Read Yucateco Jueces 11 Bible Online

Jueces 11 - Yucateco bible

Jueces 11

¹Jefté jun túul aj ba'atel jach j xiib cajnáal tu lu'umilo'ob Galaad. U paal ca'ach jun túul x cáacbach ti' jun túul j xiib cu kaaba'intic Galaad,

²U yatan Galaade' tu dzaj u láak paalal ti', ca j ch'íijo'obe' tu yáalcabansajo'ob Jefté tu yotocho'ob ca tu ya'alajo'ob ma' bíin u kam mix ba'al ti' u taatai' tumen u paal u láak co'olel.

³Jefté túune' j púudz ti' u sucu'uno'ob ca j bin cajtal tu lu'umilo'ob Tob, tu'ux tu nupajuba'ob ti'e' jun múuch' j ma' beel wíinico'ob, pa'ate' yéetele' cu jóokolo'ob chéen j máan meyaj loob.

⁴Cu Dzo'ocol u máan ca'ach dze'edzec kiine' le j israelitaob jo'op' u loobilta'alo'ob tumen j amonitaobo',

⁵u nuuquilo'ob Galaade' tu túuxtajo'ob taasbil Jefté tac tu lu'umilo'ob Tod,

⁶ca tu ya'alajo'ob ti': Co'oten j káate', teech c nojoch c ba'atelt le j amonitaob.

⁷Jefté tu núucaj: ¿Ma' wa a p'eektmaine'ex ca'ach ca ta beetaje'ex in jóokol tu yotoch in taata? ¿Ba'axten bejela'e' tu yo'olal yaj yanile'ex ca taal a caxtene'ex?

⁸Ca tu núucajo'ob: Tu yo'olal yaj yanilo'one' taalo'on cax teech c káat ca taaquech t éetel u ti'al a ba'atelt le j amonitaob, bey xan u ti'al c beetiquech u nojoch tuláacal u cajnáalilo'on Galaad.

⁹Tu núucaj Jefté: Wa jach jaaj a káate'ex ca suunaquen u ti'al in ba'atelt le j amonitaob, wa Yuumtzil cu dzáic ti' teen in pa'a u muuko'obe' bíin in betinbáa a noojoche'ex.

¹⁰Le j nuuquilo'obo' tu éejemtajo'ob: Yuumtzil u'uyic, to'one' bíin c beet tuláacal le ba'ax dzo'oc a wa'alico'.

¹¹Jefté túune' j bin yéetelo'ob, le caajo' tu wa'acuntaj bey u nojchile' yéetel u ti'al u poolint le ba'atelo'. Mizpae' Jefté tu ya'alaj tu táan Yuumtzil tuláacal le ba'ax tu yáax a'alajo',

¹²Cu dzo'ocole' tu túuxtaj dze'edzec aj bisaj t'aano'ob ti' u ajawil amonitaob u ti'al ca a'ala'ac: ¿Ba'ax yaan teech t éetel u ti'al ca taaquech a beeto'on loob?

¹³U ajaw le j amonitaob tu núucaj ti' u aj bisaj t'aano'ob Jefté: Te'ex j israelitaob jóoke'ex Egipto, ta lukese'ex j lu'umo'ob chúunul tu yáalcab ja'il Arnone' cu kuchul tac tu yáalcab ja'il Jaboc yéetel Jordán. Bejela'a' túune' x ma' ba'atele' ca'a sut teen le lu'umo'.

¹⁴Jefté tu túuxtaj túun u láak aj bisaj t'aano'ob ti' u ajawil le j amonitaob,

¹⁵yéetel le túuchi' t'aana': Le tu núucaj Jefté ca a'ala'ac teech: To'on le j israelitaono' mix jun téen lu'uste'ex a lu'um mix ti' moabitaob mix ti' amonitaob.

¹⁶le ca'aj jóoko'on ca'ach Egiptoe', ch'actaj le j x tocoy lu'umo' tac le chac ka'anabo' ca j kucho'on tac Cades.

¹⁷Tu túuxtaj túun dze'edzec aj bisaj t'aano'ob ti' u ajawil Edom u ti'al káatique' wa je'el u cha'ic j máan tu lu'umile' ba'ale' leti'e' ma' tu yóoltaji' bey xan káataj ti' u ajawil Moab láili' ma' tu cha'aj c máani' le beetic p'ato'on Cades.

¹⁸Cu dzo'ocole', iquil xíimbaltic le x tocoy lu'umo' bakpachtaj u lu'umilo'ob Edom yéetel Moab, tac c kuchul tu lakin Moab tu'ux je'elo'on tu láak u tzéel u áalcab ja'il Arnón. Ba'ale' ma' ch'actaji' tumen te'elo' u chúunul u lu'um Moab.

¹⁹Tu túuxtaj túun dze'edzec aj bisaj t'aano'ob ti' Sehón u ajawil amorreob Hesbón, u ti'al c káatic ti'e' ca u cha'a c máan tu lu'umilo'ob u ti'al bin t lu'umil.

