Read Yucateco 1 Juan 2 Bible Online

1 Juan 2 - Yucateco bible

1 Juan 2

¹In mejen paalale'ex, quin dzíibtic te'ex le ba'alo'oba' u ti'al ma' a kebanchajle'ex. Ba'ale' wa yaan máax cu kebanchajale', yaan to'on jun túul máax cu t'aan t o'olal tu táan le taatao', lela' Jesucristo', leti'e' toj.

²Jesucristoe' tu yo'olalil iquil u sa'atsa'al c kebano'ob; ma' chéen c keban to'oni' ba'ale' tac u kebano'ob u yóokolcaab.

³Wa c dzo'ocbesic u ya'almaj t'aan Kue', c ojéeltic túune' dzo'oc c kuchul c kaj óoltic.

⁴Ba'ale' wa yaan máax cu ya'alic: Tene' in kaj óol, ba'ale' ma' táan u dzo'ocbesic u ya'almaj t'aano'obe', jun túul j tuus, yéetel le jaajo' mina'an ti' leti'.

⁵Ba'ale' le máax cu dzo'ocbesic cu t'aan Kue' u yaacunaj Kue' dzo'oc u yutzil chúucpajal ti'; bey túun c ojéeltic nuupul c anil tu yéetelo'.

⁶Le máax cu ya'alic nupuul yanil yéetel Kue' unaj u cuxtal je'el bix cuxlajic Jesucristoe'.

⁷Sucu'une'ex ma' táan in dzíibtic te'ex jun p'éel a'almaj t'aani'; ba'ale' leti' le a'almaj t'aan yaan ti' te'ex u cáajbalo'. Le úuchben a'almaj t'aan leti' le t'aan ta yáax u'uyaje'exo'.

⁸Quex bey anilo', le ba'ax quin dzíibtica' cu béeytal bey jun p'éel a'almaj t'aane', lela' u jaajil ti' Cristo bey xan ti' te'ex, tumen le éekjoche'enilo' táan u máan yéetel táan u léembal le jaajil sáasilo'.

⁹Wa yaan máax cu ya'alic ti' yaan ti' le sáasilo', ba'ale' cu p'ectic u sucu'une', láili' ti' yaan ti' le éekjoche'enilo'.

¹⁰Le máax cu yaabiltic u sucu'une' cuxa'an ti' le sáasilo', yéetel mina'an mix ba'al ca u beet u lúubul ti' keban.

¹¹Ba'ale' le máax cu p'ectic u sucu'une' ti' cuxa'an yéetel ti' cu xíimbal ichil le éekjoch'e'enilo'.

¹²Mejen paalale'ex, quin dzíib ti' te'exe' tumen Kue' dzo'oc u sa'atsic a kebane'ex tu yo'olal u kaaba' Jesucristo.

¹³Taatatzile'ex, quin dzíib ti' te'exe' tumen dzo'oc a kaj óoltique'ex le máax yanili' le ca j chu'unpaj tuláacale'. Táanquelem xi'ipale'ex, quin dzíib ti' te'exe' tumen dzo'oc a dzáancha'atique'ex kaasil ba'al. Dzo'oc in dzíib ti' te'exe', mejen paalale'ex, tumen dzo'oc a kaj óoltique'ex le Taatao'.

¹⁴Dzo'oc in dzíib ti' te'exe' taatatzile'ex, tumen dzo'oc a kaj óoltique'ex le máax yanili' le ca j chu'unpaj tuláacale'. Dzo'oc in dzíib ti' te'ex xan, táanquelem xi'ipale'ex, tumen mu'uka'antaque'ex yéetel dzo'oc a kamique'ex u t'aan Ku ta pucsi'ikale'ex, yéetel tumen dzo'oc a dzáancha'atique'ex kasilba'al.

