Read Yucateco Santiago 5 Bible Online

Santiago 5 - Yucateco bible

Santiago 5

¹U'uye'ex lela, ¡ayikale'ex! Okolnene'ex yéetel awatnene'ex tu yo'olal le yaayaj óolalo'ob bíin taalac ta wóokole'exo'.

²A ayikalile'exe' dzo'oc u tu'utal, yéetel a co'ocoj nooke'exe' dzo'oc u jaanta'al tumen j kamas.

³A oroex yéetel a plataexe' dzo'oc u cuuxumtalo'ob, lela' bíin suunac jun p'éel tac pool ta wóokole'ex, yéetel bíin u xu'uls a bakele'ex bey yéetel káake'. Dzo'oc a nijcunsique'ex ayikalilo'ob ti' u dzo'oc kiino'oba'.

⁴Le bo'ol ma' ta beetaje'ex ti' le máaco'ob meyajnajo'ob ti' a jooche'exo', táan u ka'am t'aano'ob ta ta wóokole'ex, le Yuumtzil yaan tuláacal páajtal ti'o' dzo'oc u yu'ubic u yawat t'aan le j meyajo'obo.

⁵Way yóokolcaabe' te'exe' j cuxlaje'ex ichil co'ocoj ba'alo'ob yéetel ichil lu'umcabil qui' óolalo'ob, táan a poloctale'ex u ti'al u kiinil le quiimsajo'.

⁶Te'exe' ta xot kintaje'ex yéetel ta quiimsaje'ex le máax mina'an u si'ipilo', leti'e' ma' tu toquicubáa ti' te'exi'.

⁷Le o'olale', sucu'une'ex, yanac te'ex chuca'an óolal tac quéen taalac Yuumtzil. Le j meyjil káax cu pa'atic u molic le jadzutz joocho', yaan u pa'atic yéetel chuca'an óolal u taal u kiinilo'ob u káaxal ja'.

⁸Yanac te'ex xan chuca'an óolal yéetel ma' u lúubul a wóole'ex, tumen táan u náadzal u kiinil u taal Yuumtzil.

⁹Sucu'une'ex, ma' a taquic a poole'ex ta baatzile'ex, u ti'al ma' a p'is óolta'ale'ex; tumen Ku máax leti' le Juezo', ti' yaan tu jool naje'.

¹⁰In sucu'une'ex, canbalnene'ex ti' u mukyaj yéetel ti' u chuca'an óolal le aj bóobato' j t'aanajo'ob tu kaaba' Yuumtzilo'.

¹¹Tumen to'one' c tucultique' qui' u yóol le máaxo'ob cu mukyajo'ob yéetel chuca'an óolalo'. Te'exe' a wu'uymaje'ex u chuca'an óolal Job, yéetel dzo'oc a wojéeltique'ex ba'ax dzaab ti' tumen Yuumtzil tu xuul u cuxtalo'; tumen Yuumtzile' jach nojoch u ch'a'a óotzilil yéetel u yutzil.

¹²Ba'ale' tu yóokol tu tuláacale', in sucu'une'ex, ma' a ch'a'achi'itique'ex mix le ca'ano', mix le lu'uma', mix a wa'alique'ex u láak ch'a'a chi'ob. Le quéen a wa'ale'ex. Bey, tu jaajil bey, yéetel le quéen a wa'ale'ex. Ma'e', tu jaajil ma', u ti'al ma' a xot kinta'ale'ex tumen Ku.

¹³¿Yaan wa máax ti' te'ex táan u mukyaj? Unaj u payalchi'. ¿Yaan wa máax qui'imac u yóol? Unaj u kaay qui'iqui' kaayo'ob.

¹⁴¿Yaan wa máax koja'an? Unaj u t'anic u nuuquilo'ob le iglesiao', u ti'al ca payalchi'inaco'ob tu yo'olal yéetel u ti'al ca ji'ikabta'ac yéetel aceite tu kaaba' Yuumtzil.

¹⁵Le quéen payalchi'inaco'on yéetel ocsaj óolale', le koja'ano' yaan u tojtal u yóol, yéetel yaan u líiksa'al tumen Yuumtzil; yéetel wa kebanchaja'ane' yaan u sa'atal ti'.

¹⁶Le o'olale', cáant a kebane'ex ta baatzile'ex, yéetel payalchi'inene'ex ta baatzile'ex, u ti'al ca dza'abac a toj óolale'ex. Le payalchi' cu beeta'al yéetel kub óolal tumen jun túul máac utze' jach nojoch u páajtalil.

¹⁷Aj bóobat Elíase' jun túul máac je'el bixo'one'; le ca tu káataj ich payalchi' ma' u káaxal ja'e', óox p'éel ja'ab ca tac táanchumuc ma' káax ja' yóokol lu'umi'.

¹⁸Cu dzo'ocole' le ca j payalchi'inaj tu ca'a téene', káax ja' tu ca'a téen, le lu'um túuna' tu dzaj u yicho'ob.

¹⁹In sucu'une'ex, wa jun túul ti' te'ex cu tzéelel ti' le jaajo', yéetel u láake' cu beetic u suute',

²⁰ojéelte'exe' je'el máax ca u beet u suut le j keban u ti'al u p'atic u kaakas beele', bíin u toc ti' quíimil u pixan le j kebano', yéetel bíin u beet u sa'atal ya'abcach kebano'ob.