Read Yucateco 2 Pedro 2 Bible Online

2 Pedro 2 - Yucateco bible

2 Pedro 2

¹Ba'ale' yanchaj xan tuusil aj bóobato'ob ichil u caajil Israel; bey xan bíin yanac tuusil ca'anbesajo'ob ichile'ex. Leti'obe' bíin u x mucul ca'anso'ob tuuculo'ob cu kascunajo'ob, yéetel bíin u mixba'alcunto'ob beyo' le Yuumtzil máax j toco'obo', lela' bíin u taas tu yóokolo'obe' jun p'éel séeba'an xu'ulsajil.

²Ya'ab máax cun j bino'ob tu paacho'ob ti' u kaakas cuxtalo'ob, yéetel tu yóolalo'obe' bíin úuchuc t'aan kaas tu' yóokol u bejil le jaajo'.

³Tu yo'olal u dzíiboltico'ob ayikalile' yaan u jóoksico'ob te'ex taakin yéetel tuusil ca'ansajo'ob; ba'ale' mina'an tu'ux u jechico'ob le xu'ulsaj pa'atico'obo', tumen úuch xot kinta'aco'ob.

⁴Kue' ma' tu sa'atsaj le ángelo'ob kebanchajo'obo', ba'ale' tu pulajo'ob ich metnal ca tu p'atajo'ob ich éekjoche'enil, kala'ano'ob u ti'al u kiinil le p'is óolo'.

⁵Kue' ma' tu sa'atsaj xan le úuchben yóokolcaabo', ba'ale' tu túuxtaj le búulcabal tu yóokol le kasa'an máaco'obo; ca tu tocaj Noe', máax tu tze'ectaj toj cuxtal, yéetel u láak siete máaco'ob.

⁶Kue' tu xot kintaj xan u ti'al xu'ulsajil u caajilo'ob Sodoma yéetel Gomorra, ca tu tóocajo'ob tac u p'áatal chéen u ta'anil káak, u ti'al u dzáic tu yéetelo'obe' jun p'éel ka'asaj iik ti' le kaakas máaco'ob bíin cuxlaco'ob cu dzo'ocol u máano'ob leti'obo'.

⁷Ba'ale' tu tocaj Lot, máax jun túul utzil máac yéetel máax jach yaj tu yóol iquil u yilic u kaakas cuxtal le loolob máaco'obo'.

⁸Sáamsamal kiin le utzil máaco', máax caja'an ichilo'obo', cu mukyaj tu yutzil puksika'al tu yo'olal u yilic yéetel u yu'ubic le kaakas ba'alo'ob cu beetico'obo'.

⁹Beyo' Yuumtzile' u yojel u toc ti' le mukyajo'obo' le máaxo'ob u kubmajo'ob u cuxtalo'ob ti' leti'o', yéetel cu dzáic le máaxo'ob kasa'ano'obo' tu yáanal jaadz u ti'al u kiinil le p'is óolo',

¹⁰táanilbe'en le máaxo'ob cu bino'obo' tu paach le kaakas dzíibolalo'ob yéetel cu cúulpachcuntico'ob u páajtalil Yuumtzil. Chich u yóolo'ob yéetel co' u yóolo'ob, ma' sajaco'ob u poch'o'ob le nojbe'en páajtalilo'obo',

¹¹ca'aliquil le áangelo'obo', quex mas ya'ab u muuko'ob yéetel u páajtalilo'obe' ma' táan u kuchpajal u yóolo'ob u xot kinto'ob yéetel pooch'ilo'ob le nojbe'en páajtalilo'obo' tu táan Yuumtzil.

