Read Yucateco 1 Juan 1 Bible Online

1 Juan 1 - Yucateco bible

1 Juan 1

¹C dzíibtic te'ex le ba'ax yanili' le ca j chu'unpaj tuláacalo', le ba'ax dzo'oc c u'uyico' yéetel dzo'oc c ilic yéetel c icho'obo'; le ba'ax dzo'oc c pactic yéetel dzo'oc machic yéetel c kabo'obo'. Lela' u t'aanil cuxtal.

²Le cuxtala' tu dzáajubáa kaj óoltbil, to'on túune' t ilaje' yéetel dzo'oc c t'aan tu yo'olal; yéetel táan tze'ectic te'ex le cuxtal mina'an u xuulo', le cuxtal yaan ca'ach tu yicnal le Taatao' yéetel dzo'oc u chíicpajal ti' to'on.

³C a'alic túun te'ex le ba'ax dzo'oc c ilico' yéetel dzo'oc c u'uyico', u ti'al ca a nupaba'ex t éetel, je'el bix to'on jach tu jaajil nuupul c anil yéetel Ku le Taatao' bey xan yéetel Jesucristo u Paal.

⁴Bey túuno', c dzíibtic te'ex le ba'alo'oba' u ti'al ca chúucpajac c qui'imac óolale'ex.

⁵Lela' leti' le ma'alob péectzil tu ca'ansaj to'on Jesucristoo' yéetel táan u tze'ectic ti' te'exa': Kue' sáasil, ti' leti'e' mina'an mix jun p'íit éekjoche'enil.

⁶Wa c a'alic nuupul c anil yéetele' cu dzo'ocole' cuxa'ano'on ich éekjoche'enile', táan c tuus ti' ba'ax c a'alic yéetel ba'ax c beetic.

⁷Ba'ale' wa cuxa'ano'on ti' le ba'ax sáasilo', je'el bix Ku ti' yaan ti' le sáasilo', nuupul c anil t baatzil, yéetel u ki'ikel Jesucristo u Paale' cu p'o'ico'on ti' tuláacal keban.

⁸Wa c a'alic mina'an c kebane', táan c tusicbáa t juunal, yéetel le jaajo' mina'an ti' to'on.

⁹Ba'ale' wa c cáantic c kebano'obe', je'el u páajtal c alab óoltique', Kue' yaan u beetic ba'ax toj; bíin u sa'ates c kebano'ob yéetel bíin u p'o'on ti' tuláacal kaas.

¹⁰Ba'ale' wa c a'alic ma' c beet mix jun p'éel kebane', táan c beetic u chíicpajal Kue' bey jun túul j tuuse', yéetel mina'an to'on u t'aané.