Read Yucateco Jueces 10 Bible Online

Jueces 10 - Yucateco bible

Jueces 10

¹Cu dzo'ocol u quíimil Abimeleque', jun túul j xiib ti' u múuch' cajtalilo'ob u yotochnáalo'ob Isacar cu kaaba'intic Tola, u paal Fúa u yáabil Dodo, j líik u ti'al u yáantic Israel. Tola cajacbal ca'ach Samir, tu witzil Efraín,

²tu méektáantaj Israel maanal veintitrés ja'abo'ob, tac ca j quíimi ca j mu'uc Samir.

³Cu dzo'ocole' j líik Jair, j Galaadil ca'achi', ca tu méektáantaj Israel veintidós ja'abo'ob.

⁴Yanchaj ti' Jair treinta u paalal, tu jujun túulile' yaan jun túul burro cu nat'ic, yaan xan jujun p'éel caaj ti'ob tu lu'umil Galaad. Le treinta noj caajo'obo' kaj óolta'ano'ob tac bejela'e' bey u noj caajilo'ob Jair.

⁵Le ca'aj quíim Jaire' mu'uc Camón.

⁶Ba'ale' le j israelitaobo' tu ca'a beetajo'ob kaas tu táan Yuumtzil, ca tu kultajo'ob jejeláas yoochelo'ob beetbil kuob cu kaaba'intic Baal yéetel Astarté, je'el bix u kuob Asiria, Sidón, Moab, Amón, yéetel u kuob le j Filisteobo'. Tu p'atajo'ob Yuumtzil ca jáaw u kultico'ob.

⁷Let o'olal Yuumtzile' jach p'u'uj yéetelo'ob ca tu kubajo'ob tu kab le j Filisteob yéetel tu kab le j amonitaob.

⁸J máan diez yéetel ocho ja'abo'ob, le Israelitaob táan u yaayaj loobilta'alo'ob tumen le j filisteob yéetel le j amonitaob caja'ano'ob Galaad, tu láak u tzéel Jordán, tu lu'umil amorreob.

⁹Le j amonitaobo' tu ch'actajo'ob Jordán u ti'al ba'atelto'ob xan u múuch' cajtalilo'ob u yotochnáalo'ob Judá, Benjamín yéetel Efraín, le j israelitaobo' tu yilajuba'ob talam kaas.

¹⁰káat óolnajo'ob túune' ca tu ya'alajo'ob ti' Yuumtzil: C Ku, dzo'oc kebanchajal tumen dzo'oc j xúump'attiquech u ti'al kultic le beetbil kuobo'.

¹¹Yuumtzile' tu núucaj: Te'exe' j beeta'ab a yaayaj mukyaje'ex tumen le j egipciob, le j amorreob, amonitaob, le j filisteob,

¹²le j sidonitaob, amalecitaob yéetel madianitaob; ba'ale' káat óolnaje'ex ti' teen ca tin wáantaje'ex.

¹³Quex tin wáantaje'exe', te'exe' ta xúump'attajene'ex u ti'al a bine'ex a kulte'ex u láak kuob, let o'olal ma' bíin in ca'a wáante'exi'.

¹⁴¡Xeene'ex, káate'ex áantaj ti' le kuob dzo'oc a yéeyique'exo'! ¡Leti'ob ca u yáante'ex le quéen yanaque'ex ichil óotzilil!

¹⁵Le j israelitaob túuno' tu núucajo'ob ti' Yuumtzil: Dzo'oc c kebanchajal. Beet t éetel je'el ba'ax a káate', ba'ale' ¡Beet utz a wáantico'on bejela'e'!

¹⁶Le j israelitaobo' tu xúump'attajo'ob le yaanal kuobo' ca j suunajo'ob u kulto'ob Yuumtzil, tu yo'olal u sen mukyaj le israelitaobo' Yuumtzile' tu ch'a'aj óotzilil ti'ob.

¹⁷Le j amonitaobo' tu much'ajuba'ob ca je'elo'ob Galaad, le j israelitaobo' tu much'ajuba'obe' ca je'elo'ob Mizpa.

¹⁸Le j israelitaob caja'ano'ob ca'ach Galaad yéetel u nojochilo'obe' tu ya'alajo'ob tu baatzilo'oba', le máax bíin u nu'uct le ba'atel u ti'al u bin yóokol le j amonitaob leti' bíin u méektáant tuláacal u cajnáalilo'ob Galaad.