¹²Ba'ale' le máaco'oba' beyo'ob le ba'alche'ob mina'an u na'ato'obo', cu síijilo'ob, chéen u ti'al ca chu'ucuco'ob yéetel u ti'al ca quiimsa'aco'ob. Cu t'aano'ob kaas tu yo'olal ba'alo'ob ma' táan u na'atico'ob; ba'ale' quíimico'ob je'el bix u quíimil le ba'alche'obo',

¹³táan u mukyajo'ob tu yo'olal le ba'ax dzo'oc u beetico'ob u mukyaj u láako'obo'. Cu tucultico'ob qui' u yóolo'ob iquil u náaisic u yóolo'ob sáamsamal yéetel u qui'imac óolalil yóokolcaab. Leti'obe' jun p'éel sublaquil yéetel jun p'éel wo'och'táanbail ca'aliquil cu láakintique'exo'ob ti' a kiinbesaje'ex, táan u náaisic u yóolo'ob yéetel u tuusil qui'imac óolalo'ob.

¹⁴Ma' tu páajtal u yilico'ob jun túul co'olel wa ma' yaan u dzíiboltico'ob; ma' tu ca'analo'ob kebanchajal. Cu tu'ubsico'ob le máaxo'ob ma' jedza'an u tuuculo'obo', jach canbalnaja'ano'ob ti' le dzuulilo'; máaco'ob kaakas t'anta'ano'ob.

¹⁵Saatal u máano'ob tumen dzo'oc u tzelicuba'ob ti' le toj bejo'. Táan u queticuba'ob yéetel profeta Balaam u paal Beor, máax tu yaabiltaj u náajaltic taakin iquil u beetic le kaaso',

¹⁶ba'ale' j ke'ey tu yo'olal u kebane' tumen jun túul x toot burra j t'aanaj je'el bix u t'aan máaque' yéetel ma' tu cha'aj ti'o' ca xi'ic tu paach u chocojo'olali'.

¹⁷Le máaco'oba' beyo'ob ch'e'eno'ob tu'ux mina'an ja'e', beyo'ob xan múuyalo'ob cu bisa'alo'ob tumen ka'amcach iike' xot kinta'ano'ob u ti'al u máanso'ob le kiino'ob mina'an u xuulo' ichil sen éekjoche'enil.

¹⁸Tumen yéetel ca'anal ichile' cu ya'alico'ob t'aano'ob mix ba'al u biilalo'ob, bey xan yéetel le ba'alo'ob kaastac suuc u beeta'alo'ob yéetel kaakas dzíibolal máaco'obe' cu táabsico'ob le máaxo'ob tu jaajil dzo'oc u púudzulo'ob ca'ach ti' le máaxo'ob cuxa'ano'ob ich tuuso'.

¹⁹Cu dzaa t'antico'ob jun p'éel jáalkab cuxtal ba'ale' leti'obe' palitzilo'ob ti' jun p'éel kaakas cuxtal. Tumen jun túul máaque' palitzil ti' le ba'ax dza'ancha'atico'.

²⁰Tumen le máaxo'ob dzo'oc u kaj óoltico'ob c Yuumtzil yéetel c tocsajil Jesucristoe' yéetel dzo'oc u púudzulo'ob beyo' ti' u kasa'anilo'ob yóokolcaabe', wa cu dzo'ocole' cu cha'ico'ob u wo'oltalo'ob tu ca'a téen tumen le ba'alo'oba' yéetel cu dzáancha'atalo'ob tumeno'obe', asab kaas u p'áatalo'ob ti' le yanilo'ob ca'acho'.

²¹Tumen asab ma'alob u ti'alo'ob ca'ache' ma' u kaj óoltico'ob le toj bejo', que cu dzo'ocol u kaj óoltico'obe' ca u tzeluba'ob ti' le quili'ich a'almaj t'aan dzaab ti'obo'.

²²Ba'ale' dzo'oc u yúuchul ti'obe' jach je'el bix cu ya'alic le t'aana': Le peeko' cu suut ti' le ba'ax tu xéajo', yéetel le x leech táant u p'o'obolo' cu suut u balkesuba ti' le luuko'.