Read Yucateco 1 Pedro 5 Bible Online

1 Pedro 5 - Yucateco bible

1 Pedro 5

¹Quin tzol xiquintic u ancianoilo'ob le u múuch'ul le ocsaj óolo'ob yano'ob ichile'exo', tumen tene' ancianoen je'el bix leti'obe' yéetel jun túulen u jaajcunajil u mukyajo'ob Cristo, bey xan je'el bix leti'obe' yaan in táacpajal ti' le nojbe'enil bíin chíicapajac tu dzooco'.

²Canante'ex je'el bix canan j tamano'obe' le u j tamano'ob Ku kubenta'an te'exo'; beete'ex yéetel ma'alob óolal, je'el bix u káat Kue', ma' tumen táan u tza'abal te'exi', mix tumen táan a dzíiboltique'ex taakini'. Beete'ex a meyaje'ex yéetel ma'alob óolal,

³ma' bey te'ex u yuumil le ba'ax ca canantique'exo', ba'ale' beete'ex tac tu'ux cu páajtal a we'esique'ex ma'alob bej ti' le j tamano'obo'.

⁴Beyo', le quéen chíicapajac le nojoch J canan j tamano', te'exe' bíin a kame'ex jun p'éel nojbe'en péet jo'ol ma' teech u kastal.

⁵Bey xan te'ex, táanquelem máaque'ex, dza'aba'ex yáanal u kab le anciano'obo'. Tuláacale'ex unaj a dzáicaba'ex yáanal a kabe'ex ta baatzile'ex yéetel cabal óolal, tumen: Kue' cu xachicubáa ti' le j ca'ana'al icho'obo', ba'ale' cu dzáic u siibal utzil ti' le máaxo'ob cabal u yóolo'obo'.

⁶Cabalchajac túun a wóole'ex yáanal u páajtalil u kab Ku, u ti'al ca líiksaque'ex tumen leti' le quéen kuchuc u kiinil.

⁷P'ate'ex tuláacal a yaamyam óolale'ex tu kab Ku, tumen leti'e' u dzaamaj u yóol u canante'ex.

⁸Il a wile'ex ma'alob ba'ax ca beetique'ex yéetel p'il ichnene'ex; tumen a enemigoex le kaasil ba'alo', táan u máan je'el bix león cu yáacame', táan u caxantic máax u luuke.

⁹Xachaba'ex ti', mu'uka'an jeedzele'ex ti' le ocsaj óolalo', tumen a wojele'ex a sucu'une'ex ti' tuláacal yóokolcaabe' táan u mukyajtico'ob xan le ba'alo'ob ca mukyajtique'exo'.

¹⁰Ba'ale' cu dzo'ocol a mukyaje'ex tu yo'olal jun p'íit kiine', Kue' bíin u beete'ex jach toje'ex, jeedzel a wanile'ex, mu'ukane'ex yéetel ma'alob a wanile'ex. Leti' u Kuil tuláacal siibal utzil máax dzo'oc u t'anico'on u ti'al ca táacpajaco'on ti' u nojbe'enil mina'an u xuul jun múuch' yéetel Jesucristo.

¹¹Ti' leti' ca dza'abac le nojbe'enilo' yéetel le páajtalilo' u ti'al kiino'ob mina'an u xuul jun múuch' yéetel Jesucristo. Amen

¹²Yéetel u yáantaj silvano', máax quin tucultic jun túul sucu'un chuca'an u yóole', quin dzíibtic te'ex le chan ju'una' iquil in tzol xiquintique'ex yéetel quin wa'alic te'exe' le ba'ax dzo'oc a kamique'exo' jach tu jaajil u siibal utzil Ku. Jéedzel p'áatene'ex ti'.

¹³Le iglesia yaan Babiloniao', le yéeya'an xan tumen Ku je'el bix te'exe', cu túuxtic te'ex tziiquil t'aano'ob, bey xan in paal Marcos.

¹⁴Tziiquil t'antaba'ex ta baatzile'ex yéetel u dzu'udzil yaacunaj sucu'untzilo'ob. Ca yanac jéedzel óolal ti' tuláacale'ex máaxe'ex u ti'ale'ex Jesucristo.