Read Yucateco Santiago 2 Bible Online

Santiago 2 - Yucateco bible

Santiago 2

¹Sucu'une'ex te'ex ca wocsaj óoltique'ex c nojbe'en Yuumtzil Jesucristoe', ma' unaj a pactique'ex jela'an jun túul máac tu yóokol u láaki'.

²Je'el bix lela': wa cu yocol ti' le cúuchil tu'ux ca much'tale'exo' jun túul máaque' yaan tu kabe' jun p'éel anillo beeta'an yéetel oro, yéetel u búuquintmaj jun p'éel co'ocoj nook, bey xan cu yocol jun túul máac óotzil u búuquintmaj jun p'éel ja'aja'at nooke',

³yéetel ca táan óoltique'ex ma'alob le máax u búuquintmaj le co'ocoj nooko' yéetel ca wa'alique'ex ti': Culen waye' ti' le ma'alob cúuchila'; ba'ale' ti' le máac óotzilo' ca wa'alique'ex: Teche' wa'alen te'elo', wa culen te j lu'umo';

⁴le beyo' táan a pactique'ex jela'anil jun túul máac tu tzéel u láak, táan a p'is óolale'ex yéetel kaakas tuucul.

⁵In yaabilaj sucu'une'ex, u'uye'ex lela': Kue' u yéeymaj le máaxo'ob óotzilo'ob wa yóokolcaabe', u ti'al ca ayikalchajco'ob ti' ocsaj óolal yéetel u ti'al ca u kamo'ob le ajawil u ya'almaj u dzáic ti' le máaxo'ob yaabilmailo'.

⁶Ba'ale' te'exe' ca pajique'ex u subtal le máaxo'ob óotzilo'obo'. ¿Ma' le máaxo'ob ayikalo'ob jaantic u yich a meyaje'exo' yéetel máaxo'ob jíiltique'ex tu táan le jalach wíinico'obo'?

⁷¿Ma' wa leti'ob máaxo'ob cu t'aano'ob kaas tu yo'olal le jadzutz kaaba' ch'a'achi'ita'ab ta wo'olale'exo'?

⁸Wa tu jaajil ca dzo'ocbesique'ex le nojoch a'almaj t'aan je'el bix cu ya'alic le Quili'ich Dzíibo': Yaabilt a láak je'el bix a yaabilticabáa teche', ma'alob ba'ax ca beetique'ex.

⁹Ba'ale' wa ca caxtique'ex u jela'anil jun túul máac tu yóokol u láake', táan a kebanchajle'ex yéetel táan a si'ipiltale'ex tu táan u ya'almaj t'aan Ku.

¹⁰Tumen wa jun túul máac cu dzo'ocbesic tuláacal le a'almaj t'aano', ba'ale' cu p'atic jun p'éel wa ba'ax ti' le a'almaj t'aan ma' táan u dzo'ocbesico', cu si'ipiltal ti' tuláacal le a'almaj t'aano'.

¹¹Tumen le Ku máax tu ya'alaj: Ma' a nupkebantal, tu ya'alaj xan; Ma' a quiimsaj wíinic. Bey túuno', wa jun túul máac ma' tu kebantal ba'ale' cu quiimsaj wíinique', dzo'oc u beetic u ma' u'uyaj t'aanil tu táan le a'almaj t'aano'.

¹²Te'exe' unaj a t'aane'ex yéetel a cuxtale'ex je'el bix le máaxo'ob bíin p'is óolta'aco'obo' yéetel le a'almaj t'aan cu dzáic to'on jáalkabilo'.

¹³Tumen le máaxo'ob ma' teech u ch'a'ico'ob óotzililo', x ma' ch'a'a óotzilil bíin p'is óolta'aco'ob; ba'ale' le máaxo'ob cu ch'a'ico'ob óotzililo', bíin jóokoco'ob yéetel utz tu kiinil le p'is óolo'.

¹⁴In sucu'une'ex, ¿ba'ax u biilal ti' máac wa cu ya'alic yaan ocsaj óolal ti' ba'ale' ma' táan u beetic utzil meyajo'ob? ¿Je'el wa u páajtal u to'ocol tumen le ocsaj óolalo'?

¹⁵Co'ox tucultique' ti' jun túul sucu'un wa quiique' cu bineltic le nook yéetel le waaj kabéet ti' le kiino',

¹⁶yéetel jun túul ichile'exe' cu ya'alic ti'e': Ca xi'ic teech utzil; tep'abáa yéetel jaanen, ba'ale' ma' táan u dzáic ti' le ba'ax kabéet u ti'al le wíinclilo' ¿ba'ax u biilal lelo'?

¹⁷Bey u yúuchul yéetel le ocsaj óolalo'; wa ma' tu ye'esa'al yéetel utzil meyajo'obe', le ocsaj óolalo' quimen.

¹⁸Ba'ale' je'el u yúuchul u ya'alic wa máaxe': Teche' yaan teech ocsaj óolal, tene' quin beetic utzil meyajo'ob. E'es teen túun a wocsaj óolal x ma' utzil meyajo'obe' teen túune' quin we'esic teech in wocsaj óolal tu yo'olal le utzil meyajo'ob quin beetico'.

¹⁹Teche' ca wocsaj óoltic yaan chéen jun túulili' Ku, ma'alob ba'ax ca beetic; ba'ale' le kaakas pixano'obo' cu yocsaj óoltico'ob lela', yéetel cu quiquilanquilo'ob tu yo'olal u sajaquilo'ob.

²⁰Ba'ale' ma' a káat a kaj óolt, j ma' na'at wíinic, le ocsaj óolalo' ma' tu ye'esa'al yéetel utzil meyajo'obo' jun p'éel ba'al quimen

²¹Kue' tu kamaj Abraham, c úuchben taata bey jun túul máax toje' tu yo'alal le ba'ax tu beetaj ca tu kubaj u paal Isaac bey jun túul quíimsbil siibale'.

²²Ca wilique' ti' Abrahame' le ocsaj óolalo' tu ye'esajubáa yéetel le ba'ax tu beetajo'.

²³Bey dzo'ocpajic le Quili'ich Dzíib cu ya'alic beya': Abrahame' tu yocsaj óoltaj Ku, yéetel tu yo'olal u yocsaj óolale' Kue' tu kamaj bey jun túul máac toje'. Abraham túune' kaaba'inta'ab u amigo Ku.

²⁴Dzo'oc a wilique'ex, túun, Kue' cu kamic máac tac tu yo'olal le utzil meyajo'ob cu beetico', ma' chéen tu yo'olal u yocsaj óolali'.

²⁵Bey xan úuchic yéetel Rahab, le co'olel kaas u cuxtalo'; Kue' tu kamaj bey jun co'olel toje' tu yo'olal le utzil meyaj tu beetajo' iquil tu kamic ma'alob le máaxo'ob túuxta'abo'obo', yéetel iquil tu yáantilaco'ob jóokol ti' u láak bej.

²⁶Bey je'el bix le wíinclil x ma' pixanil quimeno', bey xan le ocsaj óolalo' wa ma' tu ye'esa'al yéetel utzil meyajo'obe' quimen u yanil.