Read Yucateco Jueces 1 Bible Online

Jueces 1 - Yucateco bible

Jueces 1

¹Cu dzo'ocol u quíimil Josuee', le j israelitaobo' tu káat chi'itajo'ob ti' Yuumtzil: ¿Máax ichilo'on bíin xi'ic táanil j ba'atel yéetel le j cananeobo'?

²Yuumtzile' tu núucaj Judá bíin xi'ic táanil tumen tene' bíin in kub tu kab le lu'umo'.

³U múuch' cajtalil u yotochnáalo'ob Judae' tu ya'alajo'ob ti' u múuch' cajtalil u yotochnáalo'ob Simeón u láaktzilo'ob: Co'otene'ex t éetel te j lu'um cu dza'abal to'ono', u ti'al c ba'atel yéetel le j cananeobo', cu dzo'ocole' to'on xane' bíin xi'ico'on ta wéetele'ex. Le u múuch' cajtalil u yotochnáalo'ob Simeone' j bino'ob tu yéetelo'ob,

⁴j bino'ob túun le Judeailo'obo', ca tu bakpachtajo'ob u lu'umo'ob le j cananeob yéetel le j ferezeobo', Yuumtzil túune' tu kubaj tu kabo'ob. Tu caajil Bezeque' ti' tu pa'ajo'ob u muuko'ob diez mil wíinico'ob, ichilo'obe' ti' yaan ca'ach Adonisedequi'.

⁶Ba'ale' Adonisedeque' j púudzi; tu yáalcabpachtajo'ob le ca tu chucajo'obe' tu xotajo'ob u x náab kabilo'ob yéetel u x náab ooquilo'ob.

⁷Adonisedec túune' tu ya'alaj: sesenta ajawo'ob tin túuxtaj xotbil u náab kabo'ob yéetel u náab ooco'ob cu molico'ob ca'ach u p'úuyulo'ob waaj yáanal in x táasche'; je'el bix tin beetaje' bey u beeta'al teen tumen Ku. Bey bisa'abic Jerusalén tu'ux j quíimi'.

⁸U múuch' cajtalil u yotochnáalo'ob Judae' tu ba'ateltajo'ob Jerusalén ca tu ch'a'ajo'ob, tuláacal, cu dzo'ocol u quíimsico'ob u cajnáalilo'ob ch'acbil yéetel máascabe' tu tóocajo'ob le noj caajo'.

⁹Cu dzo'ocole' j bino'ob u ba'atelto'ob le j cananeob caja'ano'ob tu pu'uquilo'ob Néguev, yéetel te j táax lu'umo'.

¹⁰Judae' j bin Hebrón u ba'atelto'ob xan le j cananeob, le cu kaaba'intic ca'ach Quiriat-arba; ca tu pa'ajo'ob u muuk Sesai, Ahimán yéetel Talmai.

¹¹Líikbal te'elo' j bino'ob tac tu nojoch caajil Debir, le cu kaaba'intic ca'ach Quiriat-sefer.

¹²Ca tu ya'alaj Caleb: Le máax bíin ch'a'ic Quiriat-sefere', tene' bíin in dzáa Acsa in x ch'upul paal u ti'al u yatante.

¹³Otoniel u paal Cenaz, u yíidzin Caleb tu ch'a'aj le caajo'; leti'e' tu dzaj Acsa u x ch'upul paal u ti'al u yatante.

¹⁴Ba'ale' le ca j kuch leti' tu yicnale', Otoniele' tu káat óoltaj ti' ca u káat ti' u taata jun xéet' lu'um. Le ca tu yilaj Caleb táan u yéemel x Acsa ti' u burroe', tu káat chi'itaj ti': ¿Ba'ax cu yúuchul teech?

¹⁵Leti' túune' tu núucaj: je'el bix dzo'oc a dzáic téen u lu'umil Négueve', dzáa ti' teen xan sayabo'ob. Caleb túune' tu dzaj ti' le sayabo'ob yano'ob ca'analo' bey xan le yano'ob caabalo'.

¹⁶U ch'i'ilancab Hobab le j quenitae, u taata u yatan Moisés, jóoko'ob tu noj caajil xa'ano'ob yéetel u paalal Judae', ca j bino'ob tac tu x tocoy lu'umil Judá, tu noojol Arad; ti' cajlajo'ob yéetel u cajnáalilo'ob le lu'umo'.

¹⁷U múuch' cajtalil u yotochnáalo'ob Judá yéetel u múuch' cajtalil u yotochnáalo'ob Simeone', je'el bix tu kax t'antilaco'obe' j bino'ob tu yóokol le j cananitaob caja'ano'ob ca'ach Sefate', ca tu láaj xiixcuntajo'ob le caajo'; tu yo'olal lelo' tu dzajo'ob u kaaba'int Horma.