²⁰Ba'ale' Sehóne yanji péec óol ti', ma' tu yóoltaj ca máanco'on tu lu'umi'; ca tu much'quintaj u aj ba'atelo'ob ca je'el Mahaza ca j lúub t óokol.

²¹Yuumtzil u Junab Ku Israel, u caajal, tu pa'aj u muuk Sehón yéetel u aj ba'atelo'obe' ca t pa'aj u muuk beyo' j ti'alintaj tuláacal u lu'umil le j amorreob:

²²ch'a'aj tuláacal u lu'umil j amorreob, cu chúunul tu yáalcab ja'i' Arnón tac Jaboc cu chúunul x tocoy lu'umil tac Jordán.

²³¿Bejela'e' a káat a lukes to'on le ba'ax tu lukesaj Yuumtzil ti' le j amorreob u ti'al u dzáic to'ono'?

²⁴Wa Quemós, a ku cu dzáic teech wa ba'axe' ca tucultic a ti'al. ¿ma' beyi'? to'on xane' tucultic c ti'al le ba'ax Yuumtzil tu dzaj c ti'alintico'.

²⁵¿Jach ca wu'uyicabáa asab ma'alobech ti' Balac, u paal Zipor, ajawil Moab? ma'alob túun, leti'e' ma' j taal j ba'atel t éeteli'.

²⁶trescientos ja'abo'ob dzo'oc u máan cajlaco'on Hesbón, Aroer, yéetel tu péet caajilo'ob yéetel tuláacal u noj caajo'ob tu jáal Arnón; ¿ba'axten ma' ta káate'ex ti' tuláacal le kiino'ob je'elo'?

²⁷Tene' ma' in beet teech mix jun p'éel kaasi'. Teche' ca beetic kaas iquil a taal a loobilto'on. Yuumtzil aj p'is óole' leti' bíin u p'is óolt le j israelitaobo' yéetel le j amonitaobo'.

²⁸U ajawil le j amonitaob ma' tu yóoltaj u yu'ub le t'aan tu túuxtaj Jefté.

²⁹U pixan Yuumtzile' j taal yóokol Jefté, leti'e' tu yáalcabtaj Galaad yéetel Manasés, tac yocol tu lu'umil le j amonitaob.

³⁰Jefté' tu beetaj le séeb chi' ti' Yuumtzil beya': Wa ca dzáic teen ca in pa'a u muuk le j amonitaobo',

³¹tene' quin kubic láaj tóocbil le máax bíin yáax jóokoc tin wotoch u ti'al kamiquen le quéen suunaquen ti' le ba'atelo'.

³²Jefté j ooc tu lu'umil le j amonitaob, ca tu ba'ateltaj, Yuumtzil tu dzaj ti' Jefté ca béeyac.

³³Jefté' tu quíimsaj ya'ab u aj p'eeco'ob, ca tu ch'a'aj veinte caajo'ob ichil Aroer, Minit yéetel abel-keramin, beya' le j israelitaobo' tu dzáancha'ato'ob le j amonitaobo'.

³⁴Le ca j suunaj Jefté tu yotoche', le chéen jun túul u x ch'upul paal yaan ti'e' jóok u kam táan u yóokot táan xan u bobojtic u mejen paax. Chéen leti' tumen ma' j yanji' u láak u paalali',

³⁵let óolal le ca tu yilaje', tu jataj u nook u chíiculal yaayam ca tu ya'alaj ti': ¡In x ch'upul paal, dzo'oc a dzáic ti' teen yaayaj óolal! ¡Tumeen teech beetic in mukyaj, tumen tin beetaj jun p'éel séeb chi' ti' Yuumtzil yaan in dzo'ocbesic!.

³⁶X leti'e' tu núucaj: Teech in taata, beet tin wéetel le ba'ax ta séeb chi'ita ti' Yuumtzil tumen leti'e' dzo'oc u dza'ictech páajtalil yóokol a aj p'eeco'ob le j amonitaob.

³⁷Chéen quin kátic teche' jun p'éel ba'al, ca dzáa ti' teen ca'a p'éel winalo'ob u ti'al ca xi'iquen xíimbal te j káax yéetel in wéet x ch'úupalalil tumen yaan in quíimil x ma' dzo'ocol beelil.

³⁸Jefté' tu dzáa ti' le ca'a p'éel winalo'ob, ti' le kiino'obo' x leti'e' j máan táan u yokol te j káaxo' yéetel u yéet x ch'úupalo'obo' tu yóolal yaan u químil x ma' dzo'ocol beelil.

³⁹Cu dzo'ocol u máan le kiino'obo' j suunaj tu'ux caja'an u taata, le ti' túune' tu dzo'ocbesaj le séeb chi' tu beetaj ca'ach ti' Yuumtzilo'. U x ch'upul paal Jefté j quíim x sujuy tumen ma' tu nupubáa yéetel mix jun túul j xiibi'.

⁴⁰Let o'olal suuc ichil le j israelitaob tuláacal ja'abo'obe' le x ch'úupalo'obo' yaan u bino'ob banban okol u x ch'upul paal Jefté can p'éel kiin.