Read Yucateco 1 Pedro 2 Bible Online

1 Pedro 2 - Yucateco bible

1 Pedro 2

¹Le o'olale' p'ate'ex tuláacal u jejeláasil kaas, tuláacal tuusil, ca'a p'éel ichil yéetel kaakas dzíibolalil, yéetel tuláacal u jejeláasil a'alaj ba'al.

²Je'el bix paalalo'ob táant u síijilo'obe' dzíibolte'ex yéetel yaamyamil le pixanbe'en leche mina'an u kasa'anilo', u ti'al ca ch'íijique'ex tu yo'olal yéetel ca yanac te'ex tocsajil,

³wa tu jaajil dzo'oc a wilique'ex Yuumtzile' utz.

⁴Co'ox nadzicbáa, túun ti' Yuumtzil, je'el bix ti' jun p'éel cuxa'an tuunich p'ecta'an tumen máaco'ob, ba'ale' yaabilta'an tumen Ku je'el bix jun p'éel tuunich yéeya'an yéetel nojoch u tojole'.

⁵Te'ex xane', je'el bix cuxa'an tuunicho'obe', cha'ex a meyajta'ale'ex tumen Ku, ca u beet ti' te'exe' jun p'éel pixanbe'en naj, jun múuch' kiino'ob quili'ichcunta'ano'ob, máaxo'ob tu yo'olal Jesucristoe' cu dzáico'ob pixanbe'en siibalo'ob cu páajtal u ka'amalo'ob tumen Ku.

⁶Le o'olal xane' le Quili'ich Dzíibo' cu ya'alic: Tene' quin dzáic Sión jun túul máax u noj tuunichil le najo', jun p'éel tuunich yéeya'an yéetel nojoch u tojol; le máax cu yocsic u yóol ti'e' ma' bíin sublaccunta'aqui'.

⁷A ti'al te'ex ca wocsaj óolale'exe' le tuunicho' jach nojoch u tojol ba'ale' u ti'al le máaxo'ob ma' táan u yocsaj óolo'obo', cu dzo'ocpajal ba'ax cu ya'alic le Quili'ich Dzíibo': Le tuunich p'ecta'ab tumen le pakbalo'obo', j kuch u beet u noj tuunichil.

⁸Bey xan cu dzo'ocpajal ba'ax cu ya'alic: Jun p'éel tuunich u ti'al t'óochpajal, yéetel jun p'éel nojoch tuunich cu beetic u lúubul máac. Tumen leti'obe' cu t'óochpajlo'ob tumen ma' táan u beetico'ob u cuentail le ma'alob péectzilo'; j dzaabo'ob xan u ti'al lela'.

⁹Ba'ale' te'exe' jun p'éel caaj yéeya'ane'ex, jun múuch' kiino'ob táan u meyajtico'ob le ajawo', jun p'éel caaj quili'ich, jun p'éel caaj u ti'al Ku. Lela' bey anilo' u ti'al ca tze'ecte'ex u jakbe'en meyajo'ob Ku, máax t'ane'ex u ti'al ca jóokoque'ex ti' le éekjoch'e'enilo' u ti'al ca ocoque'ex ti' le qui'ichquelem sáasil.

¹⁰Te'ex ca'ache' mix caajale'exi', ba'ale' bele' u caajale'ex Ku; ca'ache' mix máac ch'a'ic te'ex óotzilil, ba'ale', bele' Kue' u ch'a'amaj óotziilil te'ex.

¹¹In yaabilaj sucu'une'ex, quin káat óoltic te'ex, je'el bix ti' táanxel lu'umilo'ob caja'ano'ob náach ti' u lu'umo'obe', ma' dzáique'ex cúuchil ti' le yóokolcaabil dzíibolalo'ob cu ba'atelo'ob tu contra le pixano'.

