Read Yucateco Santiago 4 Bible Online

Santiago 4 - Yucateco bible

Santiago 4

¹¿Tu'ux u taal le quiimsajbáil yéetel le ba'atelilo'ob ichile'exo'? ¿Ma' wa ti' le kaakas dzíibolalo'ob cu ba'atelo'ob mantadz ichil a wíinclile'exo'?

²Te'exe' a káate'ex wa ba'ax, ba'ale' tumen ma' tu páajtal u yantal te'exe' ca muukulmuke'ex yéetel ca ba'atele'ex. Ma' táan u páajtal u yantal te'ex ba'ax a káate'exe' tumen ma' táan a káatique'ex ti' Ku.

³Wa ca káatique'exe' ma' táan a kamique'ex tumen ma' ta káatique'ex tu beel; tumen ca káatique'ex u ti'al a xu'uxupe'ex ti' a kaakas dzíibolale'ex.

⁴¡Nupkeban máaque'ex! ¿Ma' a wojele'exe' u bisicubáa máac yéetel u yóokolcaabe' cu beeticubáa u aj p'eec Ku? Je'el máaxac ca u dzáa u yóol u beeticubáa u amigo yóokolcaabe' cu sutcubáa u aj p'eec Ku.

⁵Yaan ba'ax o'olal cu ya'alic le Quili'ich Dzíibo': Le Pixan tu beetaj Ku u cajtal ti' to'ono' u yaabiltmajo'on tu jaajil u yóol.

⁶Ba'ale' Kue' cu asab áantico'on yéetel u siibal utzil; tumen le Quili'ich Dzíibo' cu ya'alic: Kue' cu toquicubáa ti' le máaxo'ob ca'analtac u yicho'obo', ba'ale' cu dzáic u siibal ti' le máaxo'ob cabal u yóolo'obo'.

⁷Dzáaba'ex yáanal u páajtalil Ku. tocaba'ex ti' kaasil ba'al, leti' xane' bíin áalcabnac te'ex.

⁸Nadzaba'ex ti' Ku, leti' xane' bíin u nadzubáa ti' te'ex. J kebane'ex, p'o'ex a kabe'ex; te'ex ca'a p'éel a wóole'exe', p'o'ex a pucsi'ikale'ex.

⁹Okomchajac a wóole'ex, okolnene'ex yéetel yajchajac a wóole'ex. A che'eje'exe' suunac okolil, a qui'imac óole'exe' suunac okom óolalil.

¹⁰Cabalcuuntaba'ex tu táan Yuumtzil, leti' túune' bíin u cabalcunse'ex.

¹¹Sucu'une'ex, ma' a kaakas t'aanticaba'ex ta baatzile'ex. Le máax cu kaakas t'aan tu tu yo'olal jun túul sucu'une', wa cu p'is óoltique', táan u t'aan tu tu yo'olal le a'almaj t'aano' yéetel táan u p'is óoltic. Wa ca p'is óoltic le a'almaj t'aano', ca beeticabáa aj p'is óol, ma' túun ta wu'uyic u t'aan le a'almaj t'aano'.

¹²Ba'ale' chéen yaan jun túul máax dzáa le a'almaj t'aano', leti' xan máax juez, leti' xan máax cu páajtal u tocsaj wa u xu'ulsaj. ¿Ba'ale' teche', máaxech u ti'al a p'is óolt a láak?

¹³Bele' u'uye'ex lela', te'ex ca wa'alique'ex: Bejela'a wa sáamale' bíin xi'ico'on ti' wa ba'ax caajil, ti' bíin c beet jun ja'abi', ti' bíin c meyajt c ba'aluba'obi' yéetel bíin náajalnaco'oni'.

¹⁴mix túun a wojele'ex ba'ax cun úuchul sáamali'. ¿Tumen ba'ax u cuxtal jun túul máac? Bey le ye'eb cu chíicpajal tu yo'olal jun súutuco' cu dzo'ocole' cu sa'atal.

¹⁵Ba'ax unaj a wa'alique'exe' leti' lela': Wa Yuumtzil u káate', bíin cuxlaco'on yéetel bíin c beet lela' wa lelo'.

¹⁶Ba'ale' te'exe' a dzaamaj a wóole'ex t'aan yéetel ca'anal ichil; tuláacal le ca'anal ichil beya' kaas.

¹⁷Le máax u yojel u beet ba'ax utz, ba'ale' ma' tu beetique', táan u kebantal.