a'ic óotzilil ti' le máaxo'ob mixba'al u yojelo'obo' bey xan ti' le máaxo'ob saatalo'obo'.

³Tu yo'olal u x ma' muukile' yaan u kubic quiimsbil siibalo'ob tu yo'olal u keban leti', bey xan tu yo'olal u keban le máaco'obo'.

⁴Mix máac cu páajtal u beetic u nojoch aj kiinil chéen tu juunal u yóol; Ku máax t'anic yéetel máax dzáic le nojbe'enil ti'o' je'el bix tu beetaj yéetel Aarone'.

⁵Bey xan cu yúuchul yéetel Cristo; leti'e' ma' tu beetaj u nojoch aj kiinil chéen tu juunal u yóoli', ba'ale' Ku máax dzáa le nojbe'enil ti'o' je'el bix tu ya'alaj ti'o': Teche' in Paalech; tene' dzo'oc in dzáic teech cuxtal bejela'e'.

⁶Je'el bix tu ya'alaj xan ti' u láak tu'ux ti' le Quili'ich Dzíibo': Teech nojoch aj kiinech mantadz, je'el bix Melquisedeque'.

⁷Le ca j yanji' Cristo way yóokolcaabe', j payalchi'inaj yéetel j káat óolnaj yéetel ka'am t'aan bey xan yéetel u ja'il u yich, ti' Ku, máax yaan páajtalil ti' u ti'al u toquic ti' quíimil; Kue' tu yu'ubaje' tu yo'olal u kub óolal.

⁸Bey túuno' Cristoe', quex Paale', tu canaj u'uyaj t'aan tu yo'olal ba'ax yanchaj u mukyajtic;

⁹le ca j beeta'ab utzil chuca'anchajle', j kuch u beetubáa u sayabil tocsajil mina'an u xuul u ti'al tuláacal le máaxo'ob u'uyic u t'aano';

¹⁰tumen Kue' tu ya'alaj leti' le nojoch aj kiino' je'el bix Melquisedeque'.

¹¹Ya'ab ba'ax yaan c a'al tu yóokol le ba'ala', ba'ale' talam u tzo'olol tumen te'exe' xaan a na'ataje'ex.

¹²Tu yo'olal dzo'oc u máan ya'abcach kiino'obe' te'exe' unaj aj ca'anbesaje'ex; ba'ale' láili' kabéet te'ex ca tzo'oloc tu ca'a téen u yáax ba'alilo'ob u ca'ansajo'ob Ku. Tumen dzo'oc u p'áatal jach mina'an a muuke'exe', kabéet a wukique'ex leche' ma' chichich janali'.

¹³Tuláacal máax cu tzéenticubáa yéetel lechee' bey chaan paale', tumen ma' kuchuc u na'at u ca'ansajilo'ob le toj cuxtalo'.

¹⁴Ba'ale' le chichich janalo' u ti'al le máaxo'ob dzo'oc u nucuch wíinictalo'obo', máaxo'ob dzo'oc u canico'ob p'is óolal tumen dzo'oc u suuctal ti'ob u ch'a'a nu'uctico'ob ba'ax le utzo' bey xan ba'ax le kaaso'.