¹²xíimbalnene'ex ma'alob ichil le máaxo'ob ma' u kaj óolo'ob Kuo'. Beyo' leti'obe', quex táan u t'aano'ob bele' ta contraex je'el bix wa beye'ex loolob máaque'exe', bíin u yilo'ob le utz ca beetique'exo' yéetel bíin u qui'iqui' t'anto'ob Ku le quéen kuchuc u kiinil u xíimbalta'alo'obe'.

¹³Tu yo'olal yaacunaj ti' Yuumtzile', dzáaba'ex yáanal tuláacal páajtalil,

¹⁴bey xan tu yáanal le jalach wíinico'ob túuxta'ano'ob tumen leti'o' u ti'al u jadzico'ob le máaxo'ob loolob máaco'obo' yéetel u ti'al u tziquico'ob le máaxo'ob cu beetico'ob utzo'.

¹⁵Tumen Kue' u káat ca a beete'ex le utzo', u ti'al a beetique'ex u maquic u chi'ob le máaxo'ob mix ba'al u yojelo'obo' yéetel j ma' na'ato'obo'.

¹⁶Cuxlene'ex ma'alob je'el bix máaco'ob jáalkabo'obe' ba'ale' ma' a ch'a'ique'ex le jáalkabilo' je'el bix jun p'éel ba'ax o'olalil u ti'al a beetique'ex le kaaso'. Xíimbalnene'ex je'el bix u paalilo'ob Kue'.

¹⁷Tziquilte'ex je'el bix unaje'. Yaabilte'ex le sucu'uno'obo', ch'a'ex sajaquilil ti' Ku, tziquilte'ex le ajawo'.

¹⁸Palitzile'ex, dza'aba'ex yéetel tuláacal tziiquil yáanal u kab a dzuulile'ex, ma' chéen ti' le máaxo'ob utzo'ob yéetel cu ch'a'ico'ob óotzilil te'exo' ba'ale' tac ti' le máaxo'ob kasa'ano'obo'.

¹⁹Tumen jun p'éel ba'al ma'alob wa yaan máax cu mukyajtic yaayaj óolalo'ob ma' unajo'obi' tu yo'olal u kub óolal tu táan Ku.

²⁰Tumen wa te'ex ca beetique'ex ba'al kaase', yéetel tu yo'olal lelo' ca ja'adzale'exe', ¿ba'ax ca numyajtique'ex iquil a mukyaje'ex yéetel chuca'an óolal? Ba'ale' wa ca mukyaje'ex tu yo'olal a beetique'ex ba'al utze', yéetel ca mukyaje'ex yéetel chuca'an óolale', lela' ma'alob tu táan Ku.

²¹Tumen Kue' tu t'anaje'ex u ti'al lela', tumen Cristoe' mukyajnaj ta wo'olale'ex, ca tu dzaj te'ex jun p'éel ca'ansaj, u ti'al ca cuxlaque'ex je'el bix cuxlajic leti'o'.

²²Leti'e' ma' tu beetaj mix jun p'éel kebani', yéetel jun puli' ma' tu tusaj mix máaqui';

²³le ca j po'och'e' ma' tu núucaj yéetel pooch'ilo'obi'; le ca j beeta'ab u mukyaje', ma' kaakas t'aanaji', ba'ale' tu kubentaj ti' Ku máax cu p'is óol jach tu beel.

²⁴Cristoe' tu bisaj c kebano'ob tu wíinclil tu yóokol le cruzo', u ti'al ca quíimico'on ti' le kebano' yéetel ca cuxlaco'on ti' jun p'éel toj cuxtal. Leti'e' j loobilta'abi u ti'al ca dza'acaque'ex te'ex.

²⁵Tumen te'exe' táan a máane'ex ca'ach je'el bix j tamano'ob saatalo'obe', ba'ale' bele' dzo'oc a suute'ex ti' Cristo, máax canantique'ex je'el bix j tamano'ob saatalo'obe', ba'ale' bele' dzo'oc a suute'ex ti' Cristo, máax canantique'ex je'el bix jun túul j canan j tamane', yéetel tu kab leti' yaan a pixane'ex.