¹⁸Chéen ba'ale' ma' páatchaj u ch'a'ico'ob Gaza, Ascalón mix Ecrón mix le lu'umilo'ob yano'ob naadzo'.

¹⁹Quex ti' yaan ca'ach Yuumtzil yéetel Judáe', leti'obe' páatchaj u ch'a'ico'ob u pu'uquilo'obe', ma' páatchaj u jóokesico'ob le caja'ano'ob te j táax lu'umo', tumen leti'obe' yaan ca'ach u bolano'ob fierro u ca'ajo'ob.

²⁰Ti' Calebe' j dza'ab Hebrón, jach je'el bix u ya'almajil ca'ach Moisese'; Caleb túune' tu yáalcabansaj u yóox túul paalal Anac.

²¹Ba'ale' le j jebuseob caja'ano'ob ca'ach Jerusalén ma' áalcabansa'abo'ob tumen u ch'i'ibalo'ob Benjamini'. Le beetic tac tu kiinil bejela'e' j p'áato'ob múuch' cajtal le jebuseob yéetel u múuch' cajtalil yotochnáalo'ob Benjamín Jerusalén.

²²U múuch' cajtalil u yotochnáalo'ob Jose' tu ba'ateltajo'ob Betel; le caajo' cu kaaba'intic ca'ach Luz, tu túuxtajo'ob aj ch'úuco'ob u yilo'ob le caajo'. Táan ca'ach u yáanta'alo'ob tumen Yuumtzil.

²⁴Le máaxo'ob tu dzajo'ob u ti'al u canantique' tu yilajo'ob jun túul j xiib táan u jóokol te j caajo' ca tu ya'alajo'ob ti': wa ca we'esic to'on tu'ux cu páajtal ocol ichil le caajo' to'one' je'el c beetic ti' teech utze'.

²⁵Leti'e' tu ye'esaj u jool le caajo', ca tu quíimsajo'ob yéetel u ch'aac máascab tuláacal u cajnáalilo'ob: ba'ale' ti' le máac tu ye'esaj u beel le caajo' ma' j quíimsa'abi', mix u yéet otochnáalo'ob.

²⁶Le j xiib túuno' j bin tu lu'umil hititaob ca tu beetaj jun p'éel túumben caaj tu kaaba'intaj Luz; le u kaaba' tac bejela'e'.

²⁷U múuch' cajtalil u yotochnáalo'ob Manasese' ma' j páatchaj u jóokesico'ob le yano'ob Bet-seán, Taanac, Dor, Ibleam yéetel Meguido le caja'ano'ob ca'ach te'elo', mix le yano'ob tu bakpach le noj caajo', le j cananeobo' j p'áato'ob cajtal te'elo'.

²⁸Le ca tu ch'a'aj muuk Israele' páatchaj u t'onquintico'ob yéetel sen meyajo'ob le j cananeobo', ba'ale' mix bey páatchajic u yáalcabansico'obi'.

²⁹Mix u ch'i'ibalo'ob Efraín páatchaj u yáalcabansic le j cananeob caja'ano'ob ca'ach te'elo', Ba'ale' múul cajlajo'ob yéetelo'ob.

³⁰Mix u ch'i'ibalo'ob Zabulón tu yáalcabansajo'ob le j cananeob caja'ano'ob Quitrón, yéetel Naabal, ba'ale' le j cananeobo' j p'áato'ob cajtal ichilo'ob quex beeta'ab u sen meyajo'ob.

³¹Mix u múuch' cajtalil u otochnáalo'ob Aser páatchaj u yáalcabansico'ob le j cananeob caja'ano'ob ca'ach Aco, Sidón, Ahlab, Aczib, Helba, Afec yéetel Rehob, ca j p'áato'ob cajtal ichilo'ob.

³³Mix u ch'i'ibalo'ob Neftalí páatchaj u yáalcabansic le j cananeob cajacbalo'ob ca'ach Bet-semes, Bet-anat, p'áato'ob cajtal ichilo'ob; ba'ale' tu beetajo'ob u sen meyajo'ob,

³⁴Le j amorreobo' tu yáalcabansajo'ob u yotochnáalo'ob Dan tac tu pu'uquilo'ob, ma' tu cha'ajo'ob u yéemelo'ob te j táax lu'umo'.

³⁵Le j amorreobo' p'áato'ob cajtal Heres, Ajalón yéetel Saalbim; Ba'ale' le ca tu ch'a'aj muuk u ch'i'ibalo'ob Josee', ca tu beetajo'ob u sen meyajo'ob.

³⁶U xuul u lu'umil edomitaobe' cu bin u na'acal ca'ach Acrabim, tac u bin u bin ca'anal tu caajil Sela.