¹⁵Ma' a yaabiltique'ex yóokolcaab, mix le ba'alo'ob yaan yóokolcaabo'. Wa yáam máax cu yaabiltic yóokolcaabe', ma' u yaabiltmaj Ku le Taatao';

¹⁶tumen mix ba'al ti' le ba'axo'ob cu ya'alic u dzáic yóokolcaabo' ti' Ku le taata u taalo', ba'ale' ti' yóokolcaab u taal. U kaakas dzíibolalo'ob le lu'umcabil wíinclilo', u kaakas dzíibolalil le icho', yéetel u ca'anal ichil cu yantal tu yo'olal u ba'alilo'ob le cuxtalo', tuláacal lela' leti' le ba'axo'ob cu ya'alic yóokolcaab u dzáico'.

¹⁷Le yóokolcaabo' táan u bin u xu'ulul yéetel tuláacal le kaakas dzíibolalo'ob yaan tu yóokolo'; ba'ale' le máax cu beetic ba'ax u káat Kue' cu p'áatal u ti'al kiino'ob mina'an u xuul.

¹⁸Mejen paalale'ex, dzo'oc u kuchul u dzooc kiino'ob. Te'exe' a wu'uymaje'ex táan u taal jun túul máax yaan u p'ectmaj Cristoe'; tumen beoraa' dzo'oc u chíicpajal ya'ab máaxo'ob yano'ob tu contra le Cristoo' le o'olal c ojel ti' yano'on tu dzooc kiino'obe'.

¹⁹Leti'obe' jóok ichilo'on, ba'ale' u jaajile' ma' c ti'alo'obi', tumen wa c ti'alo'obe' dzo'oc ca'ach u p'áatalo'ob t éetele'. Ba'ale' bey úuchico', u ti'al ca ila'ac jach t'áalcabe' ma' tuláacal c ti'alo'obi'.

²⁰Ba'ale' ti' te'exe' Cristoe' dzo'oc u dzáic le Quili'ich Pixano', yéetel tuláacale'ex yaan te'ex kaj óolalil.

²¹Quin dzíib te'ex, túune', tumen a kaj óole'ex le jaajo', ma' tumen ma' a kaj óole'exi'; te'exe' a wojele'ex mix jun p'éel tuus cu páajtal u jóokol ti' le jaajo'.

²²¿Máax le j tuuso'? Leti' le máax cu ya'alique' Jesuse' leti' le Cristoo'. Leti' máax yaan tu contra le Cristo', tumen cu cúulpachcuntic le Taatao' bey xan le Paalo'.

²³Tuláacal máax cu cúulpachcuntic le Paalo' mina'an mix le Taata ti'o'; ba'ale' máax cu kamic le Paalo', ti' yaan le Taata ti' xano'.

²⁴Le o'olale', te'exe' canante'ex ta pucsi'ikale'ex le ca'ansaj ta wu'uyaje'ex tu yáax chuuno'; wa le ba'ax ta wu'uyaje'ex tu yáax chuun cu p'áatal ta pucsi'ikale'exo', te'ex xane' bíin p'áataque'ex nupa'ane'ex yéetel le Paalo' bey xan yéetel le Taatao'.

²⁵Jesucristoe' u ya'almaj u dzáic to'on le cuxtal mina'an u xuulo'.

²⁶Dzo'oc in dzíibtic te'ex lela' tu yo'olal le máaxo'ob tu'ubsique'exo'obo'.

²⁷Ba'ale' te'exe' yaan te'ex le Quili'ich Pixan tu dzaj te'ex Jesucristo, bey túuno' ma' kabéet ca ca'ansa'aque'ex tumen mix máaqui', tumen le Quili'ich Pixano' cu ca'ansic te'ex tuláacal ba'al, yéetel u ca'ansajo'obe' u jaajilo'ob, ma' tuuso'obi'. Bey túuno', p'áatene'ex táan a cuxtale'ex nupa'ane'ex ti' Cristo, je'el bix u ca'ansic te'ex le Quili'ich Pixano'.

²⁸Bele' túuna', mejen paalale'ex nupa'ane'ex ti' Cristo, u ti'al ca yanac to'on kub óolal le quéen chíicpajac leti'o', yéetel ma' a ch'a'ic subtal tu táan le quéen taalaco'.

²⁹Wa a wojele'ex Jesucristo toje', ojéelte'ex xane' tuláacal le máax cu beetic ba'ax toje' sija'an ti' Ku.