Read Yucateco 1 Pedro 4 Bible Online

1 Pedro 4 - Yucateco bible

1 Pedro 4

¹Le o'olale', je'el bix Cristo mukyajnaj ti' u wíinclile', bey xan te'exe' unaj u chuca'antal a wóole'ex u ti'al mukyaj. Tumen le máax dzo'oc u mukyaj ti' u wíinclile' mix ba'al yaan u yil yéetel le kebano',

²u ti'al u cuxtal tuláacal u yalab u cuxtale' je'el bix u káat Kue' ma' u ti'al u dzo'ocbesic u dzíibolal le lu'umcabil wíinclila'.

³Dzo'oc u ya'abtal a beetique'ex ti' le kiino'ob dzo'oc u máano'obo' le ba'ax utz tu t'aan le máaxo'ob ma' u kaj óolo'ob Kuo'. Ti' le kiino'obo' te'exe' j cuxlaje'ex ti' x ma' subtal cuxtalil, ti' kaakas dzíibolalo'ob, ti' cáaltalilo'ob yéetel ti' patan janalilo'ob, táan u píitmáan a wukule'ex yéetel táan a kultique'ex p'ecbe'en beetbil Kuo'ob.

⁴Leti'obe' jela'an u yilico'ob ma' táan a wéet xíimbale'ex tu yéetelo'ob ti' le kaakas cuxtalo', le o'olale' cu t'aano'ob kaas ta wéetele'ex.

⁵Ba'ale' leti'obe' yaan u tzolico'ob bix u cuxtalo'ob ti' le máax nu'uctáant u ti'al u p'is óolt le máaxo'ob cuxa'ano'obo' bey xan le quimeno'obo'.

⁶Tumen tze'ecta'ab le ma'alob péectzilo' ti' le máaxo'ob Quimeno'obo', u ti'al ca páatac u cuxtalo'ob ti' u pixano'obe' je'el bix cuxa'an Kuo', quex tumen way yóokolcaabe' p'is óolta'abo'ob je'el bix tuláacal máaco'obe'.

⁷Táan u náadzal u xuul tuláacal ba'al. Le o'olale' tojchajac a tuucule'ex yéetel dza'aba'ex payalchi' tu jaajil a wóole'ex.

⁸Tu yóokol tuláacal ba'ale' ca yanac yaacunaj ichile'ex, tumen le yaacunajo' cu sa'atsic ya'abcach kebano'ob.

⁹Kamaba'ex ta baatzile'ex ta wotoche'ex x ma' kuuxilil.

¹⁰Cada jun túule' ca u meyajt u láak máaco'ob je'el bix le páajtalil dza'an ti' tumen Kuo', je'el bix máaxo'ob cu beetico'ob u meyajo'ob ma'alob u jejeláas utzil siibal Kue'.

¹¹Wa yaan máax cu tze'eque' u tze'ect u t'aano'ob Ku. Wa yaan wa máax cu beetic wa ba'ax meyajile', u beet yéetel le muuk cu dza'abal ti' tumen Kuo'. Tuláacal ba'al ca a beete'exe', beete'ex u ti'al u qui'iqui' t'anta'al Ku tu yo'olal Jesucristo, ti' máax yaan le nojbe'enilo yéetel le páajtalilo' u ti'al kiino'ob mina'an u xuul, Amén.

¹²In yaabilaj sucu'une'ex, ma' a wilque'ex jela'an le yaayaj mukyajo'ob cu taal ta wóokole'exo', bey je'el bix táan u yúuchul te'ex wa ba'ax jela'ane'.

¹³Ba'ax unaje', qui'imachchajac a wóole'ex tumen cu páajtal a táacpajle'ex ti' u mukyajo'ob Cristo, u ti'al ca chu'upuque'ex xan yéetel qui'imac óolal le quéen a wile'ex u nojbe'enil u taalbalo'.

¹⁴Wa ca po'och'ole'ex tu yo'olal Cristoe', qui' a wóole'ex; tumen u nojbe'en Pixan Kue' ti' yaan ta wóokole'exe'. Leti'obe' cu t'aano'ob kaas tu yo'olal leti', ba'ale' te'exe' ca tziquique'ex.

¹⁵Wa máax ti' te'ex cu mukyaje', ma' u mukyaj tumen quíimsaj wíinic, wa j oocol, wa kaas u cuxtal, wa tumen cu yocsicubáa ti' u ba'aluba'ob yaanal máaco'ob.

¹⁶Wa yaan máax cu mukyaj tumen Cristianoe', ma' unaj u ch'a'ic subtali' ba'ale' unaj u qui'iqui' t'antic Ku tu yo'olal.

¹⁷Tumen dzo'oc u kuchul u kiinil u caajal le p'is óolo' yéetel u yéet otochnáalo'ob Ku. Wa le p'is óol táan u cáajal bey t éetelo', ¿bix cun dzo'ocol le máaxo'ob ma' táan u yu'ubaj t'antico'ob u ma'alob péectzil Kuo'?

¹⁸Wa le máaxo'ob utzo'ob istiquiail u to'ocolo'obo', ¿ba'ax cun j úuchul yéetel le máaxo'ob kasa'ano'obo' bey xan yéetel le j kebano'obo'?

¹⁹Bey túuno' le máaxo'ob cu mukyajo'ob je'el bix u káat Kuo', unaj u beetico'ob láili' le utzo', yéetel u kubentico'ob u pixano'ob tu kab Ku máax beeto'ob, tumen leti'e' chuca'an u yóol.